قازاقستان رەسپۋبليكاسى پارلامەنتى سەناتىنىڭ دەپۋتاتى اندرەي لۋكين نۇر-سۇلتان قالاسىنداعى ازاماتتارعا الەۋمەتتىك قولداۋ كورسەتۋ ورتالىقتارىن ارالادى.
ول «شاراپات» جانە «جانسايا» الەۋمەتتىك قىزمەت كورسەتۋ ورتالىقتارىنىڭ, قارتتارعا, مۇگەدەكتەرگە جانە ەرەكشە قاجەتتىلىگى بار بالالارعا ارنالعان وڭالتۋ ورتالىعىنىڭ, «جانۇيا» وتباسى ينستيتۋتىن قولداۋ ورتالىعىنىڭ جانە تاعى باسقا ۇجىمدارمەن كەزدەستى. بۇل ورتالىقتاردىڭ ماقساتى – ومىردە قيىن جاعدايعا تاپ بولعان ءاربىر ازاماتقا, وتباسىنا پسيحولوگيالىق, الەۋمەتتىك جانە زاڭگەرلىك كومەك كورسەتۋ, سونداي-اق جان-جاقتى قولداۋ جاساۋ.
ۇيىمدار سونىمەن قاتار كوپبالالى, تولىق ەمەس جانە از قامتىلعان وتباسىلارعا, ەرەكشە قاجەتتىلىگى بار بالالاردى تاربيەلەپ وتىرعان اتا-انالارعا, ەگدە جاستاعى ادامدارعا, بەلگىلى تۇرعىلىقتى جەرى جوق ادامدارعا قولداۋ كورسەتەدى.
«قوعامنىڭ الەۋمەتتىك جاعدايىن رەتتەۋ – مەملەكەتتىڭ الەۋمەتتىك ساياساتىنىڭ نەگىزگى باعىتىنىڭ ءبىرى. سوندىقتان ەلوردادا الەۋمەتتىك توپتار اراسىنداعى قارىم-قاتىناستى قولداۋ جانە جالپى قوعامنىڭ ءال-اۋقاتى مەن ءومىر ءسۇرۋ دەڭگەيىن ارتتىرۋ ماقساتىندا كومەككە مۇقتاج ادامدارعا الەۋمەتتىك قىزمەت كورسەتۋدى قولداۋ ورتالىقتارى اشىلدى» دەپ اتاپ ءوتتى اندرەي لۋكين.
سەناتور كەزدەسۋ سوڭىندا وتكىزىلگەن شارالار ءۇشىن العىس ايتىپ, جۇمىستارىنىڭ تابىستى بولۋىنا تىلەكتەستىگىن ءبىلدىردى.
