جازعان-سىزعانى ەلگە ەلەۋلى, قالامداسقا قالاۋلى, وقىرمانعا ورايلى بولعان سەرىكتەسىم – ەرەكە! سەن, ەڭ اۋەلى اۋلەتىڭە, وتباسىڭا, اعايىن-تۋعانعا, دوس-جارانعا, ارىپتەسكە, جۇرەگى مەن جانى قازاق دەپ سوققان بارشاعا قۇرمەتتىنىڭ قۇرمەتتىسىسىڭ! كوپ قۇندىلىقتار لايىقتى باعالانباي, ادامشىلىق قامى كات بولا باستاعان كەزەڭدە قىمباتتىنىڭ قىمباتتىسى دا – ءوزىڭ سىندى ەر-ازاماتتار دەپ بىلەمىز. ويتكەنى, ەل تانىعان ەركىن قىدىر – ەركىن ويدىڭ يەسى, ايتارى بار ازامات, ءبىلىمپاز, ىسكەر, ادىلەتتى باسشى.
[smartslider3 slider=3601]
مىنە, ءومىر-وزەندە ەسكەگىڭدى ەسىپ, «الپىستىڭ» جەلكەنىن سەن دە جەلبىرەتىپ ۇلگەردىڭ, ءاربىر بەلەستىڭ, العان اسۋدىڭ ءوز تاريحى بولادى. ونى ءومىردىڭ بايانى دەيدى. تۋعان كۇندى, ياعني جاڭا جاستى اتاپ وتەتىن جىلدار ۇزاعىنان ءسۇيىندىرسىن! ءزاۋ-زاتىڭدى تانىعان زامانداستارىڭمەن بىرگە جاسا! قۇرداستارىڭ سيرەمەسىن, قۇتتىقتاۋشىڭ دا, قوناعىڭ دا كوپ بولسىن! قاناتىڭ ەش تالماسىن!
ءبىز ەرتە دە ەسەيمەدىك, كەشەۋىلدەپ قالعان دا جەرىمىز جوق شىعار. كىندىك كەسكەننەن كەزدەسپەسەك تە, كىسى تانىپ, سالەم بەرەتىن ساۋلەلى شاعىمىزدان يىقتاسىپ كەلەمىز.
جاسىمىزعا ساي تابيعاتىمىزدى ساقتاۋعا, تانىمدى جەتىلدىرۋگە تىرىستىق. ورتامىز ورنىقتى, ويىمىز ورامدى, قاتارىمىز قوعامشىل بولىپ قالىپتاستى. كورگەن-بىلگەن تاربيەمىز, جيعان-تەرگەن ءبىلىمىمىز, جاراتقان يەمىزگە تاۋەلدى بولمىسىمىز, قانمەن بەرىلگەن, سۇتپەن سىڭگەن قادىر-قاسيەتىمىز وسى جىلدارداعى سىيلاستىعىمىزدى قىل وتپەستەي دوستىققا, ايتقىزباي ۇقتىرار سىرلاستىققا ۇلاستىردى. شىننىڭ ءجۇزىن كوردىك, جالعان دا سۇلباسىن جاسىرا المادى. سىنا قاقتىرماي شىڭدالۋعا بوي ۇيرەتتىك. ويدا ويقاستاعان نەتكەن سايراندى, نەبىر ويراندى باستان كەشىپ كەلەمىز. وزگەلەردەي مانساپتىڭ سوڭىنا تۇسسەك, قاشقان-قۇشقاندى قۋىپ جەتىپ, اۋەلەپ ۇشقاندى دا ءۇيىرىپ الار ەدىك. ءبىز مىنەز-قۇلقىمىزدى وزگەرتپەدىك, قاناعاتتىڭ قازىعىن ۋىستان شىعارمادىق. مىڭ شۇكىرگە تاتيتىن ءبىر شۇكىرىمىزدەن جاڭىلمادىق.
مەرەيىڭ اسقان جاستا تىلەكتەن, تارتۋ-تارالعىدان كەندە بولماسسىڭ. سوندا دا اقجارىلقاپ تىلەگىمىزدى اقتاردىق. اق باتاسىن وزىڭنەن اياماعان ۇلكەندەر جاعى, قازىنالى قارتتارىڭ – اتا-اناڭ ۇزاق جاساسىن! ءتاۋىر باۋىرلارىڭ – التىن قامال-قورعانىڭ ءاردايىم بەكەم بولسىن! وتباسىڭا اماندىق تىلەيمىز!
ەڭبەگىڭدى ساۋدالاپ, ساتساڭ دا, زەينەتىن تەرىپ جاتساڭ دا جاراساتىن كەزەڭدە ۇرپاق ءۇشىن, ەل ءۇشىن ايتارىڭنىڭ سالماعى بۇرىنعىدان دا مول بولسىن, سۇرەر عۇمىردىڭ سىرى مەن سىنى كەتپەي, ءمانى ارتا بەرسىن! قالامىڭنىڭ ۇشى مۇقالماسىن, جارىق كورەر كىتاپتارىڭنىڭ قالىڭدىعى دا جۇقارماسىن!
جاراتۋشى يەمىز نيەت پاكتىگىن, پەيىل كەڭدىگىن, تابىس كوزىن, سابىر بايلىعىن بەرسىن!
اللا تاعالا جاقسى كۇندەردە, مارتەبەلى مەرەيتويلاردا بىرگە بولىپ, قۋانىشتى بىرگە ءبولىسۋدى جازسىن! وتكەن ءداۋىردىڭ, الداعى ءومىردىڭ بايانى تاۋسىلماسىن!
دارحان مىڭباي
ءماجىلىس دەپۋتاتى
