ورتالىق كوممۋنيكاتسيالار قىزمەتىندە وتكەن بريفينگتە استاناعا جۇمىس ساپارىمەن كەلگەن حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەس ەلىمىزدىڭ «ەكسپو-2017»-گە دايىندىق جۇمىستارىنا ريزاشىلىعىن ءبىلدىرىپ, وسى قارقىن باسەڭدەمەسە, قازاق ەلى ۇلكەن جەتىستىكتەرگە جەتەتىنىن مالىمدەدى.
«ەكسپو» مامانداندىرىلعان كورمەسىن وتكىزۋ ارقىلى قازاق ەلى ءوزىنىڭ ۇلت رەتىندەگى ەرەكشەلىگى مەن قول جەتكىزگەن تابىستارىن الەم الدىندا ايشىقتاۋعا ۇلكەن مۇمكىندىك الىپ وتىرعانىن ايتقان لوسسەرتالەس مىرزا بۇل ايتۋلى شارا مەملەكەتتىڭ الەۋمەتتىك-ەكونوميكالىق احۋالىنا وڭ اسەر ەتەتىنىن جەتكىزدى. كورمەنى وتكىزگەن كوپ ەلدەردىڭ الەم الدىنداعى ابىروي-بەدەلى اسقاقتاپ قانا قويماي, مەملەكەتتىك ماڭىزدى جوبالارعا ينۆەستيتسيانى كوپتەپ تارتۋعا مۇمكىندىك العان. دەمەك, بۇل حالىقارالىق شارا قازاق ەلىنە دە تولايىم تابىستار اكەلەتىنىنە باس حاتشى سەنىم ءبىلدىردى. بۇگىندە اقپارات كەڭىستىگىندە «جاس مەملەكەتتىڭ جاھاندىق كورمەنى وتكىزۋگە قاۋقارى جەتە مە؟» دەگەن كۇدىكتى پىكىرلەر گۋىلدەپ تۇر. بۇعان دا ۆيسەنتە لوسسەرتالەس ءوز جاۋابىن بەردى: «قازاقستاننىڭ «ەكسپو» كورمەسىن جوعارى دەڭگەيدە الىپ شىعۋىنا تولىق جاعدايى بار. بۇعان دەيىن تالاي حالىقارالىق شارالاردى ابىرويمەن اتقارىپ جۇرگەن قازاق ەلىنە ءبىز كامىل سەنەمىز. كەرەك كەزىندە قول ۇشىن بەرۋگە ءازىرمىز. ال بۇعان كۇدىكپەن قارايتىندار – قازاقستاندى
جەتە تاني قويماعاندار».
«ەكسپو»-عا بايلانىستى اتقارىلىپ جاتقان دايىندىق شارالارىمەن باستان-اياق تانىسىپ شىققانىن ايتا كەلە باس حاتشى 2017 جىلى وتەتىن كورمەنىڭ ارحيتەكتۋرالىق جوسپارىنا وزگەرىس ەنگىزۋ قاجەتتىگىنە توقتالدى. ونىڭ ايتۋىنشا, «ەكسپو» – ءبىر كۇندىك شارا ەمەس. ول – بۇكىل ءبىر ەلدىڭ الەۋمەتتىك-ەكونوميكالىق دامۋىنا سونى سەرپىن بەرەتىن ءارى سول ەلمەن بىرگە ماڭگىلىك قالاتىن ىرگەلى دۇنيە. سوندىقتان ارحيتەكتۋرالىق شەشىمنىڭ ارقايسىسى ابدەن زەردەلەنىپ بارىپ قابىلدانۋى كەرەك. بەكىتىلگەن تالاپتار مەن شەبەرلىك جوسپارىنا جان-جاقتى ساي بولۋى ءتيىس.
بۇدان كەيىن ءسوز العان «استانا ەكسپو – 2017» ۇلتتىق كومپانياسى» اق باسقارما توراعاسى تالعات ەرمەگياەۆ «ەكسپو» قالاشىعىنىڭ العاشقى قاداسى بيىلعى ءساۋىر ايىندا قاعىلاتىنىن ايتتى. 174 گا اۋماقتى الاتىن الىپ كەشەندى سالۋعا بىرنەشە قۇرىلىس كومپانياسى جۇمىلاتىن بولادى. باس مەردىگەر ازىرشە انىقتالعان جوق. بىراق ىرىكتەۋ ءجۇرىپ جاتىر ەكەن. تالعات امانگەلدىۇلى قالاشىقتىڭ تورىندە ەتنواۋىل بوي كوتەرەتىنىن, مۇندا قازاق حالقىنىڭ مادەنيەتى مەن تاريحىنان سىر شەرتەتىن كورىنىستەر بەينەلەنەتىنىن تىلگە تيەك ەتتى.
سونىمەن, بيىلعى 11 ماۋسىم – ەلىمىز ءۇشىن ماڭىزدى كۇن. وسى كۇنى 2017 جىلعى كورمە استانادا وتەتىنى حالىقارالىق كورمە بيۋروسىنىڭ باس اسسامبلەياسىندا رەسمي تۇردە مويىندالىپ, «ەكسپو» تۋى سالتاناتتى تۇردە قازاق ەلىنە تاپسىرىلادى.
قىمبات نۇرعالي
