قالالىق ءماسليحاتتىڭ ءماجىلىس زالىندا وتكەن دوڭگەلەك ۇستەل بارىسىندا ەلورداداعى كوشە-جول جەلىسىن دامىتۋ جانە قوعامدىق كولىك قىزمەتىن جاقسارتۋ تۋرالى ماسەلە تالقىلاندى.
ءماسليحات حاتشىسى س.ەسىلوۆ بۇگىنگى باسقوسۋدىڭ الدىندا ءبىر توپ دەپۋتاتتار ەلورداداعى كولىك كاسىپورىندارىندا بولىپ, اۆتوبۋس باعىتتارىنىڭ جۇمىسىمەن جاقىنىراق تانىسىپ-زەرتتەپ, وزدەرىنىڭ ۇسىنىستارىن جولاۋشىلار كولىگى جانە اۆتوموبيل جولدارى باسقارماسىنا جولداعانىن جەتكىزدى.
بۇگىندە قالا تۇرعىندارىنىڭ جىلدام ءارى ىڭعايلى ءجۇرىپ-تۇرۋىن قامتاماسىز ەتۋ باستى پروبلەمالاردىڭ بىرىنە اينالىپ وتىر. بۇل رەتتە قالالىق جولاۋشىلار كولىگى جانە اۆتوموبيل جولدارى باسقارماسىنىڭ باستىعى راشيد امانجولوۆ دەپۋتاتتاردى وسى سالادا اتقارىلىپ جاتقان جۇمىستارمەن تانىستىردى.
«ەلوردا جولدارىنداعى جۇكتەمەنىڭ جوعارىلىعى وزدەرىڭىزگە ءمالىم» دەپ باستاعان باسقارما باستىعى ودان ءارى استانادا جالپى ۇزىندىعى 946 شاقىرىمدى قۇرايتىن 952 كوشە بارىن, سولاردىڭ جەتپىس پايىزعا جۋىعى اسفالتتالعانىمەن, قالعان 287 شاقىرىم جولعا تاس توسەلمەگەنىن ايتتى.
سۇبەلى ءسوز
قوعامدىق كولىكتەر تۋرالى ايتار بولساق, استانادا تاۋلىك بويى 669 مىڭ جولاۋشىنى تاسىمالدايتىن 8 اۆتوپارك, 941 اۆتوبۋس جۇمىس ىستەيدى ەكەن. دەگەنمەن, قوعامدىق كولىك قىزمەتىنە كوڭىلى تولمايتىندار قاتارى ازايماي وتىر. ماسەلەن, 2012 جىلى تۇرعىنداردان 1914, ال وتكەن جىلى 2524 ءوتىنىش-شاعىم تۇسسە, بىلتىر استانادا 254 جول-كولىك وقيعاسى تىركەلگەن.
سوڭعى التى جىلدا باس قالادا 406 اۆتوبۋس ساتىپ الىنىپتى. سوعان قاراماستان, قولدانىستاعى كولىكتەردىڭ 17 پايىزى توزعان, 14 جىلدان بەرى پايدالانىلىپ جۇرگەن ەسكى كولىكتەر كورىنەدى.
– جۇرگىزۋشىلەردىڭ تۇراقتاماۋى دا بۇل سالاداعى باستى پروبلەمالاردىڭ بىرىنەن سانالادى. قازىرگى تاڭدا قالاداعى كولىك كاسىپورىندارىنا ءالى دە 700 ادام جەتىسپەيدى. وسىعان وراي, ءبىز حالىقارالىق تاجىريبەنى زەرتتەدىك. سونىڭ ناتيجەسىندە, الداعى ۋاقىتتا كولىك جۇرگىزۋشىلەرىن وقىتۋ جانە بىلىكتىلىكتەرىن ارتتىرۋ جونىندەگى جاڭا ورتالىق قۇرىلادى, – دەدى راشيد امانجولوۆ. – ول نەگىزىنەن پسيحولوگيالىق ترەنينگتەردەن تۇرادى. ياعني, جۇرگىزۋشى سيمۋلياتورعا جىبەرىلمەس بۇرىن تەستىلەۋدەن وتەدى. سيمۋلياتورلار ساتىپ الىنادى. وقىتۋ باعدارلاماسى 80 ساعاتتى قۇرايدى. ونىڭ باسىم بولىگى ناق وسى پسيحولوگيالىق احۋالعا ارنالادى. ادام ءوزىن قالاي ۇستايدى؟ وعان اۆتوبۋسقا وتىرۋعا بولا ما, الدە, ول مەحانيك بولۋعا عانا جاراي ما؟ وسىنىڭ ءبارى تەكسەرىلەدى. اتالعان ورتالىق ءساۋىر ايىندا ءوز جۇمىسىن باستايدى.
ۇستىمىزدەگى جىلى اي سايىن 80 ادامدى وقىتۋ كوزدەلىپ وتىر.
سونىمەن بىرگە قالالىق جولاۋشىلار كولىگى جانە اۆتوموبيل جولدارى باسقارماسى باسشىسى سول جاعالاۋداعى ەسىل وزەنى بويىندا ورنالاسقان اكىمشىلىك ورتالىق پەن قوسشى تۇرعىن الابىنا جىلدام جەتۋ تۋرالى ەلوردالىقتاردىڭ وتىنىشىنەن كەيىن ۇستىمىزدەگى جىلدىڭ 5 ناۋرىزىنان باستاپ №52 جۇردەك مارشرۋتى ۇيىمداستىرىلعانىن, ونىڭ «ايماقارالىق اۋرۋحانا» – «لەسنايا پوليانا» تۇرعىن الابى اراسىندا قاتىنايتىنىن, دەي تۇرعانمەن الداعى ۋاقىتتا اۆتوبۋس باعىتتارى قالا تۇرعىندارىنا قولايلى بولۋى ءۇشىن قوزعالىس كەستەسى جۇيەلەنىپ, تاۋلىكتىڭ ءارتۇرلى ۋاقىتىنداعى كولىكتىك جۇكتەمە كورسەتكىشتەرىن جانە تاعى باسقالاردى ەسكەرە وتىرىپ, زاماناۋي كولىك مودەلىن ەنگىزۋ قولعا الىناتىنىن ايتتى. دەمەك, بۇعان دەيىن وتىز شاقىرىمعا دەيىنگى ارالىققا قاتىنايتىن اۆتوبۋستاردىڭ باعىتى ەندى ەكىگە ءبولىنىپ, ءار اۆتوبۋستىڭ 15 شاقىرىمعا قاتىناۋى كوزدەلۋدە. وسىنىڭ ناتيجەسىندە ەندى ءبىر عانا قوعامدىق كولىككە ءمىنىپ الىپ, قالانى تۇگەل ارالاپ شىعۋ مۇمكىن بولمايتىن سياقتى.
بيىل 350 جاڭا اۆتوبۋس ساتىپ الىنادى. سونداي-اق, «IVECO» كومپانياسىمەن جاسالىنعان كەلىسىمشارت نەگىزىندە ۇستىمىزدەگى جىلدىڭ مامىر ايىنان باستاپ بىرتىندەپ سۋ جاڭا اۆتوبۋستار كەلە باستايدى, ال 2017 جىلعا دەيىن جالپى سانى 850 اۆتوبۋس ساتىپ الىنادى.
گۇلبارشىن وكەشقىزى
