بۇگىن – مەملەكەتتىك رامىزدەر كۇنى. تاۋەلسىزدىك ۇعىمى تۋ ەتىلگەن قوعامدا مۇنداي مەرەكە اتاۋسىز قالمايتىنى انىق.
مەملەكەتتىك رامىزدەر تۋرالى ايتقاندا, ازاماتتاردىڭ ار-وجدانى مەن مادەنيەتى تۋرالى ويلار ورالا كەتەدى. تۋدى, ەلتاڭبانى, ءانۇراندى قالاي قاستەرلەپ ءجۇرمىز دەگەن سۇراق سانانى تورلايدى. وسىعان وراي استانا قالاسى ىشكى ساياسات باسقارماسى تالداۋ, مونيتورينگ جانە ادىستەمەلىك جۇمىس ءبولىمىنىڭ باسشىسى جاڭاباي مەيىرمانقۇلوۆپەن اڭگىمەلەسكەن بولاتىنبىز.
– استانا قالاسىندا مەملەكەتتىك رامىزدەر جونىندەگى كوميسسيا 2007 جىلدان بەرى جۇمىس ىستەپ كەلە جاتقانىن بىلەمىز. مەملەكەتتىك رامىزدەردىڭ قولدانىلۋىن تەكسەرۋ جيىلىگى قانداي؟
– استانا قالاسىنىڭ ىشكى ساياسات باسقارماسى اۋدان اكىمدىكتەرىمەن بىرلەسە وتىرىپ, قالا اۋماعىندا ايىنا ءبىر رەت تەكسەرۋ جۇرگىزەدى.
– بيىل مەملەكەتتىك رامىزدەردى قولدانۋ ماسەلەسى بويىنشا ەرەجە بۇزۋ فاكتىلەرى بايقالدى ما؟
– ءيا, 2013 جىلدىڭ 5 ايىنىڭ ناتيجەسى بويىنشا, شامامەن 30-دان استام فاكتى تىركەلدى. انىقتالعان كەمشىلىكتەر بويىنشا مەكەمەنىڭ ءبىرىنشى باسشىلارىنا رەسمي حات جولدانىپ, ولاردى جويۋ جونىندە جۇمىستار جۇرگىزىلدى.
– ايتسە دە, جالپىلاي ايتقاندا تۋدىڭ, ەلتاڭبانىڭ جونىمەن قولدانىلماۋى, ءانۇراندى قاتە ورىنداۋ سەكىلدى جاعدايلاردىڭ ورىن الىپ تۇراتىنى جاسىرىن ەمەس. وسىنداي وقيعالارعا بايلانىستى زاڭدارىمىزدا ناقتىلى جازا تۇرلەرى كورسەتىلگەن بە؟
– ءيا, قازىرگى زاڭدارىمىزدا بۇل ماسەلە تولىق قامتىلعان. «قازاقستان رەسپۋبليكاسىنىڭ مەملەكەتتىك تۋىن, قازاقستان رەسپۋبليكاسىنىڭ مەملەكەتتىك ەلتاڭباسىن جانە ولاردىڭ بەينەلەرىن زاڭسىز پايدالانۋ, سونداي-اق, قازاقستان رەسپۋبليكاسى زاڭناماسىنىڭ تالاپتارىن بۇزا وتىرىپ, قازاقستان رەسپۋبليكاسىنىڭ مەملەكەتتىك ءانۇرانىن پايدالانۋ جانە ورىنداۋ – ەكى ءجۇز ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى. مەملەكەتتىك رامىزدەردى پايدالانۋ مىندەتتى بولىپ تابىلاتىن جاعدايلاردا ولاردى پايدالانباۋ – لاۋازىمدى ادامدارعا ەكى ءجۇز ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى. وسى باپتىڭ ءبىرىنشى جانە ەكىنشى بولىكتەرىندە كوزدەلگەن, اكىمشىلىك جازا قولدانىلعاننان كەيىن ءبىر جىل ىشىندە قايتالاپ جاسالعان ارەكەتتەر – ءتورت ءجۇز ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى» دەپ شەگەلەپ جازىلعان.
– ال, مەملەكەتتىك رامىزدەر كۇنىن اتاپ وتۋگە قانشالىقتى كوڭىل ءبولىنىپ ءجۇر؟
– مەملەكەتتىك رامىزدەرىمىز – تاۋەلسىز ەلىمىزدىڭ باستى اتريبۋتتارىنان بولعاندىقتان, بۇل مەرەكە ءوز دەڭگەيىندە ءوتۋى كەرەك دەپ ويلايمىز. استانا قالاسىندا دا جىل سايىن بۇل كۇن ەسكەرۋسىز قالعان ەمەس.
– اتاپ ايتقاندا…
– مەملەكەتتىك رامىزدەر كۇنىنە وراي استانا قالاسى اكىمدىگىنىڭ ۇيىمداستىرۋمەن بۇگىن, ياعني, 2013 جىلدىڭ 4 ماۋسىم كۇنى ساعات 20:00-دە «اتامەكەن» ەتنو-مەموريالدىق كەشەنى اۋماعىندا ورنالاسقان باس مەملەكەتتىك تۋ اۋماعىندا «مەنىڭ قازاقستانىم! مەنىڭ استانام!» اتتى مەرەكەلىك شارا وتەدى. 5 ماۋسىم كۇنى «ۇلتتىق سانا-سەزىمدى قالىپتاستىرۋداعى قازاقستان رەسپۋبليكاسىنىڭ مەملەكەتتىك رامىزدەرىنىڭ ماڭىزدىلىعى مەن ماندىلىگى» تاقىرىبىندا كونفەرەنتسيا وتكىزۋ جوسپارلانىپ وتىر. سونىمەن قاتار, بارلىق مەكەمەلەردە ءبىر ۋاقىتتا ءانۇران ورىنداۋ ءراسىمى وتكىزىلەدى.
اڭگىمەلەسكەن, ءنازيرا بايىربەك
