كەشە ەلباسى نۇرسۇلتان نازارباەۆ قازاقستاندا رەسمي ساپارمەن جۇرگەن ەۋروپالىق كوميسسيانىڭ توراعاسى جوزە مانۋەل بارروزۋمەن كەزدەسۋ وتكىزدى. بۇل تۋرالى قازاقستان پرەزيدەنتىنىڭ ءباسپاسوز قىزمەتى حابارلادى.
كەزدەسۋدە ساياسي, ساۋدا-ەكونوميكالىق جانە مادەني-گۋمانيتارلىق ىنتىماقتاستىقتىڭ جاي-كۇيى مەن پەرسپەكتيۆالارىن قامتيتىن كەڭ اۋقىمدى ماسەلەلەر تالقىلاندى. بۇعان قوسا, تاراپتار حالىقارالىق كۇن تارتىبىنە, اتاپ ايتقاندا, ورتالىق ازياداعى احۋالعا نازار اۋداردى.
قازاقستان پرەزيدەنتى كەلىسسوزدەر بارىسىندا قازاقستان مەن ەۋروپا وداعى اراسىنداعى سەرىكتەستىك پەن ىنتىماقتاستىقتى ىلگەرىلەتۋ تۋرالى جاڭا كەلىسىمدى تەزدەتۋ تۋرالى ۋاعدالاستىققا قول جەتكىزىلگەنىن دە اتاپ ءوتتى.
– ءبىز ازاماتتارىمىزدىڭ بەلگىلى ءبىر ساناتى ءۇشىن ۆيزالىق رەجيمدى جەڭىلدەتۋ تۋرالى سويلەستىك. ەۋروپالىق مەملەكەتتەردەگى ءبىزدىڭ اۆياكومپانيالاردىڭ ەركىن ۇشۋىنا مۇمكىندىك بەرۋ ماسەلەسىن قوزعادىق. ەۋرووداق تاراپىنان قازاقستاننىڭ دۇنيەجۇزىلىك ساۋدا ۇيىمىنا كىرۋ ۇدەرىسىنە قولداۋ كورسەتۋ تۋرالى دا ءسوز بولدى. بارلىق وسى ماسەلەلەر جونىندە ءبىزدىڭ پىكىرىمىز ورتاق, ءبىز قولداۋعا يە بولدىق, بۇل ءۇشىن مەن ج.م.بارروزۋعا ريزاشىلىعىمدى بىلدىرەمىن, – دەدى نۇرسۇلتان نازارباەۆ.
– ءبىز ىنتىماقتاستىق اياسىن كەڭەيتۋ تۋرالى جاڭا كەلىسىمدى قابىلداۋ ءجونىندە كەلىسسوزدەردى اياقتاۋ ارقىلى ءوزىمىزدىڭ قارىم-قاتىناسىمىزدىڭ جاڭا كەزەڭىن اشۋ نيەتىندەمىز. بۇل قۇجات اناعۇرلىم كەشەندى ىنتىماقتاستىققا باعىتتالعان. ەۋروپا وداعى الداعى ۋاقىتتا دا ءوزارا ورتاق مۇددەنى ءبىلدىرەتىن بارلىق سالاداعى سەرىكتەستىك اياسىن كەڭەيتۋگە قولۇشىن بەرۋ نيەتىندە. سەرىكتەستىك مەن ىنتىماقتاستىقتى ىلگەرىلەتۋ تۋرالى كەلىسىم قازىر سەرپىن الىپ وتىرعان ءبىزدىڭ قارىم-قاتىناسىمىزدى ودان ءارى جەدەلدەتۋگە بەرىك نەگىز قالايدى. شىن مانىندە دە ەو قازاقستاننىڭ ەڭ ءىرى ساۋدا سەرىكتەستەرىنىڭ ءبىرى بولىپ سانالادى, ەلىمىزدىڭ تاۋار اينالىمىنىڭ جالپى كولەمىنىڭ 45 پايىزعا جۋىعى ونىڭ ۇلەسىنە تيەدى, ال, ەكىجاقتى ساۋدا دەڭگەيى 31 ميلليارد ەۋرونى قۇرايدى. جانە ەۋروپاداعى كۇردەلى جاعدايعا قاراماستان, سوڭعى جىلدارى تاراپتار اراسىندا تاۋار اينالىمىنىڭ جەدەل ءوسىپ وتىرعانى بايقالۋدا, – دەدى ج.بارروزۋ.
ەۋروپالىق كوميسسيا توراعاسى قازاقستاننىڭ ورتالىق ازيادا وڭىرلىك ىنتىماقتاستىقتى ىلگەرىلەتۋدەگى, اتاپ ايتقاندا, ەكسترەميزم, تەرروريزم, ەسىرتكى تاسىمالى, سۋ رەسۋرستارىن باسقارۋ پروبلەمالارىن ءبىرلەسىپ شەشۋدەگى جوعارى ءرولىن اتاپ ءوتتى. ءسوزىنىڭ سوڭىندا ج.م.بارروزۋ قازاقستان باسشىسىنا ءححى عاسىرداعى سەنىمدى سەرىكتەستىككە نەگىز قالايتىن مازمۇندى جانە ناتيجەلى ديالوگ وتكىزگەنى ءۇشىن العىسىن ايتتى.
ەركەجان ساتىمبەك
