كۇننىڭ كۇرت ىسىپ كەتۋى استانا تۇرعىندارىن تاڭعالدىرىپ تاستاعانى راس. مۇنداي جايماشۋاق اۋا رايى ۇزاققا ساقتالا ما دەگەن ساۋالمەن «قازگيدرومەت» ورتالىعىنا حابارلاستىق. ءبىزدىڭ سۇراعىمىزعا اتالعان مەكەمەدەگى اۋا رايىن قىسقا مەرزىمگە بولجاۋ باسقارماسىنىڭ باسشىسى ارداق كالمەنوۆا جاۋاپ بەردى.
– بۇگىن تەمپەراتۋرا 27 گرادۋسقا دەيىن كوتەرىلەدى. جەل دە تىنىق. ەسەسىنە ەرتەڭ جاڭبىر جاۋى مۇمكىن. كۇندىز +14, تۇندە +11 گرادۋس. شىعىستان سوققان جەلدىڭ جىلدامدىعى سەكۋندىنا 15-20 مەترگە دەيىن جەتۋى ىقتيمال. ال دۇيسەنبىدە جاۋىن-شاشىن مولشەرى ارتىپ, كۇن سالقىندايدى. سەيسەنبى, ءسارسەنبى كۇندەرى تۇنگى اۋا تەمپەراتۋراسى 0 گرادۋسقا دەيىن تومەندەيدى دەپ كۇتىلۋدە. بىراق اپتانىڭ ەكىنشى جارتىسىندا اۋا رايى قولايلى قالىپقا كوشىپ, جەل ازايادى, – دەيدى مامان.
بوتاگوز ماراتقىزى
