باتىس قازاقستان وبلىستىق كامەرالىق وركەسترى مۋزىكالىق جاس كورەرمەندەر تەاترى ساحناسىندا استانالىق كورەرمەندەرگە «ەلورداعا اق جايىقتان سالەم» اتتى كونتسەرت باعدارلاماسىن ۇسىندى. شارا رەسپۋبليكا كۇنى جانە استانا قالاسىنىڭ 25 جىلدىعى اياسىندا ءوتتى.
وركەستر ديرەكتورى سالتانات ابۋلگازيەۆانىڭ ايتۋىنشا, بۇل گاسترولدىك ساپار وسىدان 2 جىل بۇرىن, وركەستردىڭ 10 جىلدىعىنا وراي جوسپارلانىپتى. الايدا پاندەميا سالدارىنان كەيىنگە شەگەرىلگەن ەكەن. ۇجىمدا 20 ونەرپاز بار. ولار: ەلىمىز بەن كورشى رەسەيدىڭ بەلگىلى مۋزىكالىق جوعارى وقۋ ورىندارىنىڭ تۇلەكتەرى, جاس مۋزىكانتتار. اراسىندا يتاليانىڭ پەزارو قالاسىنداعى وپەرا ستۋدياسىندا ءدارىس العان ونەرپازدار دا كەزدەسەدى. وركەستر رەپەرتۋارىندا 400-دەن استام تۋىندى بار. وبلىستىق كامەرالىق وركەستر – اقجايىقتا بوي كوتەرگەن جەكە دارا ماتەريالدىق بازاسى بار مەكەمە. وركەستر تاريحى 2004 جىلدان باستالادى. قازاقستاننىڭ ەڭبەك سىڭىرگەن قايراتكەرى مارات بيسەنعاليەۆتىڭ باستاماسىمەن وركەستردىڭ جەكە عيماراتى, جالپى ماتەريالدىق بازاسى قالىپتاستى. كەيىن 2011 جىلى وبلىس اكىمىنىڭ قولداۋىمەن قايتا جاساقتالدى. وركەستر قۇرىلعالى بەرى, ەل ىشىنەن بولەك, حالىقارالىق دەڭگەيدە ونەر كورسەتىپ, ۇلتتىق مۋزىكامىزدى وزگە ەلگە تانىستىرىپ كەلەدى. ول ەلىمىزدەگى ىرگەلى ونەر ۇجىمدارىنىڭ بىرقاتارىمەن ىنتىماقتاستىق مەموراندۋمىنا قول قويعان. سونىڭ ارقاسىندا شىعارماشىلىق جانە گاسترولدىك ساپارلار كەزىندە رەسپۋبليكاعا تانىمال ونەرپازداردى قاتىستىرىپ, ءوزارا ءتالىم-تاجىريبە الماسۋدى جولعا قويعان. ماسەلەن, كامەرالىق وركەستردىڭ كوركەمدىك جەتەكشىسى اسحات حاسانوۆ العاش رەت كوللابوراتسيالىق جۇمىستى قولعا الىپ, حالقىمىزدىڭ ءىنجۋ-مارجانى سانالاتىن كۇيلەرى مەن حالىق اندەرىن نوتاعا ءتۇسىرىپ, وركەستر قۇرامىنا دومبىرا, قوبىز اسپاپتارىن قوسىپ, كاحون, گيتارا, باس-گيتارا اسپاپتارىنىڭ سينتەزىن قۇراعان. تەاتر رەجيسسەرى گاۋھار ادايمەن جانە ابستراكت باعىتىنداعى سۋرەتشى گۇلدانا الينامەن بىرلەسكەن جۇمىس ناتيجەسىندە كامەرالىق وركەستر پەرفورمانس باعىتىندا ەكى بىردەي بەينەبايان تۇسىرگەن.
زارينا سارسەنبايقىزى
