كەشە نۇر-سۇلتان قالاسىندا Astana Club V ءماجىلىسى جۇمىسىن باستادى. ءبىرىنشى كۇنگى سەسسيانى قر پارلامەنتى سەناتىنىڭ سپيكەرى داريعا نازارباەۆا اشتى. «ەۋرازيا-2020: باستى 10 سىن-قاتەر» تاۋەكەلدەر رەيتينگىسىنىڭ ەكىنشى باسىلىمى تانىستىرىلدى.
بۇل دەرەكتى باسىلىمدى زەرتتەۋ جۇمىسىنا ءىرى باق پەن حالىقارالىق ينستيتۋتتار جانە مەملەكەت كوشباسشىلارى پىكىرىنە قۇلاق اساتىن 40-قا جۋىق ساراپشى مەن ساياساتكەرلەر قاتىسقان. بۇدان ءبولەك, 70 ەلدەن 1100-دەن اسا كاسىبي ماماندار ساۋالناماعا تارتىلعان.
نەگىزگى مالىمەتتەر بويىنشا, باستى سىن-قاتەرلەر قاتارىنا ساۋدا سوعىسى, زىمىران-يادرولىق جارىسى, جاڭا تەحنولوگيالار سالاسىندا باسىپ وزۋ كۇرەستەرى كورسەتىلگەن. الەمنىڭ جەتەكشى دەرجاۆاسى اقش-تىڭ ساياسي دامۋىنداعى بەلگىسىزدىك بۇكىل ەۋرازيا ءۇشىن ەلەۋلى سىن-قاتەرگە اينالۋى مۇمكىن. جاھاندىق ەكونوميكالىق قۇلدىراۋ دامۋشى ەلدەرگە ەكونوميكالىق تۇرعىدان اسەر ەتۋى ايتىلادى. ماسەلەن, اقش پەن قىتاي تەكەتىرەسىنىڭ ۋشىعۋى بىلتىرعى رەيتينگتە دە كوش باستاعان ەدى. بۇل ماسەلە 2020 جىلى دا وزەكتى بولىپ قالا بەرەتىنى بولجانادى.
تەرروريزمنىڭ جاڭا تولقىنى دايش-تىڭ تالقاندالعانىنا قاراماستان, تەرروريستىك توپتار دامۋىن توقتاتپاي, ارەكەت ەتۋ اۋقىمىن كەڭەيتۋدە. بۇل دا قاۋىپ-قاتەردىڭ وشاعى بولا بەرمەك.
كليماتتىڭ وزگەرۋىنەن تۋىندايتىن اۋقىمدى ماسەلەلەر دە ەۋرازيانى اينالىپ وتپەيدى. ءىرى دەرجاۆالار اراسىنداعى كيكىلجىڭدەر مەن كەلىسپەۋشىلىكتەر 2020 جىلى كليماتتىڭ وزگەرۋىنە قارسى كۇرەستى تۇبەگەيلى توقتاتۋ قاۋپىن تۋدىرىپ وتىر. بۇل باسقا مەملەكەتتەردىڭ ۇلتتىق مۇددەنى جەلەۋ ەتكەن وزىمشىلدىك ساياساتىن جۇرگىزۋىن جەڭىلدەتەدى دەپ تە ايتىلىپ وتىر.
اstana Club ءماجىلىسى بۇگىن دە جالعاسادى. «نازارباەۆ ورتالىعىندا» الەمنىڭ جەتەكشى ديپلوماتتارى مەن ساياساتكەرلەرىنىڭ جانە ساراپشىلارىنىڭ باسىن بىرىكتىرگەن مەرەيلى بەسىنشى وتىرىسىنىڭ تاقىرىبى «ۇلكەن ەۋرازيا: جاھاندىق ىنتىماقتاستىقتىڭ جاڭا قۇرىلىمى جولىندا» دەپ اتالادى. كەزەكتى باسقوسۋعا الەمنىڭ 23 مەملەكەتىنەن حالىقارالىق ساراپشىلار رەتىندە مويىندالعان 50-دەن اسا حالىقارالىق سپيكەر قاتىسۋدا. قۇرمەتتى مەيمانداردىڭ قاتارىندا 3 بۇرىنعى مەملەكەت باسشىسى, 5 ەكس-پرەمەر-مينيستر, 10 مينيستر جانە 1 نوبەل سىيلىعىنىڭ لاۋرەاتى بار.
«استانا كلۋبى» وتىرىستارىنىڭ ءبىر بولىگى «Chatham house» ەرەجەلەرىنە سايكەس وتەدى. بۇل تالقىلاۋدىڭ جابىق سيپاتتا ءوتۋىن ساقتايدى جانە ەۋرازيا مەن الەمنىڭ ەڭ وزەكتى ماسەلەلەرىنىڭ وتكىر ءارى اشىق تالقىلانۋىنا مۇمكىندىك بەرەدى.
