«استانا» – التى دۇركىن چەمپيون

جەكسەنبى كۇنى فۋتبولدان قازاقستان چەمپيوناتى مارەسىنە جەتتى. «استانا» التىنشى مارتە قاتارىنان ەل چەمپيونى اتاعىن جەڭىپ الدى.ۇلتتىق بىرىنشىلىك اياقتالماي-اق جەڭىمپاز اتانىپ ۇلگەرگەن «استانا» سوڭعى ويىندى ءوز جانكۇيەرلەرى الدىندا وتكىزىپ, وكىنىشكە قاراي, «ەرتىس» كومانداسىنان 0:2 ەسەبىمەن ۇتىلىپ قالدى. بۇل ويىننىڭ تۋرنير كەستەسىنە ەشقانداي وزگەرىس اكەلمەيتىنى اسەر ەتتى مە, ايتەۋىر, استانالىقتار قارسىلىق كورسەتۋگە دارمەن تانىتپادى.
ماتچتان كەيىن ەل چەمپيونىن ماراپاتتاۋ ءراسىمى ءوتتى. قازاقستان فۋتبول فەدەراتسيا­سىنىڭ باس حاتشىسى ازامات ايتحوجين مەن قازاقستان كاسىپقوي فۋتبول ليگاسىنىڭ باسشىسى ولجاس ابراەۆ «استانا» كومانداسىنا چەمپيوندىق «التىن تاباق» جۇلدەسىن تابىس ەتتى.«استانا» الداعى جىلى ۋەفا چەمپيوندار ليگاسىندا, ال كۇمىس جۇلدەگەر «قايرات», قولا جۇلدەگەر «ورداباسى» جانە قازاقستان كۋبوگىنىڭ جەڭىمپازى «قايسار» ەۋروپا ليگاسىندا ەل نامىسىن قورعايتىن بولدى.
قازاقستان چەمپيوناتى پرەمەر-ليگاسىنىڭ بومبارديرلەرى بولىپ قارسىلاستار قاقپاسىنا 19 گولدان سوققان مارين توماسوۆ («استانا») پەن ادەرينسولا ەسەولا («قايرات») تانىلدى.پرەمەر-ليگانىڭ سوڭعى ورنىندا قالعان «اقتوبە» مەن ون ءبىرىنشى ورىنمەن شەكتەلگەن «اتىراۋ» كەلەسى جىلى ءبىرىنشى ليگادا وينايتىن بولادى. ءبىرىنشى ليگا چەمپيونى اتانعان «قىزىلجار» (پەتروپاۆل) مەن ەكىنشى ورىن العان «كاسپي» (اقتاۋ) پرەمەر-ليگاعا كوتەرىلدى. ال پرەمەر-ليگا­نى ونىنشى ورىنمەن اياقتاعان «تاراز» بەن ءبىرىنشى ليگادا قولا جۇلدەگەر بولعان «اقجايىق» (ورال) پلەي-وفف ويىندارىندا جوعارى ليگادا ويناۋ ءۇشىن تالاسادى.
سونىمەن ەل چەمپيوناتى مارەسىنە جەتتى. الايدا «استانا» ءۇشىن فۋتبول ماۋسىمى ءالى اياقتالعان جوق. 28 قاراشا كۇنى ەلوردالىقتار ۋەفا ەۋروپا ليگاسىنىڭ توپتىق ءتۋرنيرى اياسىندا «مانچەستەر يۋنايتەد» كومانداسىن قابىلدايدى.