ەلوردادا Routes Silk Road 2019 حالىقارالىق فورۋمى باستالدى. ءۇش كۇنگە سوزىلاتىن اۋقىمدى ءىس-شارادا تىكە اۋە باعىتتارىن ىسكە قوسۋ, ترانزيتتىك جولاۋشىلار اعىنىن ارتتىرۋ, قىزمەت كورسەتۋ ساپاسىن جاقسارتۋ سەكىلدى ماسەلەلەر تالقىلانادى.
اتالعان جيىنعا اۋە نارىعىنا قاتىسى بار جەرگىلىكتى جانە شەتەلدىك كومپانيالاردان, مەملەكەتتىك ورگانداردان, سونداي-اق قارجىلىق ينستيتۋتتاردان 250-گە تارتا وكىل قاتىسۋدا. سولاردىڭ ءبىرى ازاماتتىق اۆياتسيا كوميتەتىنىڭ توراعاسى تالعات لاستاەۆ:
– بۇگىندە قازاقستاننان 27 مەملەكەتكە 98 اۋە باعىتى بويىنشا 500-دەي رەيس بار. بۇل كورسەتكىش ءوسۋ ۇستىندە. تەك بيىلدىڭ وزىندە نۇر-سۇلتان – پراگا, نۇر-سۇلتان – ۇلان-باتىر, نۇر-سۇلتان – توكيو سەكىلدى جاڭا باعىتتار اشىلدى, – دەيدى.
سوڭعى 7 جىلدا ءبىزدىڭ ەلىمىز ارقىلى قاتىنايتىن ترانزيتتىك جولاۋشىلار اعىنى 20 ەسەدەي وسكەن. قازىرگى تاڭدا ول جىلىنا 900 مىڭنان اسا ادامدى قۇرايدى.
