جەكسەنبى كۇنى ەلوردادا ترياتلوننان IRONMAN 70.3 ASTANA حالىقارالىق ءتۋرنيرى ءوتتى. 50 مەملەكەت وكىلى قاتىسقان ايتۋلى شارانى قازاقستان پرەمەر-ءمينيسترى اسقار مامين جانە نۇر-سۇلتان قالاسىنىڭ اكىمى التاي كولگىنوۆ اشىپ, جارىسقا جينالعاندارعا ساتتىلىك تىلەدى.
تۋرنيرگە الەمنىڭ 50 مەملەكەتىنەن 1400-دەن استام ادام قاتىستى. ءۇش كەزەڭنەن تۇرعان سايىستا ءبىرىنشى جانە ەكىنشى كەزەڭدەردە قاتىسۋشىلار 2 شاقىرىمدى سۋمەن ءجۇزىپ, 90 شاقىرىمدى ۆەلوسيپەدپەن ءجۇرىپ ءوتتى. سوڭعى كەزەڭدە 21 شاقىرىم قاشىقتىققا جۇگىردى. قالا باسشىسى وسى ءۇشىنشى كەزەڭگە قوسىلدى.
«مۇنداي xالىقارالىق جارىستاردىڭ ەلوردادا ءوتۋى سپورتقا دەگەن كوزقاراسىمىزدى جاڭا دارەجەگە كوتەرەتىنى ءسوزسىز. تۋريستەر مەن ينۆەستيتسيانىڭ قالاعا اعىلۋىنا ىقپالىن تيگىزەدى. اسىرەسە, جاستاردىڭ بۇقارالىق سپورتقا دەگەن قىزىعۋشىلىعىن ارتتىرادى» دەدى ا.كولگىنوۆ.
شىنىمەن, جارىسقا ءار ەلدەن ارنايى ليتسەنزياسى بار كاسىبي ترياتلونشىلار جينالدى. ولاردىڭ اراسىندا Tim Don, Radka Kahlefeldt, Nils Fromhold, دانيل ساپۋنوۆ, الەكسەي كاليستراتوۆ سىندى سپورتشىلار بولدى. قاتىسۋشىلاردىڭ ەڭ ەگدەسى جاپونيادان كەلگەن 78 جاسار جەلاياق دايىندىعىن كورسەتتى.
ءتۋرنيردى ءتيىمدى ۇيىمداستىرۋ ماقساتىندا قالا قوناقتارىنا جانە سپورتشىلارعا جاردەمدەسكەن, شەتەلدىكتەرمەن جۇمىس ىستەۋدە ۇلكەن تاجىريبەگە يە ەرىكتىلەر تارتىلدى. سونداي-اق ءىس-شارا بارىسىندا الەمدىك برەندتەردىڭ سپورتتىق EXPO جارمەڭكەسى ۇيىمداستىرىلدى.
