استاناداعى جاڭا ورتالىقتىڭ اشىلۋ سالتاناتىنا سەناتور قۋانىش سۇلتانوۆ, مەملەكەت جانە قوعام قايراتكەرى ولجاس سۇلەيمەنوۆ, قر دەنساۋلىق جانە الەۋمەتتىك دامۋ ءمينيسترىنىڭ ءبىرىنشى ورىنباسارى ساليدات قايىربەكوۆا, استانا قالاسى اكىمىنىڭ ورىنباسارى ەرمەك امانشاەۆ, مەملەكەتتىك جانە قوعامدىق ۇيىمداردىڭ وكىلدەرى, اتا-انالار قاتىستى.
– بۇگىنگى تاڭداعى مالىمەتتەرگە سۇيەنسەك, رەسپۋبليكا بويىنشا اۋتيزم اۋرۋىنا شالدىققان بالالاردىڭ سانى كوبەيە تۇسكەن. سوندىقتان دا وسىنداي ورتالىقتاردىڭ اشىلعانى وتە ورىندى ەكەنىن اتاپ ايتقىم كەلەدى. ارينە, بۇل رەتتە وسى ورتالىقتاردى اشۋدى ويلاستىرعان ءارى ونى جۇزەگە اسىرىپ وتىرعان «اسىل ميراس» قايىرىمدىلىق قورىنا, ونىڭ قۇرىلتايشىسى – بەلگىلى مەتسەنات بولات وتەمۇراتوۆقا العىس ايتۋعا ءتيىسپىز. باستىسى – بۇل قايىرىمدى ءىس ەلدىڭ يگىلىگىنە باعىتتالىپ وتىر. ۇلت دەنساۋلىعى نىعايسا, مەملەكەتتىڭ دە بەدەلى مەن قۋاتى كۇشتى بولادى, – دەدى سەناتور قۋانىش سۇلتانوۆ.
استانادا اشىلعان اۋتيزم ورتالىعى كوپ فۋنكتسيونالدى قىزمەت اتقارادى. مۇنداعى ەمدەۋ شارالارى ءۇش باعىتتا جۇرگىزىلەدى. اتاپ ايتقاندا, كەشەندى دياگنوستيكالىق ايقىنداۋ, سودان كەيىن وڭالتۋ-كوررەكتسيالىق شارالارى قولعا الىنادى. سونىمەن قاتار اتالمىش دەرتكە قاتىستى كەشەندى اقپاراتتىق جۇمىستار اتقارىلادى.
«اسىل ميراس» قورىنىڭ قامقورشىلار كەڭەسىنىڭ مۇشەسى, اتاقتى اقىن و. سۇلەيمەنوۆ وسىنداي ورتالىقتىڭ جاقىندا الماتى قالاسىندا دا اشىلعانىن, الداعى جىلى قىزىلوردا جانە وسكەمەن قالالارىندا اشىلاتىنى كوزدەلىپ وتىرعانىن ايتىپ, وتەمۇراتوۆتىڭ يگى باستاماسىن باسقا دا كاسىپكەرلەر قولداسا دەگەن تىلەگىن جەتكىزدى.
بۇگىنگى شارانى وتە ماڭىزدى ۋاقيعا رەتىندە باعالايمىن. اۋتيزم – ەرەكشە دەرت. ءبىزدىڭ ەلوردامىزدا وسى دەرتكە شالدىققان 200-گە جۋىق بالا بار. ەندى ولاردى وڭالتۋ جەڭىلدەيتىن بولىپ وتىر. سوندىقتان, وسىنداي ورتالىقتى اشىپ وتىرعان «اسىل ميراس» قايىرىمدىلىق قورىنا ريزاشىلىعىمىزدى جەتكىزەمىز. ءبىز ءوز تاراپىمىزدان قولداۋ كورسەتۋگە ءازىرمىز, – دەدى ەرمەك امانشاەۆ.
اتا-انالار مەن بالالاردىڭ يگىلىگى ءۇشىن اشىلعان استانالىق اۋتيزم ورتالىعىنا وتىنىشتەر قابىلداۋ باستالدى.
عالىم قوجابەكوۆ
