نۇر-سۇلتان قالاسىندا دزيۋدو كۇرەسىنەن ءوتىپ جاتقان ازيا چەمپيوناتىندا قازاقستاندىق دزيۋدوشى دانيار شامشاەۆ التىن مەدال جەڭىپ الدى.
73 كەلى سالماقتا سىنعا تۇسكەن وتانداسىمىز فينالدا وزبەكستان بالۋانى مۋرودجون يۋلداشەۆتى دزيۋدونىڭ ەڭ ادەمى ءادىسى – «يپپونعا» ءتۇسىردى.
ازىرگە ەكى كۇننىڭ ناتيجەسىندە قازاقستان قۇراماسىنىڭ قورجىنىنا ءبىر التىن, ءبىر كۇمىس جانە ەكى قولا مەدال ءتۇستى. چەمپيونات بۇگىن جانە ەرتەڭ دە جالعاسادى.
ەلورداداعى جاقسىلىق ۇشكەمپىروۆ اتىنداعى «جەكپە-جەك» سارايىندا دزيۋدودان ەرلەر مەن ايەلدەر اراسىندا ازيا چەمپيوناتى ءوتىپ جاتىر. قۇرلىق بىرىنشىلىگىنە 19 ەلدەن 200-گە جۋىق دزيۋدوشى كەلدى. ازيانىڭ ەڭ مىقتى بالۋاندارى ءتورت كۇن بويى جەكەلەي جانە ارالاس-كوماندالىق جارىستاردا جەڭىمپازداردى انىقتايتىن بولادى.
بايراقتى باسەكەنىڭ سالتاناتتى اشىلۋ راسىمىنە نۇر-سۇلتان قالاسىنىڭ اكىمى التاي كولگىنوۆ, مادەنيەت جانە سپورت ۆيتسە-ءمينيسترى سەرىك جاراسباەۆ, ازيا دزيۋدو وداعىنىڭ پرەزيدەنتى وبايد ءال انزي, قازاقستان دزيۋدو فەدەراتسياسى پرەزيدەنتىنىڭ مىندەتىن اتقارۋشى اسحات جيتكەەۆ جانە قازاقستان ۇلتتىق وليمپيادالىق كوميتەتىنىڭ باس ديرەكتورى سەرىك قاسقاباسوۆ قاتىستىپ, جارىسقا قاتىسۋشىلارعا ساتتىلىك تىلەدى.
«قۇرمەتتى سپورتشىلار جانە جارىس قوناقتارى نۇر-سۇلتان قالاسىنا قوش كەلدىڭىزدەر! دزيۋدودان ازيا چەمپيوناتى ەلوردامىزدىڭ تاريحىندا ءبىرىنشى رەت ءوتىپ وتىر. دزيۋدو جارىسىنىڭ ءوتۋى سپورتشىلارىمىز ءۇشىن ماڭىزدى. ويتكەنى, وسىنداي جارىستار سپورتشىلاردى شىڭداۋعا مۇمكىندىك بەرەدى. سپورتشىلارعا ساتتىلىك تىلەيمىن! ال ەلىمىزدىڭ دزيۋدوشىلارىنا جوعارى جەتىستىك تىلەي وتىرا, وسى ازيا چەمپيوناتىندا ەلىمىزدىڭ تۋىن بيىككە كوتەرىپ, ءانۇرانىمىزدى شىرقاتۋلارىڭىزعا تىلەكتەسپىن! ەڭ مىقتىلار جەڭىسكە جەتسىن!» دەدى نۇر-سۇلتان قالاسىنىڭ اكىمى التاي كولگىنوۆ جارىستىڭ اشىلۋ سالتاناتىندا.
ازيا دزيۋدو وداعىنىڭ پرەزيدەنتى وبايد ءال-انزي سپورتشىلار مەن جانكۇيەرلەرگە ءىلتيپات تانىتىپ, قۇرمەتتى قوناقتارعا ەستەلىك سىيلىقتار تابىستادى. جارىستى ۇيىمداستىرۋشىلارعا العىسىن ءبىلدىردى. سونىمەن قاتار قازاقستان ۇلتتىق وليمپيادالىق كوميتەتىنىڭ اتىنان قازاقستانداعى وليمپيادالىق قوزعالىسقا وراسان زور ۇلەس قوسقانى ءۇشىن ازيا دزيۋدو وداعىنىڭ پرەزيدەنتى وبايد ءال-انزي ارنايى توسبەلگىمەن ماراپاتتالدى.
ازيا چەمپيوناتىندا قازاقستان نامىسىن ۇلتتىق قۇراما ساپىنداعى 18 سپورتشى قورعايدى. ولاردىڭ اراسىندا وليمپيادا چەمپيوندارى مەن الەم بىرىنشىلىكتەرىنىڭ جۇلدەگەرلەرى دە بار.
IJF ەرەجەلەرى بويىنشا ازيا چەمپيوناتىنىڭ مەدال يەگەرلەرىنە وليمپيادالىق رەيتينگتە ۇپايلار قوسىلاتىن بولادى. اتاپ ايتقاندا, جەڭىمپاز 700 ۇپاي, كۇمىس جۇلدەگەر – 490 جانە قولا جۇلدە – 350 ۇپاي الادى.
ال, چەمپيوناتتىڭ العاشقى ەكى كۇنىندەگى كورسەتكىشتەرگە كەلسەك, قازاق جانكۇيەرلەرىن قۋانىشقا بولەدى دەپ ايتا الامىز. اتاپ ايتقاندا, ايەلدەر كۇرەسىندە ابيبا ابۋجاقىنوۆا (48 كەلى) كۇمىس جۇلدەگەر اتانسا, ەرلەر باسەكەسىندە ماعجان شامشادين (60 كەلى) مەن عۇسمان قىعىزباەۆ (66 كەلى) قوس قولانى قورجىنعا سالدى.
ازيا چەمپيوناتى كورەرمەندەر ءۇشىن «Qazsport» ارناسىنان دا كورسەتىلەدى.
