استانا قالالىق اكىمدىگى تۇرعىنداردىڭ ۇيدەگى كوڭىل-كۇيى بازاردا بۇزىلماۋى ءۇشىن باعا ساياساتىنا باسا نازار اۋدارىپ وتىر. سول سەبەپتەن قالانىڭ كوپ جەرىندە قازىرگى ۋاقىتتا ازىق-تۇلىك جارمەڭكەسى وتكىزىلەدى. ونىڭ ۇستىنە وتكەن اپتادان باستاپ وڭىرلەردەگى اۋىل شارۋاشىلىعى ءونىمىن وندىرۋشىلەردىڭ جارمەڭكەسى باستالدى. مۇنداعى ازىق-تۇلىك باعاسى بازارداعىدان ورتاشا ەسەپپەن العاندا 15-20 پايىزعا ارزان.
وتكەن سەنبى-جەكسەنبى كۇندەرى قىزىلوردا وبلىسىنىڭ اۋىل شارۋاشىلىعى ءونىمىن وندىرۋشىلەر استانالىقتارعا ءسابىزدىڭ ءبىر كەلىسىن 65 تەڭگەدەن, قىرىققاباتتى – 55, جۇمىرتقانى –180, تاۋىق ەتىن – 500-550, كۇرىش – 160, پياز – 70, كارتوپ – 50, قىزىلشا – 70, جىلقى ەتىن 1200 تەڭگەدەن ۇسىندى. ەندى وسى باعالاردى ەلورداداعى ساۋدا نۇكتەلەرىندەگى ازىق-تۇلىك قۇنىمەن سالىستىرىپ كورەلىك. ماسەلەن, «استانالىق بازاردا» كارتوپتىڭ باعاسى 60-80 تەڭگە بولسا, ءسابىزدىڭ دە ءبىر كەلىسى وسى مولشەردە ساتىلادى. دۇرىسىنا كەلسەك, ساپاسى جاقسى, ءىرىپ-شىرىگەن جەرى جوق كارتوپتىڭ باعاسى ەلوردا بازارلارىندا نەگىزىنەن 80 تەڭگە شاماسىندا بولسا, «استىقجان», «5 مينۋت» سۋپەرماركەتتەرىندە 80-89 تەڭگە توڭىرەگىنە تۇراقتايدى. ال ارنايى ۇيىمداستىرىلىپ جاتقان جارمەڭكەلەردە ەڭ ساپالى كارتوپتىڭ باعاسى 50 تەڭگەدەن اسپايدى. ءسابىزدىڭ باعاسىن دا وسىلاي ساراپتار ەدىك. جۇمىرتقانىڭ 10 داناسىن «استانالىق بازاردان» 190-230 تەڭگە شاماسىندا ساتىپ الساڭىز, «انۆار», «5 مينۋت» سياقتى سۋپەرماركەتتەردەن 319-379 تەڭگەدەن ارزانىن كەزدەستىرمەيسىز. پيازدىڭ باعاسى كەيبىر سۋپەرماركەتتەردى 80-100 تەڭگەگە دەيىن بارادى. كۇرىشتىڭ كەلىسى قالاداعى ەڭ ارزان بازار «شاپاعاتتىڭ» وزىندە 180 تەڭگەدەن ساتىلسا, باسقا ساۋدا ۇيلەرىندە 200-256 تەڭگەدەن ساتىلادى, ال «رامستور» سۋپەرماركەتىندە, ءتىپتى, 403 تەڭگەدەن تومەنى كەزدەسپەيدى. جالپى, ەلوردا بويىنشا «رامستور» سۋپەرماركەتىندە بارلىق ازىق-تۇلىك باعاسى باسقا جەرلەردەن ءبىرشاما قىمبات ەكەنىن ايتا كەتكەن ءجون. ال ەڭ ارزان باعا – قالالىق اكىمدىك ۇيىمداستىرىپ وتىرعان ازىق-تۇلىك جارمەڭكەلەرىندە جانە «شاپاعات» كوممۋنالدىق بازارىندا. سوندىقتان بۇل جاقتارعا بارعاندا ءبىر سومكە ەمەس, بىرنەشە قاپتى قولتىقتاي كەتكەن دۇرىس بولادى.
مەڭدوللا نۇرىمۇلى
