كەشە «داۋلەت» سپورت سارايىندا قر سپورت جانە دەنە شىنىقتىرۋ ىستەرى اگەنتتىگى, سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى, قازاقستان كۇرەس فەدەراتسياسى, استانا قالاسى اكىمدىگىنىڭ ۇيىمداستىرۋىمەن گرەك-ريم كۇرەسىنەن قازاقستان رەسپۋبليكاسى پرەزيدەنتىنىڭ كۋبوگىنىڭ كەزەكتى جارىسى ءوز جالاۋىن كوتەردى.
رەسەي, بەلارۋس, ۋكراينا, وزبەكستان, قىرعىزستان, تاجىكستان, مىسىر, نيگەريا جانە قازاقستاننىڭ سپورتشىلارى ەكى كۇن بويى بوز كىلەمدە شىن مىقتىنى انىقتايدى.
حالىقارالىق ساناتتاعى بۇل سايىستىڭ وتكىزىلىپ وتىرعانىنا بيىل – ءتورتىنشى جىل. 2010 جىلى كوماندالىق جارىس رەتىندە باستاۋ العان تۋرنيردە جالپى ەسەپ بويىنشا ءبىزدىڭ ۇلتتىق قۇرامامىز قاتارىنان ەكى مارتە ءبىرىنشى ورىننان كورىنگەن بولاتىن. ال, الدىڭعى جىلى ۇيىمداستىرىلعان پرەزيدەنت كۋبوگى تۇڭعىش رەت جەكە ەسەپتە ءوتىپ, قازاقستان قۇراماسى 4 كۇمىس جانە 5 قولاعا قول جەتكىزدى.
بيىلعى تۋرنيرگە تىگىلگەن جۇلدە قورى ادەتتەگىسىنشە, جەتى سالماق بويىنشا تىگىلەدى. ءبىرىنشى ورىن يەلەنگەندەر – 5000, ال ەكىنشى, ءۇشىنشى ورىننان كورىنگەندەر 3000, 1500 اقش دوللارىن الادى.
ۇلتتىق قۇرامامىزدىڭ ساپىندا, ەل چەمپيوندارى مەن بەيرەسمي حالىقارالىق جارىستاردىڭ جەڭىمپازدارىن ەسەپتەمەگەندە, الەمنىڭ ءۇش دۇركىن قولا جۇلدەگەرى, ازيا ويىندارىنىڭ جەڭىمپازى, ازيا چەمپيونى نۇرماحان تىناليەۆ, باكۋدە وتكەن سوڭعى گولدەن گران-پري جارىسىنىڭ چەمپيونى نۇرسۇلتان قالمىرزاەۆ, جاستار اراسىندا الەمنىڭ ءنومىرى ءبىرىنشىسى بولىپ ۇلگەرگەن ارتۋر ۇمبەتقاليەۆ جانە ازيا چەمپيونى ەربول قوڭىراتوۆ بار.
الاڭ يەسى بولعاندىقتان قازاقستان قۇراماسى تولىق قۇرامدا ونەر كورسەتەدى. ياعني, جەتى سالماق بويىنشا 59 سپورتشىمىز بەلدەسۋگە شىعادى. ءبىر ايتا كەتەرلىگى, بيىلعى پرەزيدەنت كۋبوگى اتالمىش كۇرەستىڭ ەرەجەسى وزگەرگەننەن كەيىن ءبىرىنشى رەت ءوتىپ وتىر. جارىس جەلتوقساننىڭ 12 كۇنى مارەسىنە جەتەدى.
نۇريسلام قۇسپانعالي
