«قولجەتىمدى تۇرعىن ءۇي-2020» مەملەكەتتىك باعدارلاماسى بويىنشا پاتەر الۋشىلار كەزەگى الىپ-ساتارلاردىڭ كەسىرىنەن تىعىرىققا تىرەلدى. بۇل تۋرالى ەلىمىزدەگى جالعىز تۇرعىن ءۇي قۇرىلىس جيناق بانكىنىڭ جاڭا باسشىلىعى مالىمدەدى. قازاقستاننىڭ تۇرعىن ءۇي قۇرىلىس جيناق بانكىنىڭ باسشىلىعى تۇرعىن ءۇي دەپوزيتتەرىن باسقاعا بەرۋدى شەكتەۋ تۋرالى شەشىم قابىلداعالى بەرى كوپ ۋاقىت وتە قويعان جوق. ەندى ءوزىنىڭ تۇرعىن ءۇي قۇرىلىس جيناق شارتتارىن تەك جاقىن تۋىستارعا عانا (تۋعان جانە اسىراپ العان بالالارى, اتاسى, اپاسى, تۋعان جانە نەمەرە اعا-قارىنداستارى جانە ەرلى-زايىپتىلار) بەرۋگە بولادى. باعدارلاماعا قاتىسۋشى بانك كليەنتتەرى الاڭداي باستادى. ينتەرنەت- فورۋمداردا جانە الەۋمەتتىك جەلىلەردە بانك سالىمشىلارى ءبىر-بىرىنەن بۇل جاڭالىقتىڭ ءمانىن سۇراپ-بىلۋدە.
«الاڭدايتىن ەشتەڭەسى جوق» دەيدى قتقجب باسقارما توراعاسىنىڭ ورىنباسارى قادىرحان بايمۇحامبەتوۆ. – شارتتاردى باسقاعا بەرۋگە قاتىستى وزگەرىستەر ءۇي ساتىپ الۋعا وزدىگىنەن اقشا جيناپ جاتقاندارعا كەسىرىن تيگىزبەيدى. كەرىسىنشە, تۇرعىن ءۇي كەزەگىنە ءتارتىپ ەنگىزىلەتىن بولادى».
– بانك باسشىلىعى نەلىكتەن تۇرعىن ءۇي دەپوزيتىن بەرۋگە بولاتىن ادامدار اياسىن شەكتەۋ تۋرالى شەشىم قابىلدادى?
– سەبەبى, ءىستىڭ ءمان-جايى ءبىز ويلاعاننان مۇلدە باسقا ارناعا اۋىپ كەتتى. شارتتى باسقاعا بەرۋ (ساتۋ – رەداكتوردىڭ تۇسىنىكتەمەسى) مۇمكىندىگى تۋعان كەزدە, دەپوزيتتەردى كوپە-كورنەۋ ساتۋ بەلەڭ الدى. ال, شارتپەن بىرگە كەزەكتەگى ورىن دا ساۋداعا ءتۇستى. جانە بالل ساناۋ جۇيەسىن ەسكەرسەك, ساتىلاتىندار سوڭعى ورىندار ەمەس. ينتەرنەتتە ءالى كۇنگە دەيىن «تۇرعىن ءۇي قۇرىلىس جيناق بانكىنىڭ دەپوزيتىن ساتىپ الامىن, مۇمكىندىگىنشە, قۇنى جوعارى بولسا» دەگەن حابارلاندىرۋلاردى كەزدەستىرۋگە بولادى. ياعني, مۇنداي دەپوزيتتى ساتىپ الا وتىرىپ, ادام پاتەر الۋشىلاردىڭ العاشقى كەزەگىنە كوتەرىلەدى. ال, تومەن پايىزبەن باسپانا ساتىپ السام دەگەن ۇمىتپەن ۇزاق ۋاقىت بويى اقشا جيناعاندار وزىنەن-ءوزى كەيىنگە ىسىرىلىپ قالادى. ءبىر قىزىعى, مۇنداي الىپساتارلىق مەملەكەتتىك باعدارلامادا كەڭىنەن تارالعان. بىرەۋلەر بىردەن ءبىرنەشە شارت جاسايدى دا, كەيىننەن ولاردى قىمبات ساتۋعا تىرىسادى. باسقالارى ول شارتتاردى ساتىپ الىپ, نارىقتاعىدان تومەن باعادا پاتەر يەسى اتانىپ شىعا كەلدى. سودان كەيىن ول پاتەردى مۇلدە باسقا باعاعا ساتادى.
– ال, نەگىزىنەن, سالىمشىلار اراسىندا تۇرعىن ءۇي ساتىپ الۋشىلار پۋلى قالاي قۇرىلادى? شارتتى قولدان ساتىپ العان كليەنتتەر نە سەبەپتى ءبىرىنشى كەزەككە كوتەرىلىپ كەتەدى؟
– پۋلدار ناقتى ءبىر شارت بويىنشا جيناقتاۋ تالابىنا سايكەس بالل ەسەپتەۋ ۇستانىمى بويىنشا قۇرىلادى. مۇندا كليەنتتىڭ اقشا جيناۋ ۋاقىتىنىڭ ۇزاقتىعى دا, سونداي-اق, جيناق سوماسى دا ەسەپكە الىنادى. مۇنداي جاعدايدا بىرەۋدىڭ دايىن شارتىن ساتىپ الىپ, كوپ بالل سانىنا يە بولۋ الدەقايدا پايدالى ەكەندىگى وزىنەن-ءوزى تۇسىنىكتى. ال, بۇل دەگەنىڭىز – وزىڭە جاقسى پاتەر جانە كەزەكتەن جاقسى ورىن ساتىپ الۋ قۇقىعىنا يە بولۋ دەگەن ءسوز. وسىلايشا, حالىقتىڭ ەڭ مۇقتاج بولىگىن باسپانامەن قامتاماسىز ەتۋ ماقساتىندا قۇرىلعان «قولجەتىمدى تۇرعىن ءۇي-2020» باعدارلاماسى بويىنشا شىن مانىندە باسپاناعا ءزارۋ ادامداردى كەيىنگە ىسىرىپ, اۋقاتتى ادامدار باعدارلامانىڭ باسىمدىقتارىن پايدالانىپ كەتۋ مۇمكىندىگىنە يە بولدى.
– باسقاشا ايتقاندا, باعدارلامانىڭ الەۋمەتتىك باعىتى بۇزىلدى عوي?
– ءدال سولاي. كوبىنەسە, ۇزاق ۋاقىت بويى اقشا جيناعان ادامداردىڭ بالل سانىنان ءبىر نەمەسە بىرنەشە شارت ساتىپ العانداردىڭ بالل مولشەرى ارتىق بولىپ شىقتى. مۇنىڭ ادىلەتسىزدىك ەكەنىنە ءوزىڭىز دە كەلىسەتىن شىعارسىز.
– مۇنداي كەمشىلىكتى كىم جانە قاشان انىقتادى؟ كەزەكتىڭ بۇزىلۋىنا نەمەسە باسقا دا جاعدايلارعا شاعىمدانۋشىلار بولدى ما؟
– ءيا. شاعىمدانۋشىلاردىڭ ەڭ كوپ سانى 2012 جىلعا سايكەس كەلەدى. بۇل كەزدە ەلدە تۇرعىن ءۇي دەپوزيتتەرىنىڭ بەيرەسمي, ستيحيالى نارىعى قالىپتاستى. تۇرعىن ءۇي قۇرىلىس جيناق بانكىنىڭ شارتتارى تەك ساۋدا-ساتتىقتىڭ عانا ەمەس, الىپساتارلىقتىڭ دا قۇرالىنا اينالدى. مەن وسىعان دەيىن ايتىپ كەتكەندەي, دەپوزيتتەردى ساتىپ الۋ-ساتۋ تۋرالى حابارلاندىرۋلاردى كەز كەلگەن جەردە كەزدەستىرۋگە بولاتىن. ال قالعان سالىمشىلاردىڭ ءوز مۇددەلەرىنىڭ قالاي شەكتەلىپ جاتقاندىعىن كورىپ, ىشتەي رەنجىگەننەن باسقا امالدارى بولمادى. سونداي-اق, بۇل بانكتىڭ نەگىزگى يدەياسى جيناقتاۋ مادەنيەتىن دامىتۋعا كەرى اسەر ەتتى.
– بۇعان قالاي دا قارسى تۇرۋعا ارەكەت جاسالدى ما؟
– ءيا. مىسالى, ءبىر ادامعا بەرىلۋى مۇمكىن شارت سانى شەكتەلدى. ال 2013 جىلعى 1 قاڭتاردان باستاپ ساتىپ الىنعان شارتتار بويىنشا بالل سانى باسقاشا ەسەپتەلە باستادى. ولاردى شارت جاسالعان ساتتەن باستاپ ەمەس, ساتىپ الىنعان ساتتەن باستاپ ەسەپتەي باستادى. بىراق, بۇل ورىن العان جاعدايعا ىقپال ەتە الاتىن جارتىلاي عانا شارا ەدى. ءبىز, بانك باسقارماسىنىڭ مۇشەلەرى, بۇعان نازار اۋدارماي تۇرا المادىق.
بۇل ماسەلەنى جان-جاقتى زەرتتەي كەلە, ءبىز «شارتتاردى باسقاعا بەرۋدى شەكتەۋ» تۋرالى قۇجات قابىلداۋ تۋرالى شەشىمگە كەلدىك. مەن بۇل شارا اسا قاجەت بولدى دەپ ەسەپتەيمىن. قالىپتاسقان جاعداي مەملەكەتتىك باعدارلاماعا نۇقسان كەلتىردى جانە ونىڭ قاتىسۋشىلارىنىڭ قۇقىقتارىن شەكتەدى. جاقىن تۋىستار اراسىندا شارتتى بەرۋ – دۇرىس, قالىپتى جاعداي, سەبەبى, وتباسىنىڭ باسپانا جاعدايىن جاقسارتۋ ولاردىڭ ورتاق ماقساتى بولىپ تابىلادى. ماسەلەنىڭ مۇنداي شەشىمى الەمدىك تاجىريبەدە كەڭىنەن قولدانىلادى.
– بانكتىڭ بۇل شەشىمىن ادامدار «كوپتەن كۇتكەن شەشىم ەدى» دەسىپ ءجۇر. نەگە مۇنداي شەشىم تەك باعدارلاما جۇزەگە اسا باستاعالى 10 جىلدان كەيىن بارىپ قابىلداندى?
– ناقتىراق ايتقاندا, «قولجەتىمدى تۇرعىن ءۇي-2020» باعدارلاماسى قولدانىلا باستاعاننان 2,5 جىلدان كەيىن. اتالعان شەشىم 2012 جىلعى شىلدەدە بەكىتىلدى. باسپانا ساتىپ الۋشىلار پۋلىن بانك 2011 جىلعى ءساۋىر ايىنان باستاپ قۇرىلا باستادى, ول كەزدە ءالى 2011-2014 جىلدارعا ارنالعان تۇرعىن ءۇي قۇرىلىسى باعدارلاماسى جۇرگىزىلمەگەن بولاتىن. سوندىقتان, بۇل تالاپتار 10 جىل بويى ەمەس, ەكى جارىم جىل قولدانىلدى دەسەك, دۇرىس بولادى.
– دەپوزيتتى 11 قاراشاعا دەيىن ساتىپ العانداردىڭ شارتتارى ءوز كۇشىندە قالا ما؟ الدە ولاردىڭ كەزەگى قايتا قارالا ما؟
– قۇرىلعان پۋلدار بويىنشا كەزەكتىلىك قايتا قارالمايدى. ياعني, ول شارتتار بويىنشا تالاپتار بۇزىلماعان. سونداي-اق, باسقاعا بەرىلگەن شارتتار تەك «قولجەتىمدى تۇرعىن ءۇي» باعدارلاماسىنا قاتىسۋ ءۇشىن عانا پايدالانىلعان جوق. كەيبىرەۋلەر ولاردى نارىقتا تۇرعىن ءۇي ساتىپ الۋعا زاەم الۋ ءۇشىن ساتىپ الدى.
– قولدانعان تۇرعىن ءۇي دەپوزيتتەرىن ساۋدالاۋدى جويۋدان باسقا, شارادان تاعى نە كۇتۋگە بولادى؟
– بۇل, ءسوزسىز, بانك فيليالدارىنداعى كەزەكتى ازايتادى. شارتتى باسقاعا بەرۋ ءراسىمىنىڭ ءوزى كۇردەلى ماسەلە. ولاردىڭ ءار قالادا تۇراتىن كليەنتتەر اراسىندا جاسالعان جاعدايلارى دا از ەمەس. بۇل ەكى ەلدى مەكەندە تۇراتىن ادامدارعا قىزمەت كورسەتۋدىڭ كەشىكتىرىلۋىنە الىپ كەلدى. سەبەبى, شارتتى باسقاعا بەرۋ وپەراتسيالارى جۇرگىزىلىپ جاتقان كەزدە, قالعاندارى شارت جاساۋ كەزەگىن كۇتۋمەن بولادى.
– بانك باسشىلىعى شارتتاردى باسقاعا بەرۋدى شەكتەۋگە قاتىستى تاۋەكەلدەردى قاراستىردى ما؟ بەكىتىلگەن ەرەجەلەردى اينالىپ وتۋگە كەلگەندە ءبىزدىڭ ادامدار الدىنا جان سالمايتىنىن جاقسى بىلەمىز. جالعان نەكە, مىسالى؟ نەمەسە تاعى باسقا.
– ءىس جالعان نەكەگە جەتە قويمايدى دەپ ويلايمىن. تەك ادامدار جىلدىق 5% ءمولشەرلەمە بويىنشا تۇرعىن ءۇي زاەمىن تەزىرەك الۋدىڭ جانە «قولجەتىمدى تۇرعىن ءۇي-2020» باعدارلاماسى بويىنشا ەڭ كوپ بالل سانىنا قول جەتكىزۋدىڭ تەك ءبىر عانا جولى بار ەكەنىن جاقسى تۇسىنەتىن بولادى. ەڭ قاراپايىم ءادىس – تۇرعىن ءۇي قۇرىلىس جيناقتارىن ءوز بەتىنشە جيناۋ. مۇمكىندىگىنشە, تۇراقتى اي سايىنعى جارنالار ارقىلى.
– ال بۇل شەشىمدى ساقتاماۋعا قاتىستى قانداي دا ءبىر قارسى ارەكەت كوزدەلگەن بە؟ شارتتى باسقاعا بەرۋدى تەكسەرۋ, ەرەجەنى بۇزعانى ءۇشىن ايىپپۇل سانكتسيالارى دەگەندەي… مۇمكىن مۇنداي جاعدايلارعا ارنالعان اكىمشىلىك جازالار قاراستىرىلعان شىعار؟
– شارتتى باسقاعا بەرۋ ارەكەتتەرى تەك بانكتە ىسكە اسىرىلاتىندىقتان, بانك شارتتى باسقاعا بەرۋ تالاپتارىنىڭ بۇزىلۋىنا جول بەرمەيدى.
– ءارى قاراي تولەي المايتىن, ال دەپوزيت بەرەتىن ادامى جوقتار (نەمەسە ەشكىمگە بەرگىسى كەلمەيتىندەر) نە ىستەيدى؟ ولار ءوز اقشالارىن قالاي الادى جانە قانداي تالاپتاردا؟
– ارينە, كەز كەلگەن ۋاقىتتا اقشانى الۋعا جانە شارتتى بۇزۋعا بولادى. بانك سىياقىسىن دا بىرگە الۋعا بولادى, ال مەملەكەت سىياقىسىن تەك ءۇش جىلدان ارتىق جيناعان ادام عانا الا الادى. بىراق, مەن اسىقپاعان دۇرىس دەر ەدىم. ەگەر كىمدە-كىم ۋاقىتشا اقشا سالا الماسا, بۇل ءۇشىن ەشقانداي جازا قولدانىلمايدى. ءبىراز كىدىرىس جاساۋعا جانە ءبىرشاما ۋاقىتتان كەيىن قايتا جيناۋعا بولادى. ءتىپتى بولماعاندا, شارت سوماسىن ازايتۋعا, اقشانى جانە نەعۇرلىم تومەن مولشەرلەمە بويىنشا تۇرعىن ءۇي زاەمىنىڭ سوماسىن الۋعا بولادى. باسپانا ماسەلەسىن جاقسارتۋ ءۇشىن بانك تالاپتارى وتە قولايلى. بار بولعانى ءوزىڭىزدىڭ ۇزاق مەرزىمدى قاجەتتىلىگىڭىزدى جوسپارلاۋعا, ءوز كۇش-جىگەرىڭىزگە دە, بانكتىڭ اقىل-كەڭەستەرىنە دە سۇيەنە ءبىلۋ قاجەت. سوندا ءبارى دە ويداعىداي بولادى. تۇرعىن ءۇي قۇرىلىس جيناق جۇيەسىن ءبىز ويلاپ تاپقانىمىز جوق. بۇل – گەرمانيانىڭ جانە كوپتەگەن باسقا ەلدەردىڭ ۇزدىك الەمدىك تاجىريبەسى. ءبىزدىڭ بانك ءدال وسى وڭدى تاجىريبەنى پايدالانادى.
– قازاقستاندا حالىقتىڭ ەكونوميكالىق بەلسەندى بولىگىنىڭ 3,8%-ى – بانك كليەنتتەرى. «قولجەتىمدى تۇرعىن ءۇي-2020» باعدارلاماسىنا قاتىستى ولاردى تاعى قانداي جاڭالىقتار كۇتىپ تۇر؟
– قازىرگى ۋاقىتتا وڭىرلىك دامۋ مينيسترلىگىنىڭ قىزمەتكەرلەرىمەن بىرگە ءبىز مۇنداي پاتەرلەرگە جانە باعدارلاما تالاپتارىنا اسا مۇقتاج ادامداردى ناقتى انىقتاۋعا مۇمكىندىك بەرەتىن وزگەرتۋلەردى ويلاستىرىپ جاتىرمىز. ءبىزدىڭ كليەنتتەرگە قاتىستى ايتاتىن بولساق, ولاردىڭ بارلىعى بىردەي قولجەتىمدى باسپانا الۋعا مۇمكىندىگى كەلەدى دەۋگە بولمايدى. 2013 جىلى, مىسالى, بانك زاەمدارىنىڭ شامامەن 30%-ى ءتۇرلى مەملەكەتتىك باعدارلامالار بويىنشا باسپانا ساتىپ الۋعا پايدالانىلدى. ال زاەمداردىڭ باسىم ۇلەسى (2013 جىلى بەرىلگەندەردىڭ 70%-ى) باسقا ماقساتتارعا جۇمسالدى. بىرەۋلەرگە اقشا قايتالاما نارىقتا پاتەر ساتىپ الۋعا, بىرەۋلەرگە ءۇي سالۋعا نە جوندەۋ جۇرگىزۋگە كەرەك. ەندى بىرەۋلەر اقشانى باسقا بانكتەردەگى يپوتەكانى جابۋ ءۇشىن الادى. جانە ءبىز ءدال وسى باعىتتى بانك زاەمدارىن تۇرعىن ءۇي جاعدايلارىن جاقسارتۋدىڭ ءتۇرلى ماقساتتارىنا پايدالانۋدى جوسپارلاپ وتىرمىز. تۇرعىن ءۇي قۇرىلىس جيناق جۇيەسىنە قاتىستى ايتاتىن بولساق, بۇل جۇيە ءوزىن تانىتىپ ۇلگەردى. بىرىنشىدەن, ۇلەسكەرلەرمەن بولعان جاعدايداعى سياقتى, بانك سالىمشىلارىنىڭ ەشقايسىسى زيان شەككەن جوق. ەكىنشىدەن, سالىنعان ۇيلەر ءۇشىن اقىنى تولىعىمەن اكىمدىكتەر الادى. سودان كەيىن بۇل اقشاعا مۇلدە باسقا سالىمشىلار ءۇشىن جاڭا ۇيلەر سالىنادى جانە ول ۇيلەردى ساتۋدا كولدەنەڭ قاۋىپ جوق. جالپى العاندا, تۇرعىن ءۇي قۇرىلىس جيناق جۇيەسىنىڭ ناتيجەلى ءارى ىڭعايلى ەكەندىگىنە بارلىق ادامداردىڭ كوزى جەتتى. بۇنى ءوزارا سەرىكتەستىكتىڭ شىن مانىندە جۇمىس ىستەيتىن, «جاندى» ءادىسى دەپ ايتۋعا بولادى.
– بانكتىڭ جاڭا باسشىلىعىنىڭ جوسپارلارى قانداي?
– بانكتىڭ ديرەكتورلار كەڭەسىنىڭ توراعاسى قۋاندىق بىشىمباەۆتىڭ تاپسىرماسى بويىنشا, قازىرگى ۋاقىتتا ءبىز بەلسەندى تۇردە قىزمەت كورسەتۋ ساپاسىن كوتەرۋگە باعىتتالعان شارالاردى قاراستىرىپ جاتىرمىز. بۇل – بولىمشەلەردەگى كەزەكتى جويۋ, تۇرعىن ءۇي قۇرىلىس جيناق جۇيەسىنە قاتىسۋشىلار ءۇشىن بارلىق ۇردىستەردىڭ اشىقتىعىن قامتاماسىز ەتۋ. سونداي-اق قاشىقتان قىزمەت كورسەتۋدىڭ زاماناۋي ادىستەرىن ەنگىزسەك دەيمىز. ءبىز جوسپارلاپ وتىرعان بارلىق شارالار ءبىزدىڭ كليەنتتەرىمىزدىڭ قازاقستان ازاماتتارىنىڭ الدىندا بانك بەدەلىن تۇبەگەيلى وزگەرتۋى ءتيىس. بۇل – بانكتىڭ جاڭا مەنەدجمەنتى ءۇشىن ءبىرىنشى كەزەكتەگى مىندەت جانە ول «بايتەرەك» باسقارۋ حولدينگىنىڭ قاتاڭ باقىلاۋىندا. بىرقاتار شارالار قابىلدانىپ قويدى, ال كوپشىلىگى بەلسەندى تالقىلانۋ ۇستىندە. بىزگە بەلگىلى ءبىر ۋاقىت قاجەت, دەگەنمەن, ءبىز ايتارلىقتاي قىسقا مەرزىم ىشىندە دە وڭدى ناتيجەلەرگە قول جەتكىزۋگە تىرىسامىز.
– اقپارات جەتىسپەۋشىلىگىنەن الەۋمەتتىك جەلىلەردە دۇرلىگىپ, قاۋەسەتكە ىلەسكەن ادامدارعا تاعى نە ايتا الاسىز؟
– ءبىزدىڭ ءوز كليەنتتەرىمىزگە جاقىن بولعىمىز كەلەتىنىن ايتقىم كەلەدى, سەبەبى, ءبىز ولاردىڭ بارلىق شاعىمدارى مەن ۇسىنىستارىن مۇقيات زەرتتەيمىز. باسقارمانىڭ بارلىق مۇشەلەرى اپتا سايىن كليەنتتەردى قابىلدايدى. بۇدان باسقا, بانكتىڭ رەسمي سايتىندا ولاردىڭ بلوگىن اشۋ جوسپارلانۋدا. مىنە, سوندىقتان دا, سىزدەردىڭ بارلىق ۇسىنىستارىڭىز بەن ساۋالدارىڭىز ەسكەرۋسىز قالمايتىنىنا سەنىڭىزدەر. سىزدەردىڭ پىكىرلەرىڭىز ءبىزدىڭ جۇمىسىمىزدى جاقسارتۋ ءۇشىن قاجەت.
جاقىن ارادا جەكە مەنشىك قۇرىلىس كومپانيالارى دا قازاقستاندىقتار ءۇشىن قولجەتىمدى باسپانا سالا باستاۋى ءمۇمكىن. بۇل ماسەلە قازىر قاراستىرىلۋ ۇستىندە. «قالاي بولعان كۇندە دە, ءبارى دە باقىلاۋدا, – دەپ سەندىردى ءبىزدى تۇرعىن ءۇي قۇرىلىس جيناق بانكىنىڭ باسشىلىعى. باعدارلاما تابىستى دامي بەرەدى, ال «سوڭى كىم؟» دەگەن ءداستۇرلى سۇراق اۋىسپالى ماعىنادا ەمەس, تەك كادىمگى كەزەكتە قويىلاتىن بولادى.
قوسىمشا اقپاراتتاردى «قازاقستاننىڭ تۇرعىن ءۇي قۇرىلىس جيناق بانكى» اق-نىڭ ايماقتىق فيليالىنان الا الاسىزدار. مەكەن-جايى:
استانا قالاسى, سىعاناق كوشەسى, 29-ءۇي, ۆپ-3, تەل.: 51-70-46, 51-70-47, موسكوۆسكايا كوشەسى, 29-ءۇي, تەل.: 31-41-74, 31-41-20, اباي داڭعىلى, №8 ءۇي, تەل.: 40-72-76, 40-72-77, قاجىمۇقان كوشەسى, №12 «ا» ءۇي, تەل.: 36-19-07, 36-19-20 نەمەسە
www.hcsbk.kz سايتىندا
Call-centre: 8-800-080-1880
(قوڭىراۋ شالۋ تەگىن)
اڭگىمەلەسكەن
ميرا كاريموۆا
