قازاقستان پرەزيدەنتى نۇرسۇلتان نازارباەۆ وسى اپتادا بىرقاتار كەزدەسۋلەر وتكىزدى.
اتاپ ايتساق, 12 قىركۇيەك كۇنى شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ وتىرىسىنا قاتىسۋ اياسىندا يران يسلام رەسپۋبليكاسىنىڭ پرەزيدەنتى حاسان رۋحانيمەن كەزدەستى. تاراپتار ساۋدا-ەكونوميكا, كولىك-كوممۋنيكاتسيا جانە ينۆەستيتسيا سالالارىنداعى ەكى جاقتى ىنتىماقتاستىقتى جانداندىرۋدىڭ كەلەشەگى تۋرالى سويلەستى.
ال, تاجىكستان رەسپۋبليكاسىنىڭ پرەزيدەنتى ەمومالي راحمونمەن كەزدەسۋ بارىسىندا ەكى ەلدىڭ وڭىرلىك جانە حالىقارالىق ۇيىمدار اياسىنداعى ءوزارا ءىس-قيمىلى ماسەلەلەرى تالقىلانىپ, وڭىرلىك قاۋىپسىزدىك احۋالى جونىندە پىكىر الماستى.
مەملەكەت باسشىسى قىرعىز رەسپۋبليكاسىنىڭ پرەزيدەنتى المازبەك اتامباەۆپەن دە كەزدەستى. مەملەكەتتەر باسشىلارى ساۋدا-ەكونوميكا, ينۆەستيتسيا, سۋ-ەنەرگەتيكا جانە مادەني-گۋمانيتارلىق سالالارداعى ىنتىماقتاستىقتىڭ وزەكتى ماسەلەلەرىن تالقىلادى.
گۇلميرا ايماعانبەت
