كەشە اقمولا وبلىسىنىڭ اكىمى قوسمان ايتمۇحامەتوۆ قر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ءوزى باسشىلىق ەتەتىن ءوڭىردىڭ الەۋمەتتىك-ەكونوميكالىق احۋالىن بايانداپ بەردى.
اقمولا وبلىسى ەلىمىزدىڭ ءىرى اگروونەركاسىپتىك ايماعى سانالادى. وبلىستىڭ جانە استانانىڭ ازىق-تۇلىك قاۋىپسىزدىگىن قامتاماسىز ەتۋدە ماڭىزدى رولگە يە ءوڭىر بيىل 5 ميلليوننان استام استىق جيناۋدى جوسپارلاپ وتىر.
ءتورت تۇلىكتىڭ سانى دا كوبەيۋدە. وبلىستا «2011- 2015 جىلدارعا ارنالعان ەتتى مال شارۋاشىلىعى» باعدارلاماسى ىسكە اسىرىلۋدا. 11 مىڭ ءىرى قارا باسقا ارنالعان 3 مال بورداقىلاۋ الاڭى, 9 ءسۇت تاۋارلارى فەرماسى جۇمىس ىستەيدى. وڭىردە اسىل تۇقىمدى مال وسىرەتىن 16 شارۋاشىلىق بار. جىل سوڭىنا قاراي ەكى اسىل تۇقىمدى مال وسىرەتىن شارۋاشىلىق پەن ءبىر ءسۇت فەرماسى قۇرىلماق. سونداي-اق, ءار اۋداندا مال بورداقىلاۋ الاڭى مەن ءسۇت فەرمالارى ىسكە قوسىلادى. 2010 جىلدان بەرى وبلىسقا شەتەلدەردەن 12 مىڭنان استام اسىل تۇقىمدى ەتتى ءىرى قارا مال باسى اكەلىندى. «سىباعا» باعدارلاماسى بويىنشا 14 مىڭ باس مال ساتىپ الىندى.
جالپى العاندا, استانا قالاسىنىڭ اينالاسىندا ازىق-تۇلىك بەلدەۋىن قالىپتاستىرۋ ماقساتىندا 2008 جىلدان بەرى 47,5 ملرد تەڭگەگە 75 جوباسى اتقارىلدى. قازىرگى تاڭدا جالپى قۇنى 17 ملرد تەڭگەنىڭ 19 جوباسى جۇزەگە اسىرىلۋدا. جىل سوڭىنا قاراي وبلىس استانا تۇرعىندارىن ەتپەن 46 پايىزعا, ءسۇت جانە ءسۇت ونىمدەرىمەن 41 پايىزعا, جۇمىرتقامەن 100 پايىزعا, كارتوپپەن 80 پايىزعا قامتاماسىز ەتۋدى كوزدەيدى.
مەملەكەتتىك يندۋستريالىق دامۋ باعدارلاماسىنا وبلىستىڭ جالپى قۇنى 665 ملرد تەڭگەنى قۇرايتىن 46 جوباسى ەنگىزىلگەن. ولاردىڭ وتىز ءۇشى جۇزەگە اسىپ, 5 مىڭنان استام جاڭا جۇمىس ورىندارى اشىلدى.
«بيزنەستىڭ جول كارتاسى-2020» باعدارلاماسىنىڭ اياسىندا وڭىردەگى 150 كاسىپورىنعا 34 ملرد تەڭگە كولەمىندە سۋبسيديا بەرىلدى.
سونىمەن بىرگە اكىم ەكسپورتقا شىعارىلاتىن ونىمدەر تۋرالى اڭگىمەلەپ, «قولجەتىمدى باسپانا» باعدارلاماسى بويىنشا جىل باسىنان بەرى 16 مىڭ شارشى مەتر تۇرعىنجاي پايدالانۋعا بەرىلگەنىن جەتكىزدى. «اقبۇلاق» باعدارلاماسى بويىنشا, سونداي-اق, ءبىلىم بەرۋ مەن دەنساۋلىق ساقتاۋ, سپورت, تۋريزم سالالارىندا اتقارىلىپ جاتقان جۇمىستارعا توقتالا كەلىپ, جوسپارلارمەن تانىستىردى.
مادەنيەت, رۋحانيات ماسەلەلەرىن قوزعاعاندا, الداعى قازان ايىندا وبلىستا ابىلاي حاننىڭ 300 جىلدىعى كەڭ كولەمدە اتالىپ وتىلەتىنىن حابارلادى.
امانعالي قالجانوۆ
