كاسىبي مەرەكەلەردىڭ ىشىندە ەرەكشە اتالىپ وتەتىنى – ۇستازداردىڭ ءتول مەيرامى. بۇل جولى دا ەلوردا ءبىلىم سالاسىنىڭ ماماندارىنا ايرىقشا قۇرمەت كورسەتتى. بەيسەنبى كۇنى كونگرەسس-حوللدا وتكەن سالتاناتتى جيىنعا
استانا قالاسىنىڭ اكىمى يمانعالي تاسماعامبەتوۆ جانە ەلىمىزدىڭ ءبىلىم جانە عىلىم ءمينيسترى باقىتجان جۇماعۇلوۆ قاتىستى.
كونگرەسس-حوللدىڭ كىرەبەرىسى بىردەن مەرەكەلىك كوڭىل-كۇيدى اڭعارتتى. ەسىك الدىندا ۇستازدارىن شاكىرتتەرى قارسى الدى. قاز-قاتار تىزىلگەن جەتكىنشەكتەر ءار مۇعالىمگە گۇلشوقتارىن ۇسىندى. مۇنداي ءىلتيپاتتى كورىپ, جۇزدەرى تىپتەن جادىراعان جاندار جيىن باستالعانشا, وزدەرىنە ارنالعان كونتسەرتتىك باعدارلامانى تاماشالادى.
سالتاناتتى شارادا ءبىلىم جانە عىلىم ءمينيسترى باقىتجان جۇماعۇلوۆ ءسوز سويلەپ, ۇستازداردى مەرەكەسىمەن قۇتتىقتادى. ەلدىڭ كەلەشەگى ۇستازدىڭ قولىندا ەكەندىگىن, مەملەكەتتىڭ دامۋ ساياساتىندا ساپالى ءبىلىم مەن بىلىكتى مۇعالىمنىڭ ورنى ايرىقشا ەكەندىگىن مينيستر اتاپ ءوتتى.
– مەكتەپتىڭ جۇرەگى – سىزدەرسىزدەر, قادىرلى ۇستازدار! سوندىقتان مينيسترلىك پەداگوگ مارتەبەسىن كوتەرۋدى ەڭ باستى مىندەتتەردىڭ ءبىرى دەپ سانايدى. بۇل جۇمىس ءۇش باعىت بويىنشا جۇرگىزىلۋدە: بىرىنشىدەن, مۇعالىمدەرگە لايىقتى ەڭبەكاقى تولەۋ; ەكىنشىدەن, مۇعالىمدەردىڭ بىلىكتىلىگىن كوتەرۋ; ۇشىنشىدەن, پەداگوگ كاسىبىنىڭ قوعامداعى ءيميدجىن جۇيەلى تۇردە ارتتىرۋ, – دەدى ەلىمىزدىڭ باس ۇستازى.
بۇدان كەيىن باقىتجان تۇرسىنۇلى ەلوردادا جەمىستى ەڭبەك ەتىپ جۇرگەن بىرقاتار مۇعالىمدى ارنايى ماراپاتتادى.
«قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسىن №54 مەكتەپ-ليتسەيدىڭ ورىس ءتىلى مەن ادەبيەتى ءپانىنىڭ مۇعالىمى باقىت تۇلكىباەۆا مەن №60 مەكتەپ-ليتسەيدىڭ باستاۋىش سىنىپ مۇعالىمى ستەللا پريادكو ەنشىلەسە, ى.التىنسارين اتىنداعى مەدالدى №50 مەكتەپتىڭ تاريحشىسى رابيعا يمانقۇلوۆا, №36 مەكتەپتىڭ ديرەكتورى ۆاديم موتورين جانە قالالىق ءبىلىم باسقارماسىنىڭ ادىستەمە كابينەتىنىڭ مەڭگەرۋشىسى ءاسيات قورجىقوۆا يەلەندى.
سونىمەن قاتار 4 مۇعالىم مينيسترلىكتىڭ العىسحاتىمەن, 8-ءى «قۇرمەت گراموتاسىمەن» ماراپاتتالدى.
بيىل ءداستۇرلى «ۇزدىك مۇعالىم – 2012» بايقاۋى وتكەن بولاتىن. ەلوردانىڭ 28 ۇستازى قاتىسقان سايىستا №5 گيمنازيانىڭ قازاق ءتىلى مەن ادەبيەتى ءپانىنىڭ مۇعالىمى كۇلزيپا قىلىشباەۆا گران-ءپريدى جەڭىپ العان ەدى. وسى ۇزدىك ۇستازعا پاتەر كىلتىن تاپسىرعان مينيستر باقىتجان جۇماعۇلوۆ: «وسىمەن استانا 2514 ۇستازعا پاتەر كىلتىن ۇستاتىپ وتىر» دەدى.
سالتاناتتى جيىننىڭ سوڭى مەرەكەلىك كونتسەرتكە ۇلاسىپ, ەلوردانىڭ شىعارماشىلىق ۇجىمدارى ۇستازداردىڭ قۇرمەتىنە ونەرىمەن شاشۋ شاشتى.
