باس قالادا – بەن تالال كوشەسى
2010 جىلى ماۋسىم ايىندا اممان قالاسىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ اتىنا كوشە بەرىلگەن بولاتىن. سول ايتۋلى وقيعانىڭ زاڭدى جالعاسى رەتىندە سەيسەنبى كۇنى استانادا يوردانيانىڭ بۇرىنعى كورولى حۋسەين بەن تالال اتىنداعى كوشە اشىلدى. سالتاناتتى شاراعا استانا قالاسىنىڭ اكىمى يمانعالي تاسماعامبەتوۆ, اممان قالاسىنىڭ باسشىسى اكەل بەلتادجيمەن بىرگە ەكى ەلدىڭ ءبىر توپ زيالى قاۋىم وكىلدەرى قاتىستى.
«بۇگىن ءبىز ەڭسەلى ەلوردامىزدىڭ تاعى دا ءبىر ايشىقتى ءساتىنىڭ كۋاسى بولىپ وتىرمىز. باس شاھارىمىز استانا قالاسىنداعى كەڭ كوشەلەردىڭ بىرىنە يوردانيا كورولدىگىنىڭ بۇرىنعى باسشىسى حۋسەين بەن تالال مىرزانىڭ ەسىمى بەرىلىپ وتىر. يوردانيانىڭ جوعارى مارتەبەلى بۇرىنعى كورولى حۋسەين بەن تالالمەن دە, بۇگىنگى باسشىسى ابدوللا ءىى يبن ءال-حۋسەينمەن دە قازاقستان پرەزيدەنتى نۇرسۇلتان نازارباەۆتىڭ جوعارى دەڭگەيدەگى كەزدەسۋلەرى, مەملەكەتارالىق كەلىسىمدەرى بۇگىندە ءوزىنىڭ وڭ جەمىسىن بەرىپ كەلەدى. ءوزارا دوستىق پەيىل, ارىپتەستىك ساياسي ۇستانىم ەكى ەل اراسىنداعى سان سالالى بايلانىستاردىڭ ناتيجەلى جالعاسۋىنا كەڭىنەن جول اشتى. سونىڭ ارقاسىندا ۇقساستىعى مەن ۇيقاسىمى كوپ ەكى ەل حالقى بۇگىندە ساياسي-ەكونوميكالىق جانە رۋحاني ۇيلەسىمدى ءومىر سۇرۋدە» دەدى ي.تاسماعامبەتوۆ.
ودان ءارى ەلوردا اكىمى امماننىڭ قاشاندا استانامەن باۋىرلاس قالا بولىپ كەلگەنىن ەسكەرە كەلە, تاريحى تالاي مىڭجىلدىقتارعا تامىر جايعان الىپ شاھاردىڭ شەجىرەسىنە ءبىزدىڭ ەلباسىنىڭ ەسىمى دە ەنگەنىن, بۇل بۇكىل يوردانيا جۇرتشىلىعىنىڭ قازاقستان پرەزيدەنتىنە دەگەن ۇلكەن قۇرمەتتىڭ بەلگىسى, ىزگى ءىلتيپاتتىڭ كورىنىسى ەكەنىن اتاپ ءوتتى.
اممان مەرى اكەل بەلتادجي بولسا اسەم استانانىڭ ۇلكەن كوشەلەرىنىڭ بىرىنە يوردانيانىڭ بۇرىنعى كورولى مارقۇم حۋسەين بەن تالالدىڭ ەسىمى بەرىلۋى يوردانيا حاشيميتتىك كورولدىگىنىڭ تاۋەلسىزدىك كۇنى, اسكەريلەر كۇنى مەن اسا مارتەبەلى يوردانيا كورولى ابدۋللا ءىى يبن ءال-حۋسەيننىڭ تاققا وتىرۋى مەرەكەلەرىمەن تۇسپا-تۇس كەلىپ, ءوزارا ۇندەسىپ جاتقاندىعىنا توقتالىپ, بۇل جەر قازاقستان رەسپۋبليكاسى بىزگە باۋىرلاس ەل, دىڭگەگى تەرەڭدە جاتقان دانىشپان حالقىمەن جانە دە ەلىنىڭ ەرتەڭىن ويلايتىن ەلباسشىسىمەن ماقتانا الاتىن ەل ەكەنىن ايتتى.
ايتۋلى كوشەنىڭ جالپى ۇزىندىعى 2545 مەتر جانە ەنى 22 مەتر. تۇران, قابانباي باتىر, ورىنبور كوشەلەرىن قيىپ وتەتىن ول الداعى ۋاقىتتا اقمەشىت جانە ساۋران كوشەلەرىمەن دە قيىلىسىپ, جانىبەك پەن كەرەي حان كوشەلەرىندەگى كولىك جۇكتەمەسىن ازايتادى. سونداي-اق اتالمىش كوشە كەلەشەكتە تۇران داڭعىلىن قابانباي باتىر جانە ورىنبور كوشەلەرىمەن تۇيىستىرەتىن بولادى.
شارا سوڭىندا استانا سەكىلدى جاس قالادا, «ەكسپو-2017» كورمەسى ۇيىمداستىرىلاتىن ورتالىققا جاقىن جەردە, قالانىڭ باس تورىنەن كورولدىڭ اتىنا كوشە بەرىلۋى يوردانيا مەملەكەتى ءۇشىن زور مارتەبە دەپ بىلەتىنىن جەتكىزگەن اكەل بەلتادجي مىرزا اممان قالاسىنىڭ باسشىلىعى اتىنان جانە ءۇش جارىم ميلليون تۇرعىنى بار شاھار اتىنان قازاق حالقىنا, قازاقستان ۇكىمەتىنە جانە استانا اكىمدىگىنە شەكسىز العىسىن ءبىلدىردى.
گۇلبارشىن وكەشقىزى