دۋباي: ميلليون جاسقا كودينگ ءتىلىن ۇيرەتپەك
The National.ae, 24 قازان
بىرىككەن اراب امىرلىكتەرىندە ءبىر ميلليونعا جۋىق جاستى كەلەشەكتىڭ ءتىلى – كودينگكە ۇيرەتەتىن وقۋ-اعارتۋ باعدارلاماسى باستالدى.
مۇنداي باستاماعا ۆيتسە-پرەزيدەنت جانە دۋبايدىڭ ءامىرشىسى, شەيح مۇحاممەد بين راشيد ءال-ماحتۋمنىڭ جاھاندىق قورى مۇرىندىق بولىپ وتىر. وسى ماقساتتا دۋباي كەلەشەك قورى ارنايى ArabCoders.ae ۆەب-پورتالىن اشتى. جوباعا ونلاين-كۋرستار ۇسىناتىن «Udacity» سەرۆيسى جانە تاياۋ شىعىستا پەرسونال تاڭداۋ قىزمەتىمەن تانىمال Bayt.سom پورتالى قولداۋ بىلدىرمەكشى.
باعدارلاما اياسىندا ۆەب-سايت قۇراستىرۋ, ءموبيلدى ينتەرفەيس, اندرويد قوسىمشالارىن جاساۋ جانە مالىمەتتەردى تالداۋ (data analysis) بويىنشا سان-سالالى ونلاين كۋرستار ۇسىنىلادى. ءۇش ايلىق وقۋ باعدارلاماسىنان وتكەننەن سوڭ ۇلگەرىمى جاقسى 1000 ستۋدەنتكە ارناۋلى سەرتيفيكات پەن شاكىرتاقى تابىستاپ, باعدارلاماشىلارعا ارنالعان جارىسقا قاتىسۋعا مۇمكىندىك بەرىلەدى. كودتاۋشىلار جارىسىندا 10 ۇزدىگى ماراپاتتالادى. باس جۇلدەگەردىڭ سىياقىسى – 1 ميلليون دوللار, قالعان توعىزىنا 50 مىڭ دوللاردان ىنتالاندىرۋ سىيلىعى بەرىلەدى. جۇلدەدەن ۇستازدار دا قۇر قالمايدى. ستۋدەنتتەردىڭ داۋىس بەرۋ ناتيجەسىندە انىقتالاتىن ۇزدىك ۇستازداردىڭ ارقايسىسىنا 200 مىڭ دوللار سىياقى تاعايىندالدى.
جالپى, قازىرگى تاڭدا بىرىككەن اراب امىرلىكتەرى مۇنايعا تاۋەلسىز ەكونوميكا قۇرۋ ءۇشىن ءبىلىم سالاسىندا جاراتىلىستانۋ, تەحنولوگيا, ينجەنەريا جانە ماتەماتيكانى وقىتۋعا ايرىقشا كۇش سالىپ وتىر. «جوبامىز ارقىلى اراب تۇبەگىندەگى جاستاردىڭ ومىرىنە قامقورلىق تانىتىپ, ولاردىڭ كەلەشەگىنە ءۇمىت سىيلاعىمىز كەلەدى» دەيدى شەيح مۇحاممەد بەن راشيد. دۇنيەجۇزىلىك ەكونوميكالىق فورۋم مالىمەتى بويىنشا تاياۋ شىعىس-سولتۇستىك افريكا ايماعىنداعى حالىقتىڭ 65 پايىزى جاسى 25-كە تولماعان جاستار ەكەن, الايدا ولاردىڭ 27 پايىزى – جۇمىسسىز. Bayt.com بىلتىر تاراتقان ەسەپكە سەنسەك, ەڭبەك نارىعىنداعى قات ماماندىقتار مەن جاستاردىڭ قازىرگى كاسىبي بىلىكتىلىك دەڭگەيى سايكەسپەيدى. ال تسيفرلى تەحنولوگيا سالاسى كەلەشەكتە مىڭداعان جۇمىس ۇسىناتىن الاڭ رەتىندە ەڭبەك نارىعىندا جاڭا ترەند قالىپتاستىرادى.
ريگا: تۋريست تارتۋعا تالپىنادى
Latviannews.lv, 7 قاراشا
ريگاعا شەتەلدىك پروديۋسەرلەردىڭ نازارىن اۋدارۋ ءۇشىن قالا مۋنيتسيپاليتەتى 2018 جىلى بەرليندە وتەتىن ەۋروپا فيلم نارىعى (Europa Film Market 2018) شاراسىنا قاتىسپاقشى.
«مۇنداي ماڭىزدى شاراعا قاتىسۋ ريگانىڭ, جالپى لاتۆيانىڭ تارتىمدى فيلم ءتۇسىرۋ الاڭى رەتىندە حالىقارالىق دەڭگەيدە تانىتىپ, قالاعا ينۆەستيتسيا تارتۋعا, ءتۋريزمدى دامىتۋعا مۇمكىندىك بەرەدى» دەيدى ريگا قالا كونسۋلدىعىنىڭ دامۋ جونىندەگى كوميسسيا توراعاسى ماكسيم تولستوي. ريگا مۋنيتسيپاليتەتى ۇلتتىق فيلم ورتالىعى جانە لاتۆيا فيلم قاۋىمداستىعىمەن بىرلەسىپ, اتالمىش فەستيۆالدە ريگانى تانىستىرۋ ءۇشىن ارنايى قارجى كوزىن قاراستىرىپ وتىر.
اممان: دۇنيەجۇزىلىك فورۋم ءوتتى
Alghad.com, 10 قاراشا
وسى اپتادا يوردانيا استاناسى – امماندا دۇنيەجۇزىلىك عىلىم فورۋمى ءوتتى. «بەيبىتشىلىك جولىنداعى عىلىم» تاقىرىبىمەن وتكەن فورۋمعا الەمنىڭ 120 ەلىنەن كەلگەن عالىمدار مەن نوبەل سىيلىعىنىڭ لاۋرەاتتارى, ينۆەستورلار, ساياساتكەرلەر قاتىستى.
فورۋم 1999 جىلدان بەرى يۋنەسكو مەن حالىقارالىق عىلىمي كەڭەسىنىڭ باستاماسىمەن ۇيىمداستىرىلىپ كەلەدى. ايتالىق, 2015 جىلى بۋداپەشتتە وتكەن فورۋم كليماتتىڭ ءوزگەرۋى, قاتەرلى ىسىك, تەحنوگەندىك اپات سەكىلدى XXI عاسىردىڭ سىن-قاتەرلەرىن كەڭىنەن تالقىلادى. ال يوردانيادا ءوتكەن فورۋم عالىمداردى تۇراقتى دامۋ جانە بەيبىتشىلىك ساياساتىنا قاتىستىرۋ, ازىق-تۇلىك قاۋىپسىزدىگى جانە اگروشارۋاشىلىق, قاتەرلى ءىندەتكە قارسى كۇرەس, ت.ب. وزەكتى ءماسەلەلەردى ورتاعا سالدى.
ماسكەۋ: «حرۋششەۆكالارمەن» قوش ايتىسادى
«موسكوۆسكي كومسومولەتس», 8 ماۋسىم – 3 قاراشا
بيىل كوكتەمدە ماسكەۋ مەرياسى 1957-1968 جىلدارى سالىنعان ەسكى بەس قاباتتى «حرۋششەۆكالاردى» ءسۇرىپ تاستاپ, ورنىنا جاڭا پاتەرلەر ۇسىناتىن «رەنوۆاتسيا» باعدارلاماسىن قابىلداعان ەدى. رەسەي استاناسىنداعى تۇرعىن ءۇي قورىن جاڭعىرتۋ جوباسى وتە اۋقىمدى: 2032 جىلعا دەيىن 5177 ءۇي بۇزىلادى نەمەسە شامامەن ءبىر ميلليونداي ماسكەۋلىك جاڭا قونىسقا كوشەدى. «استانا اقشامى» باۋىرلاس قالانىڭ بىرەگەي جوباسىنان 5 دەرەك بەرۋدى ءجون كوردى.
1. قونىستانۋ بولمە سانىنا قاراي «ءبىر پاتەرگە – ءبىر پاتەر» قاعيداسىمەن ءجۇ- زەگە اسادى. الايدا جاڭا پاتەرلەر الدەقايدا كەڭ بولادى.
2. «رەنوۆاتسيا» باعدارلاماسىنا قاتىسۋ – ەرىكتى. تۇرعىندار ارناۋلى سايتتا داۋىس بەرۋ نەمەسە تۇرعىنداردىڭ جالپى جينالىسىن جاساۋ ارقىلى ءوز ىقتيارىن ءبىلدىردى. ءتىپتى جاڭا ۇيگە كوشۋ تۋرالى كەلىسىمشارتقا قول قويماستان بۇرىن كەز كەلگەن ۋاقىتتا باعدارلاماعا قاتىسۋدان باس تارتۋعا بولادى.
3. باسىندا ەسكى ۇيدەن جاڭا ۇيگە كوشەتىندەر كىرىس سالىعى رەتىندە 13 پايىز باعا ايىرماشىلىعىن ءتولەۋ قاجەت بولدى. الايدا مەملەكەتتىك دۋما زاڭعا ءتۇزەتۋ ەنگىزىپ, تۇرعىنداردى سالىقتان بوساتتى. سونداي-اق, باعدارلاماعا ىلىككەن تۇرعىندار جىل سايىن كۇردەلى ءجوندەۋگە جينالاتىن الىمنان دا بوساتىلدى. ۇيلەر ابدەن بۇزىلعانشا, ولاردىڭ اپاتتىق جاعدايىن قاداعالاپ تۇرۋدى ماسكەۋ مەرياسى ءوز موينىنا الدى.
4. العاشقى كەزەڭگە 210 الاڭ تاڭداپ الىندى. ول جەردە جيىنى 568 بەس قاباتتى ءۇي ورنالاسقان. تۇرعىندار سانى – 119,5 مىڭ. 2017-2019 جىلدارى 59 ءۇي سالىنىپ, 36,1 مىڭ جان جاڭا باسپاناعا كوشەدى. ال جاپپاي قونىستانۋ 2020-2021 جىلدارى باستالادى. ايتا كەتۋ كەرەك, تۇرعىندارعا پاتەر ۇيرەنشىكتى اۋداننان, ءتىپتى ءوزى تۇراتىن ورامنان بەرىلەدى.
5. جاڭا تۇرعىن ءۇي كەشەندەرى مەن پاتەرلەر ستاندارتى بەكىتىلدى. پاتەرلەر كومفورت كلاسس ساناتىندا بولادى. تۇرعىنداردىڭ كۇدىگىن سەيىلتۋ ءۇشىن پاتەردىڭ ىشكى ينتەرەرىن كورسەتەتىن ارنايى «شوۋ رۋم» اشىلدى. تۇرعىندار بۇرىنعىسىنان كەڭىرەك ۇيگە كوشكىسى كەلسە, ارتىق شارشى مەتردى ءوز اقشاسىنا ساتىپ الۋىنا بولادى.
دايىنداعان: ادىلبەك جاپاق
