استانادا قازىرگى بەسسايىستان ازيا چەمپيوناتى ءوتىپ جاتىر. وتكەن سەنبىدە «سارىارقا» ۆەلوترەگىندە سالتاناتتى تۇردە اشىلعان قۇرلىق باسەكەسىنە اۆستراليا, قىتاي, ءۇندىستان, جاپونيا, وڭتۇستىك كورەيا, قىرعىزستان, وزبەكستان, تايۆان جانە قازاقستان سپورتشىلارى سىنعا تۇسۋدە. جارىستىڭ سالتاناتتى اشىلۋ راسىمىندە حالىقارالىق بەسسايىس فەدەراتسياسىنىڭ پرەزيدەنتى كلاۋس شورمان, ازيا كونفەدەراتسياسىنىڭ باسشىسى لي دجەي-يون, قازاقستان بەسسايىس فەدەراتسياسىنىڭ پرەزيدەنتى, ادىلەت ءمينيسترى بەرىك يماشەۆ, قر سپورت جانە دەنە شىنىقتىرۋ ىستەرى اگەنتتىگىنىڭ توراعاسى ەرلان قوجاعاپانوۆ سپورتشىلارعا ارناپ قۇتتىقتاۋ ءسوز سويلەپ, تابىس تىلەدى.
سەمسەرلەسۋ, ءجۇزۋ, اتۋ, جۇگىرۋ جانە كونكۋرس جارىستارى بويىنشا قۇرلىق چەمپيونى اتاعى ەرەسەكتەر مەن جاستار اراسىندا وتكىزىلۋدە. سونداي-اق, بىرىنشىلىك اياسىندا ازيا مەن وكەانيا وكىلدەرى اراسىندا جاسوسپىرىمدەر وليمپيادا ويىندارىنا ىرىكتەۋ ءتۋرنيرى دە ۇيىمداستىرىلۋدا.
جارىستىڭ العاشقى كۇنى جاسوسپىرىمدەر سىنعا ءتۇستى. ازيا چەمپيونى اتاعىمەن قاتار جاسوسپىرىمدەر وليمپياداسىنا جولداما بەرەتىن جارىس قورىتىندىسىندا ءجاسوسپىرىم ۇلدار اراسىندا ءبىرىنشى ورىنعا يە بولعان قىتايلىق شۋان لي مەن كۇمىس جۇلدەگەر اتانعان وڭتۇستىك كورەيالىق دجيلۋنگ پارك جەڭىمپاز بولىپ تانىلدى. ال, قىزدار اراسىنداعى سايىستا ءبىرىنشى جانە ەكىنشى ورىندى يەلەنگەن قىتايلىقتار دانني ۆەي مەن ليشان دجەنگ جاسوسپىرىمدەر وليمپياداسىنا قاتىساتىن بولدى.
ال, ەرەسەكتەر باسەكەسىندە الدىمەن ەستافەتا جارىسى ءوتتى. بۇل سىندا وڭتۇستىك كورەيا قۇراماسى جەڭىمپاز اتانسا, قىتاي جىگىتتەرى ەكىنشى ورىننان كورىندى. قۇرامىندا پ.يلياششەنكو, ر.سابيرحۋزين جانە ا.سولداتوۆ سىندى سپورتشىلارى بار قازاقستان قۇراماسى قولا جۇلدەگەر اتاندى. ال ايەلدەر باسەكەسىندە قىتاي قۇراماسى ءبىرىنشى, جاپونيا قۇراماسى ەكىنشى. وڭتۇستىك كورەيا قۇراماسى ءۇشىنشى ورىنعا يە بولدى. قازاقستان اتىنان سىنعا تۇسكەن قىزدارىمىز تەك ءتورتىنشى ورىنعا تابان تىرەدى.
ازيا چەمپيوناتىنىڭ باعدارلاماسىنا سايكەس بۇگىن ەرلەر جانە ايەلدەر اراسىندا سەمسەرلەسۋ جانە ءجۇزۋ جارىستارى وتەدى. ەرتەڭ «قازانات» يپپودرومىندا ات سپورتى بويىنشا جارىستاردىڭ جەڭىمپازدارى انىقتالادى.
عالىم قوجابەكوۆ
