قازاقستان حالقى اسسامبلەياسىنىڭ استانا قالالىق فيليالى «بەيبىتشىلىك جانە كەلىسىم جول كارتاسى» جوباسى اياسىندا «قايىرىمدىلىق ارقىلى بىرلىككە» اكتسياسىن وتكىزدى. وعان مۇمكىندىگى شەكتەۋلى جانە تۇرمىسى ناشار وتباسىنان شىققان وتىزعا تارتا بالا تارتىلىپ, ولار قالا سىرتىنداعى «ەكوقالاشىق» دەمالىس ورنىندا تىنىعىپ قايتتى.
مۇندا جەتكىنشەكتەر كۇنى بويى ويىن ويناپ, قىزىقتى سايىستارعا قاتىستى. ال, استانا قالاسىنىڭ جول پوليتسياسى قىزمەتكەرلەرى ءىس-شارانىڭ قاۋىپسىزدىگىن قامتاماسىز ەتۋمەن قوسا, جاسوسپىرىمدەردى جولدا ءجۇرۋ ەرەجەلەرىمەن تانىستىردى. بالالارعا ۇيىمداستىرۋشىلار تاراپىنان سىيلىقتار تارتۋ ەتىلىپ, ارنايى داستارقان جايىلدى.
ەلىمىزدەگى قوعامدىق كەلىسىمدى دامىتۋعا, ەلوردالىق ۇيىمدار اراسىنداعى بايلانىستى نىعايتۋعا باعىتتالعان ءىس-شاراعا قاتىسۋشىلار «بەيبىتشىلىك جانە كەلىسىم» ەسكەرتكىش كىتابىنا ءوز قولتاڭبالارىن قالدىردى.
اكتسياعا استانا قالاسى اكىمدىگى مەن «جاريا» حالىقارالىق ورتالىعى» قوعامدىق قورى, قازاقستان رەسپۋبليكاسى قىزىل اي قوعامىنىڭ استانالىق فيليالى, ەسىل اۋدانىنىڭ مۇگەدەكتەر قوعامى وكىلدەرى بەلسەنە اتسالىستى.
ايگۇل ۋايسوۆا
