استانا قالاسى اكىمدىگىندە قالا اكىمىنىڭ ورىنباسارى ق.سۇلتانبەكوۆتىڭ قاتىسۋىمەن مۇگەدەكتەر تۇرمىسىن جاقسارتۋ جانە ولاردىڭ قۇقىقتارىن قورعاۋ جونىندە ۇيلەستىرۋ كەڭەسى بولىپ ءوتتى.
جيىندا مۇمكىندىگى شەكتەۋلى جانداردى ەڭبەكپەن قامتۋ ماسەلەسى اڭگىمەنىڭ نەگىزگى وزەگىنە اينالدى. سونداي-اق, ولاردىڭ جان جاراسىن ەسكەرە وتىرىپ, دەنساۋلىقتارىن ۇنەمى قاداعالاپ وتىرۋ ماقساتىندا ءارى بىلىمدەرىن جەتىلدىرۋ جولىندا اتقارىلىپ جاتقان شارالار ناقتىلانىپ, الداعى جىلدارعا جوسپار قۇرىلدى.
تاعدىردىڭ اۋىرتپالىعىن كوتەرىپ جۇرگەن وسىنداي مۇمكىندىگى شەكتەۋلى ازاماتتارىمىزدىڭ سانىنا, جاسىنا جانە سىرقاتىنا بايلانىستى قۇزىرلى ورگان وكىلدەرى وزدەرىنىڭ قولدارىندا بار بارلىق مۇمكىندىكتى پايدالانۋ ارقىلى جاقسىلىق جاسايتىندارىن ايتىپ بايانداما جاسادى.
قازىرگى ۋاقىتتا قالاداعى ءۇش اۋدان بويىنشا دا يگى باستامالار قولعا الىنىپ, اكىمدىك تاراپىنان مۇمكىندىگى شەكتەۋلى بالالاردى مەكتەپتەر مەن كوللەدجدەردە وقىتۋعا جاعداي جاسالىنىپ وتىرعانى انىق. بۇل رەتتە اتا-انالار كوتەرىپ جۇرگەن ماسەلەلەر دە جوق ەمەس. ولار وقىتۋ ورتالىقتارىنىڭ سانى ازدىعىن ايتىپ, كەيبىر بالالاردىڭ مەملەكەت ساياساتىنان تىس قالىپ قويۋ قاۋپىنىڭ بار ەكەنىن جەتكىزدى. سونىمەن قاتار, ەرەسەكتەردىڭ دە جۇمىسقا ورنالاسۋ جاعدايى تولىق شەشىلىپ بولماعانىن بىلدىك. ءارى قالا بويىنشا ارنايى اۆتوبۋستار مەن تاكسيلەردىڭ دە ازدىعى – كوپتىڭ كوڭىلىنەن شىقپاي جۇرگەن ۇلكەن ماسەلە.
نۇريسلام قۇسپانعالي
