بۇگىن حالىق قاھارمانى, كەڭەس وداعىنىڭ باتىرى, قازاقتان شىققان تۇڭعىش عارىشكەر, اسكەري ۇشقىش, اۆياتسيا گەنەرال-مايورى توقتار اۋباكىروۆ 70 جاسقا كەلدى. قازاقتىڭ داڭقتى ۇلىنىڭ مەرەيتويىنا وراي استانا قالاسىندا سالتاناتتى كەش ۇيىمداستىرىلدى.
اقمولا وڭىرلىك گارنيزونىنىڭ اسكەري قىزمەتشىلەرى, قازاقستان اسكەري اۆياتسياسىنىڭ ارداگەرلەرى, رەسەي فەدەراتسياسى جانە ەۋرووداق ەلدەرىنىڭ ماڭداي الدى ۇشقىش عارىشكەرلەرى قاتىسقان سالتاناتتى جيىنعا مەملەكەت باسشىسى نۇرسۇلتان نازارباەۆ قۇتتىقتاۋ حاتىن جولدادى.
«قۇرمەتتى توقتار وڭعاربايۇلى! جەتپىس جاسقا تولعان مەرەيتويىڭىز قۇتتى بولسىن! ءسىز حالقىمىزدىڭ ءبىرتۋار, ماقتان تۇتار داڭقتى ۇلدارىنىڭ ءبىرىسىز. ءسىزدىڭ ەسىمىڭىز كوسموناۆتيكا تاريحىندا قازاق حالقىنىڭ عارىش كوگىنە كوتەرىلگەن تۇڭعىش وكىلى رەتىندە ەندى. ەڭبەكتەرىڭىز بۇرىنعى كەڭەس وداعى مەن ەلىمىزدىڭ ەڭ جوعارعى ناگرادالارىمەن اتالىپ ءوتىلدى. سىزگە ءاردايىم مىقتى دەنساۋلىق, وتباسىڭىزعا اماندىق پەن بەرەكە تىلەيمىن!» دەلەنگەن ەلباسىنىڭ قۇتتىقتاۋ حاتىندا.
رەسمي قۇتتىقتاۋلاردان كەيىن مارتەبەلى مەيماندار اسكەري-تاريحي مۋزەيدىڭ كورمە زالىنا قويىلعان حالىق قاھارمانىنىڭ عارىش سالاسىنا اياق باسقان كۇندەرىنەن باستاپ بۇگىنگە دەيىنگى سانالى ومىرىنەن سىر شەرتەتىن فوتوكورمەمەن تانىستى. شارا سوڭىندا مەرەيتوي يەسىنىڭ قۇرمەتىنە ەلىمىزدىڭ ەسترادا جۇلدىزدارىنىڭ قاتىسۋىمەن كونتسەرت ءوتتى.
توقتار اۋباكىروۆ – اسكەري ۇشقىش قانا ەمەس, ول وتاندىق عارىش سالاسىنا جول باستاعان تۇڭعىش عارىشكەر. ول قازاقستانداعى عارىشتىق زەرتتەۋلەردىڭ نەگىزىن قالاسىپ, وتاندىق قارۋلى كۇشتەردىڭ اسكەري دايارلىعىن جەتىلدىرۋگە, اسكەري پاتريوتتىق تاربيە جۇمىستارىن جولعا قويۋعا بەلسەنە ارالاستى.
7 كۇن 22 ساعات 13 مينۋتقا سوزىلعان عارىش ساپارىندا بيوتەحنولوگيا, مەتاللۋرگيا, مەديتسينا سالالارى جانە ارال ايماعى بويىنشا عىلىمي-زەرتتەۋ جۇمىستارىن جۇرگىزگەن. زەرتتەۋ ناتيجەسىندە ارال ۇستىندەگى تۇزدى شاڭ داۋىلىنىڭ پايدا بولۋ پروتسەسى مەن سول زياندى بورامانىڭ قازاقستان مەن رەسەي ايماقتارىنا تارالۋىنىڭ عارىشتىق سۋرەتتەرىن ءتۇسىردى. سونىمەن قاتار, قازاقستان اۋماعىنداعى اتموسفەرا قاباتى مەن جەر بەدەرىن زەرتتەپ, استروفيزيكالىق باقىلاۋ جۇمىستارىمەن اينالىسقان.
