قازىنا قارجىسىن ماقساتسىز جۇمساۋ تىيىلار ەمەس. استانا قالاسىنىڭ پروكۋراتۋراسى ەلوردانىڭ تۇرعىن ءۇي-كوممۋنالدىق شارۋاشىلىعىن جەتىلدىرۋگە بولىنگەن بيۋدجەت قارجىسىنا تەكسەرۋ جۇرگىزىپ, ناتيجەسىندە اقشانى ءتيىمسىز جۇمساۋ فاكتىلەرىن انىقتادى.
پروكۋراتۋرا جەرگىلىكتى اتقارۋشى ورگاننىڭ 2010-2011 جىلدارداعى جانە 2012 جىلدىڭ 1-توقسانىنداعى قر تۇرعىن ءۇي-كوممۋنالدىق شارۋاشىلىعىن جەتىلدىرۋ باعدارلاماسى شەڭبەرىندە بولىنگەن بيۋدجەت قارجىسىن ماقساتتى جانە ءتيىمدى جۇمسالۋى بويىنشا تەكسەرۋ جۇرگىزدى.
تەكسەرۋ بارىسىندا مەردىگەرلىك ۇيىمداردىڭ جوندەۋ جۇمىستارىن ساپاسىز ورىنداۋى, كوندومينيۋم وبەكتىلەرىن جوندەۋگە بولىنگەن اقشانى ءتيىمسىز پايدالانىپ, سونداي-اق ۋاكىلەتتى ۇيىمدار تاراپىنان ءتيىستى باقىلاۋدىڭ بولماعانى انىقتالدى.
مىسالى, «استانا قالاسىنىڭ اۆاريالىق قىزمەتتەر قاۋىمداستىعى» جشس مەردىگەرلىك ۇيىمى جالپى سوماسى 31 716 145 تەڭگەگە قارجىلاندىرىلعانىمەن, پوتانين كوشەسىندە ورنالاسقان 12/2 تۇرعىن ۇيگە كۇردەلى جوندەۋ جۇرگىزبەگەن. اۋەلدە باستالعان شاتىر جابىنىن جوندەۋ جۇمىستارى زەرتحانالىق سىناقتارمەن ساپاسىز ورىندالعان دەپ تانىلىپ, قايتا بولشەكتەنگەن بولاتىن. پروكۋرورلىق ىقپال ەتۋ اكتىسىن قاراۋ ناتيجەلەرى بويىنشا «ASTANA» الەۋمەتتىك-كاسىپكەرلىك كورپوراتسياسى» اق ۋاكىلەتتى ۇيىمى «استانا قالاسىنىڭ اۆاريالىق قىزمەتتەر قاۋىمداستىعى» جشس-نەن 9 900 000 تەڭگە مولشەرىندە تولەنگەن قاراجاتتى جانە شارت تالاپتارىن ورىنداماعانى ءۇشىن 3 171 614 تەڭگە تۇراقسىزدىق ايىپپۇلىن سوت تارتىبىمەن ءوندىرىپ الۋ شارالارىن قابىلدادى. قازىرگى ۋاقىتتا ازاماتتىق ءىس سوت تالقىلاۋى ساتىسىندا.
باعدارلامانى ىسكە اسىرۋ بارىسىندا زاڭ بۇزۋشىلىقتارعا جول بەرگەنى ءۇشىن جۇمىس ساپاسىنا ءتيىستى باقىلاۋ جۇرگىزبەگەن ۋاكىلەتتى ۇيىمنىڭ ەكى لاۋازىمدى تۇلعاسى تارتىپتىك جاۋاپتىلىققا تارتىلدى. قۇرىلىستىق جانە سانيتارلىق نورمالار مەن ەرەجەلەردى بۇزعانى ءۇشىن مەردىگەرلىك ۇيىمدارعا قاتىستى 15 اكىمشىلىك ءىس قوزعالدى.
استانا قالاسى پروكۋراتۋراسىنىڭ ءباسپاسوز قىزمەتى
