استانا قالاسىنىڭ 26 جاسار تۇرعىنى مارات يبراەۆتىڭ ەرلىگى ەلدىڭ اۋزىندا ءجۇر. جاس جىگىت قايسارلىعىمەن ءبىر ۇلكەن ءيتتىڭ اۋزىنان ءۇش بالانى قۇتقارىپ قالدى.
بالالاردى قۇتقارۋشى ماراتتىڭ ايتۋىنشا, وقيعا 26 ماۋسىمدا اباي كوشەسىندە بولعان. سول جەرگە جۇمىس بابىمەن بارعان مارات بالالار الاڭىندا شىڭعىرىپ, جىلاعان بالانىڭ داۋىسىن ەستيدى. بايقاسا, ءبىر ۇلكەن ءيتتىڭ كىشكەنتاي قىزدىڭ اياعىنان تىستەپ, سۇيرەپ جۇرگەنىن كورەدى. سودان ويلانباستان, جۇگىرىپ كەلىپ, الگى يتپەن الىسا كەتەدى. ۇزاق ارپالىستان كەيىن, يت جىگىتتىڭ قولىنان بوساپ شىعىپ, كەلەسى ءبىر بالاعا شابۋىل جاسايدى. مارات ول بالانى دا ءيتتىڭ ازۋىنان بوساتادى. قۇتىرعان يت كەلەسى ءبىر بالاعا تاپ بەرەدى. سوڭىندا يت ماراتتىڭ وزىنە شابۋىل جاساپ, كيىمىن جىرتىپ, تالاپ تاستايدى. ارتىنشا, كينولوگتار ءيتتى قاماپ, الىپ كەتەدى.
ءۇش بىردەي بالانىڭ ءومىرىن امان الىپ, باتىلدىق تانىتقان مارات قالاداعى «الما تۆ» مەكەمەسىندە جۇمىس جاسايدى. وقيعا كۋاگەرلەرى قايسار جىگىتتىڭ ارەكەتىنە ءتانتى. زارداپ شەككەن 7-8 جاسار بالالاردىڭ ەكەۋى قازىر اۋرۋحانادان شىققان, ال, بىرەۋى ەم الىپ جاتىر.
ال, اۋرۋحانا قىزمەتكەرلەرىنىڭ ايتۋىنشا, كوپتەگەن ادامدار وسىنداي جاعدايمەن الدارىنا كەلەدى ەكەن. مۇنداي وقيعالار كۇن ساناپ ارتىپ بارادى. قالادا قاپتاپ جۇرگەن قاڭعىباس يتتەر ادامدارعا اسا قاۋىپتى بولىپ تۇرعانىن ايتتى.
بۇگىندە جەتى قازىنانىڭ بىرىنە كىرگىزگەن يت ادامعا دوس بولماي تۇر. قىسقاسى, يت يتتىگىن جاسايدى. سونىڭ سالدارىنان ادامدار ايىقپاس اۋرۋعا شالدىعىپ, ءولىپ تە كەتىپ جاتىر. ەندى مۇنداي كەلەڭسىزدىكپەن جۇيەلى تۇردە كۇرەسۋ كەرەك. كەيىن بۇل كەساپاتتىڭ بەتىن قايتارۋ قيىن بولىپ قالۋى مۇمكىن.
ەركەجان ساتىمبەك
