ۇلىستىڭ ءۇلى كۇنىن استانا قالاسىنداعى پسيحيكالىق دەنساۋلىق پروبلەمالارىنىڭ مەديتسينالىق ورتالىعىنىڭ ۇجىمى دا ەرەكشە ىقىلاسپەن اتاپ ءوتتى.
وسىناۋ ادەمى مەرەكەمەن ۇجىمدى قۇتتىقتاعان اتالمىش ورتالىقتىڭ ديرەكتورى ەربول نۇرقاتوۆ ناۋرىز كوكتەمنىڭ عانا ەمەس, كۇللى الەمدەگى ىزگىلىك پەن جاقسىلىقتىڭ مەيرامى ەكەنىن ايتا كەلىپ, ارىپتەستەرىنە اق تىلەگىن ارنادى. بۇدان كەيىن تويدىڭ شاشۋى شاشىلىپ, قىدىر اتا جينالعاندارعا باتاسىن بەردى.
قازاقتىڭ جاڭا جىلىندا ورتالىقتىڭ اق حالاتتىلار قاراپ قالماي, بار ونەرلەرىن ورتاعا سالدى. مەيىربيكە جادىرا مۇراتقان قازاق, يسپان بيلەرىن مىڭ بۇرالا بيلەسە, ونىڭ ارىپتەسى سامال ميمانوۆا شىعىس ءبيىن توگىلدىرىپ, كوپشىلىكتىڭ قوشەمەتىنە بولەندى. ال, بەكزات ەسىمدى قىزمەتكەر قىلقوبىزدى قولىنا الىپ, «اقبايان» ءانىن شىرقاتا سالدى. بولىمشە قىزمەتكەرلەرى تاتيانا گەتتسەل مەن ەليزاۆەتا بورودۋلينا جىل باسى – ناۋرىزعا ارنالعان ولەڭدەردى قازاق تىلىندە مانەرلەپ وقىپ, ريزاشىلىققا بولەندى. پەداگوگ-تاربيەشىلەر ۆەرا لازەرەۆا مەن كەنجە يماشقىزى «قازاقتىڭ داستارحانى» ءانىن قوسىلا شىرقاپ, تويدىڭ كورىگىن قىزدىرا ءتۇستى.
جالپى, پسيحيكالىق دەنساۋلىق پروبلەمالارىنىڭ مەديتسينالىق ورتالىعى جىل سايىن ناۋرىزدى ايرىقشا كوڭىل-كۇيمەن قارسى الادى. «بۇل – جالپىۇلتتىق مەرەكە ءارى قازاقتىڭ جاڭا جىلى. ونى اتاپ وتپەۋ مۇمكىن ەمەس» دەيدى ولار.
قىمبات توقتامۇرات
