ورتالىق كوممۋنيكاتسيالار قىزمەتى بريفينگىندە قازاقستان حالقى اسسامبلەياسى حاتشىلىعىنىڭ وكىلى ءنازيپا شاناي, سەنات دەپۋتاتى, قازاقستانداعى ورىس, سلاۆيان جانە كازاك ۇيىمدارى قاۋىمداستىعى توراعاسىنىڭ ورىنباسارى اناتولي باشماكوۆ, ءازىربايجان مادەني ورتالىعىنىڭ توراعاسى ۆيدادي سالاحوۆ, بولگار مادەني ورتالىعىنىڭ جەتەكشىسى ولگا اندريەۆسكايا جانە وزبەك ەتنومادەني ورتالىعىنىڭ توراعاسى شەرزود پۋلاتوۆ جۋرناليستەرمەن كەزدەستى.
اسسامبلەيا وكىلدەرى ەلىمىزدەگى ۇلتتار ساياساتىنىڭ جۇزەگە اسىرىلۋى, ەتنومادەني ورتالىقتاردىڭ قىزمەتى مەن الداعى وتەتىن سەسسيا جۇمىسىنا دايىندىق بارىسى تۋرالى باياندادى. «18 ساۋىردە وتەتىن قازاقستان حالقى اسسامبلەياسىنىڭ كەزەكتى سەسسياسىندا اعىمداعى ساياسي جانە حالىقارالىق دەڭگەيدەگى ماسەلەلەر قارالادى. سەسسيانىڭ تاقىرىبى – «قازاقستان-2050» ستراتەگياسى: بەيبىتشىلىك, رۋحانيات جانە كەلىسىم مادەنيەتى». كورىپ وتىرعاندارىڭىزداي, تاقىرىپ اۋقىمدى جانە ول كەزدەيسوق تاڭدالىپ وتىرعان جوق. مەنىڭ ويىمشا, بۇگىنگى الەم ءوز دامۋىندا اسا سىندارلى ساياسي كەزەڭدى باستان كەشىرىپ وتىرعانى انىق, بىراق, ەڭ الدىمەن, دۇنيەتانىمدىق پروبلەمالار, مادەنيەت پەن رۋحانيات ماسەلەلەرى داعدارىسقا ۇشىراپ وتىر» دەدى ا.باشماكوۆ.
ايگۇل ۋايسوۆا
