قازاقستان مۇسىلماندارى ءدىني باسقارماسىنىڭ جانىنان قۇرىلعان رەسپۋبليكالىق اقپاراتتىق-ناسيحات توبى بىرنەشە كۇن بۇرىن استانا قالاسىنا كەلىپ, ءداستۇرلى ءدىنىمىزدى دارىپتەۋگە, جات اعىمداردىڭ تارالۋىنىڭ الدىن الۋعا, ۇلت قۇندىلىقتارىن ناسيحاتتاۋعا كىرىسىپ كەتكەن-ءدى. بەس كۇن بويى ەلوردا جۇرتشىلىعىمەن كەزدەسىپ, ۋاعىز-ناسيحات جۇرگىزگەن توپ مۇشەلەرى جۇمىستارىن قورىتىندىلادى. «ازىرەت سۇلتان» مەشىتىندە ءباسپاسوز ءماسليحاتىن وتكىزىپ, شارۋالارىنىڭ جاي-كۇيىن باياندادى.
جيىندى توپ مۇشەسى, ءدىني باسقارمانىڭ ءبولىم مەڭگەرۋشىسى, تەولوگ ەرشات وڭعاروۆ اشىپ, ءسوز سويلەدى. «استانالىق جاماعاتپەن جۇزدەسۋدە 24 نىساندى قامتىدىق. ۋاعىز-ناسيحاتىمىزدى جالپى سانى 17 مىڭنان اسا ادام تىڭدادى. توپ مۇشەلەرى ۇلتتىق قۇندىلىقتارىمىزدى ۇلىقتاۋعا, ءدىن مەن ءداستۇر ساباقتاستىعىنا تەرەڭ ءمان بەرگەنىن ايتقىم كەلەدى» دەدى ە.اعىبايۇلى.
الماتى قالالىق ورتالىق مەشىتىنىڭ نايب-يمامى, اقپاراتتىق-ناسيحات توبىنىڭ ءبىر مۇشەسى ورالحان سەيدمانوۆ مۇنداي شارانىڭ قاتارىمىزدى ارتتىرۋعا, ءدىنىمىزدىڭ قاناتى كەڭەيۋىنە, احۋالدىڭ تۇراقتانا تۇسۋىنە سەپتىگىن تيگىزەرى ءسوزسىز ەكەنىن اڭگىمەلەدى.
ءباسپاسوز ءماسليحاتى بارىسىندا جۋىردا عانا قۇرىلعان جەرگىلىكتى ۋاعىز-ناسيحات توبىنىڭ جۇمىستارى دا تالقىلاندى. بۇل تۋراسىندا «نۇر-استانا» ورتالىق مەشىتىنىڭ نايب-يمامى تولەبي وسپان حابارلادى. «باس قالاداعى يگى باستامانى ۇيىمداستىرۋعا ءبىلىم باسقارماسى مەن ءدىن ىستەرى اگەنتتىگى قول ۇشىن سوزدى. شارا اياسىندا بۇگىنگى دەيىن قىرىققا جۋىق وقۋ ورنىنا باس سۇعىپ, 5000-عا جۋىق تىڭدارمانعا ۋاعىز ايتتىق» دەدى نايب-يمام.
جيىن سوڭىندا باق وكىلدەرى توپ مۇشەلەرىنە ساۋالدارىن قويىپ, جان-جاقتى جاۋاپ الدى.
اسحات رايقۇل
