كەشە ەلىمىزدىڭ بارلىق وبلىس ورتالىقتارى مەن ۇلكەن قالالارىنداعى جانە اۋداندىق كىتاپحانالاردا, سونداي-اق, جوعارى وقۋ ورىندارىندا نيەت تانىتقاندار «ماڭگىلىك ەل» پاتريوتتىق اكتىسىن ارقاۋ ەتىپ, قازاق تىلىندە اشىق ديكتانت جازدى. قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالىپ, قازاقستان حالقى اسسامبلەياسى باستاماشى بولعان اكتسيا استاناداعى قر ۇلتتىق اكادەميالىق كىتاپحاناسىندا دا ءوتتى.
– قازاقستان حالقى اسسامبلەياسىنىڭ ءححىV سەسسياسىندا ەلباسىنىڭ تاپسىرماسىمەن «ماڭگىلىك ەل» پاتريوتتىق اكتىسى قابىلداندى. ونىڭ ءماتىنى وتكەن جىلدىڭ ماۋسىم ايىندا 3 مىڭ ادامنىڭ قاتىسۋىمەن وتكەن پاتريوتتىق فورۋمدا العاش رەت تالقىلاندى. ديكتانتتىڭ تاقىرىبى رەتىندە دە پاتريوتتىق اكتىنىڭ قازاقشا نۇسقاسى الىنىپ وتىر. بۇل تەكتەن-تەك ەمەس. ءبىز ەڭ الدىمەن قازاق ءتىلىنىڭ, مەملەكەتتىك ءتىلدىڭ مارتەبەسىنىڭ وسە ءتۇسۋىن كوزدەپ وتىرمىز. بىلتىر قازاقستان حالقى اسسامبلەياسىنىڭ 20 جىلدىعىنا وراي «مىڭ بالا» جوباسىن قولعا الدىق. سوندا ءبىر جىلدىڭ ىشىندە مىڭ بالاعا قازاق ءتىلىن ۇيرەتىپ شىعارۋدى باستى ماقسات ەتىپ قويدىق. ول جوبا 235 مىڭ بالانى قامتىپ, ولاردىڭ اراسىندا وزگە ۇلتتاردان شىققان 44 مىڭ جەتكىنشەك مەملەكەتتىك ءتىلدى مەڭگەرىپ شىقتى. مەملەكەت باسشىسى ەڭ الدىمەن مەملەكەتتىك ءتىل – قازاقستاندىقتاردى بىرىكتىرۋشى فاكتور ەكەنىن ايتادى. ياعني, قازاق ءتىلى ەلدەگى ءاربىر ازاماتتىڭ قوعامدىق-ساياسي ومىرگە ارالاسۋىنىڭ كەپىلى رەتىندە قاراستىرىلىپ وتىر. بىرلىگى جاراسقان, ەلدىگىن ويلاعان مەملەكەتتىڭ عانا تۋى بيىكتە جەلبىرەپ تۇراتىنى ءسوزسىز. بيىلعى تاۋەلسىزدىگىمىزدىڭ 25 جىلدىعى – سونىڭ ايعاعى. ءار وسىنداي ءىس-شارالارىمىز ەلدىڭ بىرلىگىنە تىكەلەي وڭ اسەرىن تيگىزەتىن بولادى دەپ سەنەمىز, – دەدى اكتسيانىڭ اشىلۋىندا قازاقستان حالقى اسسامبلەياسى توراعاسىنىڭ ورىنباسارى-حاتشىلىق مەڭگەرۋشىسى ەرالى توعجانوۆ.
ودان كەيىن ءسوز العان مەملەكەت جانە قوعام قايراتكەرى مىرزاتاي جولداسبەكوۆ «ماڭگىلىك ەل» يدەياسىنىڭ باستاۋى قايدان شىققانىن تارقاتىپ ايتىپ بەردى.
– ادام بالاسى دۇنيەگە كەلگەننەن باستاپ جاقسى ءومىر ءسۇرۋدى اڭسايدى. جيدەلى بايسىن اتالعان جەر ءبىزدىڭ اتا-بابالارىمىزدىڭ سول ارمانىن كورسەتەدى. بۇل يدەيا ءبىر كۇندە تۋا قالعان جوق. VII-VIII عاسىرلاردا تۇرىك قاعاناتى سالتانات قۇردى. ءبىز سونىڭ قۇرامىندا بولدىق. قاعاناتتى قۇرعان بۋمىن مەن ەستەمى قاعاندار «ءبىز ماڭگىلىك ەل ورناتامىز» دەگەن يدەيانى العاش رەت شىعاردى. سودان 1300 جىل وتكەندە, تاۋەلسىزدىگىمىزدى قولىمىزعا الىپ بەرگەن, مەملەكەتىمىزدى قالىپتاستىرعان, قازاقستاندى بۇكىل الەمگە تانىتقان ەلباسىمىز سول يدەيانى جاڭعىرتتى, – دەدى م.جولداسبەكوۆ.
امانعالي قالجانوۆ
