نۇر-سۇلتان قالاسىندا «ORTUS» Martial Arts» جەكپە-جەك مەكتەبى اشىلدى. جاڭا سپورت ۇيىمىنىڭ تۇساۋكەسەرىنە وراي جاسوسپىرىمدەر اراسىندا دزيۋدو كۇرەسىنەن 1-ءىنشى رەسپۋبليكالىق تۋرنير ءوتتى. جارىستىڭ اشىلۋ سالتاناتىندا نۇر-سۇلتان قالاسى اكىمدىگى قوعامدىق دامۋ ىستەرى باسقارماسىنىڭ باسشىسى دانيار ەسين الىس-جاقىننان كەلگەن ءجاسوسپىرىم سپورتشىلار مەن باپكەرلەرگە ساتتىلىك تىلەپ, «ORTUS» Vartial Arts» مەكتەبىنىڭ نەگىزىن قالاۋشى سەرگەي پاك مىرزاعا ريزاشىلىعىن ءبىلدىردى.
جارىستىڭ باس تورەشىسى باۋىرجان شادرايموۆ تۋرنيرگە 700-دەن اسا بالا بالۋاندار قاتىسقانىن, تاتاميدە ەلىمىزدىڭ بارلىق ايماقتارىنان, سونىمەن قاتار وزبەكستان, قىرعىزستان جانە تاجىكستان ەلىنەن كەلگەن دزيۋدوشىلار بەلدەسكەنىن ءمالىم ەتتى. 2005-2012 جىلدارى تۋعان بالالار اراسىنداعى تۋرنيردە ءتورت جاس توبى بويىنشا جەڭىمپازدار مەن جۇلدەگەرلەر انىقتالدى. ەكى كۇن بويى تاتاميدە تەر توككەن جاسوسپىرىمدەر باسەكەسىندە ءوز سالماق دارەجەلەرى بويىنشا ا.ابجالي (جامبىل وبلىسى), ك.ماحامادوۆ (وزبەكستان), د.قانات (نۇر-سۇلتان قالاسى), ق.قاسقاەۆ (تۇركىستان وبلىسى), ت.داميرۇلى (شىعىس قازاقستان وبلىسى), د.گلادكيح (قاراعاندى وبلىسى), ا.ايمۇرات (الماتى قالاسى) جانە باسقالار رەسپۋبليكالىق ءتۋرنيردىڭ چەمپيونى اتاندى.
ءتۋرنيردىڭ جابىلۋ راسىمىندە «ORTUS» Martial Arts» جەكپە-جەك سپورت مەكتەبىنىڭ جەتەكشىسى سەرگەي پاك چەمپيوندار مەن ولاردىڭ باپكەرلەرىن جەڭىستەرىمەن قۇتتىقتاپ, جۇلدەسىز قالعان جاس بالۋاندارعا الداعى جارىستارعا جاقسى دايىندالىپ, تاتامي تۇعىرىنان كورىنۋلەرىنە تىلەكتەستىك ءبىلدىردى.
سونىمەن, ەلوردامىزدا بالالار مەن جاسوسپىرىمدەرگە ارنالعان تاعى ءبىر سپورت ۇيىمى تۇساۋىن كەستى. مەدال تاعىپ, ديپلوم ۇستاپ كوڭىلدەرى كوتەرىلگەن بالالارعا قاراپ تۇرىپ وسى مەكتەپ چەمپيوندار ۇستاحاناسىنا اينالسا ەكەن دەگەن تىلەك بىلدىردىك.
