تاۋەلسىزدىك سارايى قازاقستان رەسپۋبليكاسىنىڭ تۇڭعىش پرەزيدەنتى ن.ءا.نازارباەۆتىڭ باستاماسىمەن 2008 جىلى 15 جەلتوقساندا رەسمي تۇردە اشىلدى. ءبىز ءۇشىن تاۋەلسىزدىك سارايىنىڭ قازاقستان رەسپۋبليكاسىنىڭ تاۋەلسىزدىك كۇنى قارساڭىندا اشىلعانى – ۇلكەن مارتەبە. دامىعان ينفراقۇرىلىمى, جوعارى دەڭگەيدەگى تەحنيكالىق جابدىقتالۋى جانە ساپالى مەنەدجمەنتى رەسپۋبليكالىق جانە حالىقارالىق دەڭگەيدەگى فورۋمداردى, كەزدەسۋلەردى, سەزدەردى جانە باسقا دا ءىس-شارالاردى وتكىزۋگە مۇمكىندىك بەرەدى. 40 مىڭ ش.م. اساتىن اۋماعىندا كەڭ زالدار مەن گالەرەيالار ورنالاسقان. عيمارات ءۇش قاباتتان تۇرادى.
تاۋەلسىزدىك سارايىندا كوپتەگەن ماڭىزدى ءىس-شارالار وتكىزىلىپ, ولاردىڭ كەيبىرەۋلەرى ەلىمىز ءۇشىن تاريحي وقيعالارعا اينالدى. اتاپ ايتاتىن بولساق, 2010 جىلعى ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) ءسامميتى بۇكىل دۇنيەجۇزىلىك جۇرتشىلىقتىڭ نازارىن وزىنە اۋداردى. سامميتكە 38 ەل باسشىلارى جانە 73 ەقىۇ مۇشەلەرى جانە سەرىكتەستەرىنىڭ رەسمي دەلەگاتسيالارى قاتىستى.
2011 جانە 2015 جىلدارى وتكەن قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىشۇلى نازارباەۆتىڭ, سونداي-اق 2019 جىلى پرەزيدەنت قاسىم-جومارت كەمەلۇلى توقاەۆتىڭ ۇلىقتاۋ ءراسىمىن ەرەكشە اتاپ وتكەن ءجون. سونىمەن قاتار, ءبىزدىڭ عيماراتتا جوعارى ەۋرازيالىق ەكونوميكالىق كەڭەسىنىڭ ەل باسشىلار دەڭگەيىندەگى وتىرىسى, شانحاي ىنتىماقتاستىق ۇيىمى (شىۇ) مەن يسلام ىنتىماقتاستىق ۇيىمىنىڭ (يىۇ) مەرەيتويلىق سامميتتەرى ءوتتى.
ەۋرازيا ەلدەرى پارلامەنتتەرى سپيكەرلەرىنىڭ IV كەڭەسى ساراي تاريحىنداعى 2019 جىلدىڭ ەڭ ماڭىزدى وقيعاسى بولدى. بۇل ءىس-شاراعا 65 ەۋروپالىق, ازيا, اراب مەملەكەتتەرى مەن تمد ەلدەرىنىڭ پارلامەنتاريلەرى, سونداي-اق 14 حالىقارالىق ۇيىم, ونىڭ ىشىندە ەۋروپا پارلامەنتى مەن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ پارلامەنتتىك اسسامبلەياسىنىڭ وكىلدەرى قاتىستى. جىل باسىنان قازىرگى ۋاقىتقا دەيىن توتەنشە جاعدايعا قاراماستان ۇجىممەن كوپ باستامالار باستاپ, بىرىگىپ جۇمىس جاساۋدامىز. ۇجىم الەۋمەتتىك كومەك رەتىندە جاعدايى تومەن وتباسىلارىنا جانە مۇقتاج جاندارعا كومەك كورسەتتى. پاندەميا كەزىندە حالىقتىڭ مادەنيەتكە دەگەن قىزىعۋشىلىعىن ارتتىرۋ ماقساتىندا ونلاين فورماتتا سۋرەتشىلەرمەن تىكەلەي ەفيرلەر, كورمەلەر, لەكتسيالار, شەبەرلىك سىنىپتارىن, كونكۋرستار ۇيىمداستىردىق. جۇمىس ىستەۋدىڭ جاڭا فورماتىنا كوشتىك. زامانعا ساي جاستاردىڭ كوڭىلىن اۋلاۋ ءۇشىن ءارتۇرلى الەۋمەتتىك چەللەندجدەر باستادىق. حالىقتىڭ كىتاپ وقۋعا دەگەن قۇشتارلىعىن ارتتىرۋ ءۇشىن كىتاپ الماسۋ بۇرىشىن اشتىق. تاۋەلسىزدىك سارايىنا كەلگەن وقىرمان ءوزىنىڭ وقىپ بىتىرگەن كىتابىن باسقا كىتاپقا اۋىستىرىپ الۋىنا بولادى.
قازاقستاندىق سۋرەتشىلەر تۋرالى ماعلۇماتتارمەن كوپشىلىكتى تانىستىرىپ, تىكەلەي ەفيرلەر جۇرگىزدىك. قازىرگى زامانعا ساي ۇجىم جاستارى الەۋمەتتىك جەلىدە وتە تانىمال بولعان اتاقتى سۋرەتشىلەردىڭ جۇمىستارىنا قىزىقتى كوسپلەيلەر تۇسىردىك. ابايدىڭ 175 جىلدىعىنا وراي كوپ ءىس-شارالار ۇيىمداستىرىلدى. سونىڭ ىشىندە ابايدىڭ شىعارماشىلىعىنا ارنالعان پوەزيا كەشتەرىن وتكىزدىك. تۇڭعىش پرەزيدەنت كۇنىنە ارنالعان ن.نازارباەۆتىڭ قاناتتى سوزدەرىنەن ۇجىم جاستارى بەينەروليك ءتۇسىرىپ, كوپشىلىكتىڭ وڭ باعاسىن الدى. تاياۋدا «ۇلى دالا جۇرەگى» اتتى ۇلكەن كورمە اشىلدى. شەت مەملەكەتتەر مەن قازاقستاندىق كاسىبي مامانداردىڭ جۇمىستارى ۇسىنىلدى. تاۋەلسىزدىكتىڭ 30 جىلدىق مەرەيتويى قارساڭىندا «30 يگى ءىس» شاراسىن باستاپ جاتىرمىز. بۇل اكتسيا اياسىندا ۇجىممەن ەڭ ءبىرىنشى مۇقتاج 30 جانۇياعا الەۋمەتتىك كومەك كورسەتپەكپىز.
تاۋەلسىزدىك سارايىنىڭ 12 جىلدىعىنا ءبىزدىڭ مەكەمە جاۋاپكەرشىلىكپەن دايىندالىپ, ۇجىم ىشىندە جانە ونلاين فورماتتا ءار ءتۇرلى ءىس-شارالار ۇيىمداستىردى. توتەنشە جاعدايعا قاراماستان ءزاۋلىم سارايدىڭ جۇمىسىن توقتاتپاي, ءوز مىندەتتەرىن اتقارعان قىزمەتكەرلەردىڭ ەڭبەگى زور. تاۋەلسىزدىك كۇنىنە وراي «تاۋەلسىزدىكتىڭ بەلگىسى – نۇر-سۇلتان» اتتى كوركەمونەر كورمەسى اشىلادى. وندا تاۋەلسىزدىك سارايى قورىنان الىنعان جۇمىستار قويىلادى. كورمەگە قازاقستاندىق جانە شەتەلدىك سۋرەتشىلەردىڭ نۇر-سۇلتان قالاسىنىڭ تاريحى مەن بولاشاعى بەينەلەنگەن 40-تان استام جۇمىستارى قويىلعان.
بولات رىسقاليەۆ,
«تاۋەلسىزدىك سارايى»
مكقك ديرەكتورى
