نازارباەۆ ورتالىعىنىڭ باستاماسىمەن جىل بويى ەلىمىزدىڭ تۇكپىر-تۇكپىرىندە وتكىزىلگەن «ەلىمنىڭ تاعدىرى – مەنىڭ تاعدىرىم!» اتتى رەسپۋبليكالىق فورۋمنىڭ قورىتىندىسى شىعارىلدى.
فورۋم سەمەي قالاسىنداعى «ولىمنەن دە كۇشتى» مونۋمەنتىنە گۇل شوقتارىن قويۋدان باستالدى. بۇدان كەيىن جينالعان جۇرت نەۆزوروۆتار اتىنداعى شىعىس قازاقستان وبلىستىق بەينەلەۋ ونەرى مۇراجايى مەن اباي قورىق-مۇراجايىن ارالادى.
نازارباەۆ ورتالىعىنىڭ رەسمي وكىلى وكسانا لوسكۋتوۆا: «قوعامنىڭ قوزعاۋشى كۇشىنە اينالعان فورۋم بۇقارادان قولداۋ تاپتى. ەندى ول ەلىمىزدىڭ بارلىق ايماعىندا جىل سايىن وتكىزىلەتىن بولادى. بيىلعى فورۋم اقپان ايىندا اقمولا وبلىسىنان باستاۋ الدى. سودان بەرى قالالىق, اۋداندىق, وبلىستىق دەڭگەيدە 206 فورۋم ۇيىمداستىرىلىپ, وعان 70 مىڭعا جۋىق ادام قاتىسقان. وسى جيىننىڭ جالاۋى استانا, الماتى قالالارىندا دا جەلبىرەدى. بارلىق فورۋمدا كورنەكتى قوعام قايراتكەرلەرى مەن مەملەكەتتىك ورگانداردىڭ وكىلدەرى, ەتنومادەني بىرلەستىكتەردىڭ قىزمەتكەرلەرى مەن عىلىمي, شىعارماشىلىق قاۋىم, سوعىس جانە ەڭبەك ارداگەرلەرى, ينتەرناتسيوناليست-جاۋىنگەرلەر, تانىمال سپورتشىلار, سونداي-اق, جاستار ۇيىمدارىنىڭ كوشباسشىلارى سپيكەر اتانىپ, ءسوز سويلەدى. ولار قازاقستاننىڭ تاڭعالارلىق جەتىستىكتەرىنىڭ بارلىعىندا تۇتاس حالىقتىڭ, ونىڭ ىشىندە ءاربىر قازاقستاندىقتىڭ ەرەن ەڭبەگى مەن وراسان زور ۇلەسى بار ەكەنىن ايتتى» دەدى.
«سپارتاك» ستاديونىندا وتكەن فورۋمعا 10 مىڭعا جۋىق ادام قاتىستى. ەڭ اۋەلى ولارعا نازارباەۆ ورتالىعى ازىرلەگەن «ەلىمنىڭ تاعدىرى – مەنىڭ تاعدىرىم!» اتتى دەرەكتى فيلم كورسەتىلدى. وسىدان سوڭ شىعىس قازاقستان وبلىسىنىڭ اكىمى بەردىبەك ساپارباەۆ فورۋمنىڭ قاتىسۋشىلارىنا مەملەكەت باسشىسى نۇرسۇلتان نازارباەۆتىڭ قۇتتىقتاۋ حاتىن وقىپ بەردى.
فورۋمعا Facebook الەۋمەتتىك جەلىسىندە داۋىس بەرۋ ۇيىمداستىرىلعان. ءار وبلىستان قاتىسقان ۇمىتكەرلەردىڭ ىشىنەن 3 اتالىم بويىنشا جەڭىمپازدار انىقتالدى. ناتيجەسىندە «ءوز ىسىنە ادالدىعى مەن تالىمگەرلىگى ءۇشىن» اتالىمىنا قاراعاندى وبلىسىنىڭ وكىلى ەۆگەني ەرمولاەۆ لايىق دەپ تانىلدى. باتىس قازاقستان وبلىسىنىڭ ۇكىلى ءۇمىتى داريعا مىندەەۆا «ءومىردى قۇتقارۋداعى ەرلىگى ءۇشىن» اتالىمىمەن ماراپاتتالدى. ال «بەلسەندى ازاماتتىق ۇستانىمى ءۇشىن» دەگەن اتالىمدا قاراعاندى وبلىسىنىڭ تۇرعىنى گۇلنار قۇربانباەۆانىڭ جۇلدىزى جاندى.
ەركەجان ساتىمبەك
