نۇر-سۇلتان قالاسىنىڭ بيۋدجەتىنە الداعى ءۇش جىلدا 1 ترلن 208 ملرد تەڭگە تۇسەدى دەپ جوسپارلانىپ وتىر. سونىڭ قوماقتى بولىگى الەۋمەتتىك سالاعا باعىتتالماق.
ونىڭ ىشىندە الداعى جىلى حالىقتى جۇمىسپەن قامتۋ جانە الەۋمەتتىك قورعاۋ ماسەلەلەرىنە – 13,9 ملرد تەڭگە, دەنساۋلىق ساقتاۋعا – 8,9 ملرد تەڭگە, مادەنيەتكە – 7,6 ملرد تەڭگە, دەنە شىنىقتىرۋ جانە سپورتقا – 7,9 ملرد تەڭگە, بىلىمگە 101 ملرد تەڭگەدەن استام قارجى بولىنبەك.
ەلوردانىڭ قوعامدىق كەڭەسىنىڭ وتىرىسىندا مۇنى مالىمدەگەن قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار مانقاراەۆ باس شاھاردىڭ 2022-2024 جىلدارعا ارنالعان بيۋدجەتى جوباسىمەن تانىستىردى.
بايانداماشى بيىلعى 10 ايداعى ەلوردانىڭ الەۋمەتتىك-ەكونوميكالىق دامۋ قورىتىندىلارىمەن تانىستىرا وتىرىپ, تاياۋ جىلدارى بيۋدجەتتىك ساياساتتىڭ باسىمدىقتارى ينۆەستيتسيالىق جوبالاردى قارجىلاندىرۋعا جانە ازاماتتاردى الەۋمەتتىك قولداۋعا, بارلىق الەۋمەتتىك كەپىلدىكتەر مەن حالىق الدىنداعى مىندەتتەمەلەردى ساقتاۋعا نەگىزدەلگەنىن اتاپ ءوتتى.
الەۋمەتتىك تۇراقتىلىقتى قامتاماسىز ەتۋ ءۇشىن جالاقى بويىنشا بەرەشەكتى وتەۋ جانە قىزمەتكەرلەردىڭ بوساتىلۋىنا جول بەرمەۋ, ازاماتتاردىڭ جەكەلەگەن ساناتتارىنا الەۋمەتتىك كومەك كورسەتۋ جانە قولداۋ كورسەتۋدىڭ اتاۋلىلىعىن قامتاماسىز ەتۋ جانە تيىمدىلىگىن ارتتىرۋ, حالىقتى جۇمىسپەن قامتۋ ورتالىقتارىنا ءوتىنىش بەرگەندەردىڭ ىشىنەن ەرەكشە قاجەتتىلىكتەرى بار ادامداردى جۇمىسقا ورنالاستىرۋ بويىنشا جۇمىس 85 پايىزعا دەيىن جالعاسادى.
تۇتاستاي العاندا, ەكونوميكانىڭ دامۋىنا №1 يندۋستريالدىق پاركتىڭ جوبالارىن جانە ۇلتتىق جوبالاردى ىسكە اسىرۋ ارقىلى قايتا وڭدەۋ جانە سەرۆيس سالالارىندا قابىلداناتىن شارالار ىقپال ەتەتىن بولادى. 2026 جىلعا دەيىن يندۋستريالدىق پارك اۋماعىندا 900-گە جۋىق جۇمىس ورنىن قۇرىپ, 12 جاڭا ينۆەستيتسيالىق جوبانى ىسكە اسىرۋ جوسپارلانعان.
– 2022 جىلعى قالا بيۋدجەتى جوباسى بويىنشا شىعىستار 391 ميلليارد تەڭگەنى قۇرايدى. 2023 جىلى بۇل سومانى 416 ميلليارد تەڭگەگە ۇلعايتۋ جوسپارلانىپ وتىر. ال 2024 جىلى شىعىستار 401 ميلليارد تەڭگەنى قۇرايدى. بۇعان قوسا, قالانىڭ دامۋىنا رەسپۋبليكا بيۋدجەتىنەن 100,5 ميلليارد تەڭگە سوماسىنا ماقساتتى ترانسفەرتتەر قاراستىرىلعان. سونىڭ ىشىندە 2022 جىلى – 89 ميلليارد تەڭگە, 2023 جىلى – 10 ميلليارد تەڭگە, – دەدى ق.ماڭقاراەۆ.
