استانادا «قۇلانشى» قازىرگى زامان ونەرىن قولداۋ ورتالىعىنىڭ كومەگىمەن جاڭا ونەر گالەرەياسى اشىلدى. وندا الەمنىڭ تۇكپىر-تۇكپىرىنەن بەلگىلى سۋرەتشىلەردىڭ تۋىندىلارى مەن ينستاللياتسيالارىنىڭ كورمەلەرى وتكىزىلىپ تۇرماق.
شاراعا استانا اكىمىنىڭ ورىنباسارى ەرمەك امانشاەۆ, ەلوردانىڭ شىعارماشىلىق زيالى قاۋىمى مەن بيزنەس قاۋىمداستىعىنىڭ وكىلدەرى قاتىستى.
باستاماشىلار بۇل گالەرەيا ەلوردا ونەرىن جاڭا دەڭگەيگە كوتەرىپ, اعارتۋشىلىق جۇمىستىڭ پارمەندى قۇرالىنا اينالارىنا سەنەدى.
– استانا تۇرعىندارىنىڭ اتىنان «قۇلانشى» قازىرگى زامان ونەر گالەرەياسىنا وسى جوبانى ىسكە اسىرعاندارى ءۇشىن العىس ايتامىن, بۇل جوبا بيزنەستىڭ الەۋمەتتىك جاۋاپكەرشىلىگىنىڭ ايقىن ۇلگىسى بولىپ تابىلادى. تاۋەلسىزدىكتىڭ 25 جىلى ىشىندە مەملەكەت باسشىسىنىڭ كۇش-جىگەرىنىڭ ارقاسىندا قازاقستان وزىق مەملەكەتتەردىڭ قاتارىنا قوسىلىپ, الەم ارەناسىندا تانىمال بولدى. وركەنيەتتى الەمدە قازاق جەرىنىڭ بايلىعى مەن قازاق حالقىنىڭ قوناقجايلىلىعى تۋرالى بىلمەيتىن ەل جوق. جانە قازىر ءوزىمىزدى مادەنيەتى باي, شىعارماشىلىق الەۋەتى زور مەملەكەت رەتىندە تانىتاتىن ۋاقىت كەلدى, – دەپ ءمالىم ەتتى استانا اكىمىنىڭ ورىنباسارى ەرمەك امانشاەۆ.
گالەرەيانى ىسكە قوسۋ اياسىندا قازاقستاندىق بەينەلەۋ ونەرىنىڭ «ماڭگىلىك مۇرا» اتتى كورمەسى اشىلدى. ەكسپوزيتسياعا قازاقستان, قىرعىزستان جانە وزبەكستان ەلدەرىنىڭ ۇزدىك سۋرەتشىلەرىنىڭ تۋىندىلارى ەنگىزىلدى. اۆتورلاردىڭ ايتۋىنشا, ورتا ازيا ەلدەرى مادەنيەتىنىڭ مۇنداي سينتەزى بۇكىل الەم بويىنشا ونەرسۇيەر قاۋىم ءۇشىن تاپتىرماس ولجا, جانە ەلوردا تۇرعىندارى مەن قوناقتارىنىڭ كوڭىلىنەن شىعارى انىق.
اۆتورلار پاريجدەگى لۋۆر, لوندونداعى بريتاندىق مۇراجاي جانە تەيت گالەرەياسى, ماسكەۋدەگى ترەتياكوۆ گالەرەياسى جانە الەمنىڭ تۇكپىر-تۇكپىرىنەن كەلەتىن ميلليونداعان تۋريستەر ءسۇيىپ باراتىن باسقا دا مادەني نىساندار سياقتى استاناداعى كارتينا گالەرەياسى دا قازاقستان ونەرى مەن مادەنيەتىنىڭ سيمۆولىنا اينالاتىنىنا سەنىمدى.
«ماڭگىلىك مۇرا» كورمەسى 2016 جىلدىڭ 1 جەلتوقسانىنا دەيىن جالعاسادى. جۇمىس ۋاقىتى كۇندەلىكتى تۇردە 10:00 دەن 20:00-گە دەيىن.
astana.gov.kz
