نۇر-سۇلتان قالاسى ءماسليحاتىنىڭ كەزەكتى وتىرىسىندا الداعى ءۇش جىلعا ارنالعان بيۋدجەت جوسپارى مەن 2050 جىلعا دەيىنگى ستراتەگيالىق دامۋ ماسەلەسى قارالدى.
تۇراقتى كوميسسيانىڭ وتىرىسىندا نۇر-سۇلتان قالاسىنىڭ ستراتەگيالىق جانە بيۋدجەتتىك جوسپارلاۋ باسقارماسى باسشىسى قايسار مانقاراەۆ بايانداماسىندا ايتىلعان كورسەتكىشتەرگە سۇيەنسەك, بۇرىن بەكىتىلگەن بيۋدجەتتىك باعدارلامالارعا قوسىمشا وزگەرىستەر ەنگىزىلدى. جۇمىسپەن قامتۋ جانە الەۋمەتتىك قورعاۋ باسقارماسىنا قوسىمشا 234,8 ملن تەڭگە, تۇرعىن ۇيلەردىڭ جىلۋ ەنەرگياسى مەن ىستىق سۋمەن جابدىقتالۋىنا 60 ملن تەڭگە, ءبىلىم باسقارماسىنا قوسىمشا 2 ملرد 91 ملن تەڭگە قاراستىرىلعان. قالالىق ورتا ساپاسى جانە باقىلاۋ باسقارماسىنا 32,8 ملن تەڭگە, سپورت باسقارماسىنا 484,9 ملن تەڭگە, كاسىپكەرلىكتى دامىتۋ, ينۆەستيتسيا باسقارماسىنا قوسىمشا 477,8 ملن تەڭگە قاراستىرۋ ۇسىنىلدى.
ودان كەيىن نۇر-سۇلتان قالاسىن دامىتۋدىڭ 2050 جىلعا دەيىنگى ستراتەگيالىق جوباسى تالقىلاندى. ستراتەگيالىق جانە بيۋدجەتتىك جوسپارلاۋ باسقارماسى باسشىسى قايسار مانقاراەۆتىڭ بايانداۋىنشا, شاھاردىڭ ۇزاق مەرزىمدى دامۋ ستراتەگياسىن ازىرلەۋدە حالىقارالىق ساراپشىلار تارتىلدى. ياعني, جوبانى زەرتتەۋمەن جانە ازىرلەۋمەن «استانا حالىقارالىق عىلىمي كەشەنى» مەكەمەسىنىڭ ناقتى-قابىلەت ورتالىعى اينالىستى. ەڭ سەنىمدى دەرەكتەردى الۋ ءۇشىن زەرتتەۋشىلەر حالىق اراسىندا ساۋالناما جۇرگىزىپ, دوڭگەلەك ۇستەلدەر وتكىزىپ, ءتۇرلى ساراپشىلارمەن سۇحبات جۇرگىزدى. ەلوردانى جاھاندىق قالاعا اينالدىرۋدىڭ ءۇش كەزەڭى ازىرلەندى: 2020-2025 جىلدان باستاپ-ءومىر ءسۇرۋ ساپاسىن ارتتىرۋعا باسا نازار اۋدارىلاتىن بولادى. سونىڭ ناتيجەسىندە قالادا ءومىر سۇرۋگە قولايلى ورتا پايدا بولادى. 2025-2030 جىلدارى جاڭا سالالاردى دامىتۋعا جانە ەكونوميكا قۇرىلىمىن وزگەرتۋگە نازار اۋدارۋ قاجەت. وسىنىڭ اسەرىنەن باسەكەگە قابىلەتتى جانە تۇراقتى ءوسىپ كەلە جاتقان قالاعا اينالادى. 2050 جىلعا دەيىن شاھاردىڭ حالىقارالىق ماڭىزىنىڭ ءوسۋى بارىنشا ىقپالداستىرىلعان قالاعا قول جەتكىزۋگە مۇمكىندىك بەرەدى.
جادىرا مۇراتبەكوۆا
