ەڭ ۇزدىك جەدەل جاردەم – استانادا
ەلوردالىق دارىگەرلەر الماتىدا وتكەن جەدەل جاردەم بريگادالارىنىڭ رەسپۋبليكالىق جارىسىندا جەڭىسكە جەتتى.
ەكى كەزەڭگە بولىنگەن سايىس سانيتارلىق اۆياتسيا قىزمەتتەرى, جەدەل جاردەم جانە سيممۋلياتسيالىق ورتالىق ماماندارىنا ارنالعان كونفەرەنتسيا اياسىندا ۇيىمداستىرىلدى. تۋرنيرگە قازاقستاننىڭ بارلىق وڭىرىنەن كەلگەن جەدەل جاردەم بريگادالارى قاتىستى.
الدىمەن, دارىگەرلەر وتكىر كورونارلى سيندروممەن اۋىراتىن ناۋقاستار مەن جول كولىك وقيعالارىنان جاراقاتتانعان ادامداردى قۇتقاردى, بالالار مەن ەرەسەكتەردىڭ جۇرەگىنە, وكپەسىنە رەانيماتسيا جاسادى. سونداي-اق, انافيلاكتيكالىق شوك سەزىنگەن بالاعا قالاي كومەتەسەتىنىن كورسەتتى.
سايىستىڭ ەكىنشى جارتىسىندا جەدەل جاردەم بريگادالارى ايەلدى ۇيدە بوساندىرۋ مەن جاڭا تۋعان شاقالاققا رەانيماتسيا جاساۋدان جانە بوسانعاننان كەيىنگى قان كەتۋدى توقتاتۋدان جارىستى.
الماتى مەديتسينالىق كوللەدجىنىڭ ستۋدەنتتەرى مەديتسينالىق جارىستىڭ ەرىكتى پاتسيەنتتەرى بولدى. سونداي-اق, مۇندا مانەكەندەر مەن قازىرگى زامانعى سيممۋلياتسيالىق جابدىقتار قولدانىلدى.
اتالمىش تۋرنير 10 جىلدان بەرى ليتۆا ەلىندە ۇيىمداستىرىلىپ كەلەدى. الايدا, قازاقستاندا العاش رەت وتكىزىلدى. قازىلار القاسىنىڭ قۇرامىنا ليتۆا جەدەل جاردەم قاۋىمداستىعىنىڭ بىلىكتى ساراپشىلارى ەندى.
«ەلوردالىق دارىگەرلەر باس قالا دارەجەسىنە لايىق ەكەنىن كورسەتتى. ەندى رەسپۋبليكادا ۇزدىك ەكەنىمىزدى سەنىممەن ايتا الامىز» دەدى استانا قالاسىنىڭ جەدەل مەديتسينالىق جاردەم ستانتسياسى ەمدەۋ ءبولىمى بويىنشا باس دارىگەردىڭ ورىنباسارى راۋشان مولدابەكوۆا.
بۇگىنگى تاڭدا استانا قالاسىنىڭ جەدەل جاردەم ستانتسياسىندا 85 بريگادا جۇمىس ىستەيدى. كۇن سايىن ولارعا ناۋقاستاردان ەكى مىڭنان اسا شاقىرتۋ كەلىپ تۇسەدى.
ءساۋىر ايىنان باستاپ دارىگەرلەر جەدەلدىلىكتىڭ 1-ءشى ساناتىنداعى پاتسيەنتكە 10 مينۋتتىڭ ىشىندە جەتىپ ءجۇر.