استانا قالاسى اكىمىنىڭ ورىنباسارى ماليكا بەكتۇروۆا پولشا استاناسى ۆارشاۆادا وتكەن جىل سايىنعى جاھاندىق ايەلدەر سامميتىنە قاتىستى. بيىلعى سامميت «ايەلدەر – ساندىق تەحنولوگيالار داۋىرىندە ينكليۋزيۆتى ەكونوميكانى قۇرۋ ءۇشىن» تاقىرىبى اياسىندا ءوتتى.
الەمنىڭ جەتپىسكە جۋىق ەلىنەن جينالعان ەڭ تابىستى سانالاتىن مىڭنان اسا بيزنەس جانە ساياسات وكىلدەرى بەدەلدى ديالوگ الاڭىندا ءوز تاجىريبەلەرىمەن ءبولىستى, ءتۇرلى ماسەلەلەردە پىكىر الماستى.
«قالالاردىڭ بولاشاعى» اتتى فورۋم بارىسىندا قازاقستاندى تانىستىرعان ماليكا بەكتۇروۆا: «بۇگىندە قازاقستاندىق بيزنەستەگى باسشى ايەلدەردىڭ ۇلەسى 42 پايىزعا جەتىپ وتىر جانە بۇل كورسەتكىش تۇراقتى تۇردە ارتىپ كەلەدى. استانادا بۇل ءۇردىس شاعىن جانە ورتا بيزنەس سالاسىندا ەرەكشە بايقالادى. سوندىقتان وزىق تاجىريبەنى مەڭگەرۋگە جانە جەتىستىكتەرمەن بولىسۋگە مۇمكىندىك تۋدىراتىن وسى سياقتى فورۋمداردى وتكىزۋ وتە ورىندى» دەپ باياندادى.
قالا اكىمىنىڭ ورىنباسارى ءىس-ساپار اياسىندا قازاقستان ەلشىلىگىنىڭ قولداۋىمەن پولشا استاناسىنىڭ ۆيتسە-پرەزيدەنتى م.ولشەۆسكيمەن كەزدەستى. وندا استانا مەن ۆارشاۆا اراسىنداعى ىنتىماقتاستىقتى ودان ءارى نىعايتۋدىڭ ماسەلەلەرى تالقىلاندى. ەكى جاقتاعى تاراپتار قالالىق اكىمدىكتەر اراسىنداعى سەرىكتەستىكتىڭ احۋال-الەۋەتىن جوعارى باعالاپ, 2020 جىلعا دەيىنگى ارنايى ىنتىماقتاستىق باعدارلاماسىنا قول قويۋ تۋرالى كەلىسىمگە كەلدى. بۇل قۇجات ساۋدا-ەكونوميكالىق, ينۆەستيتسيالىق, عىلىمي-تەحنيكالىق, سونداي-اق, مادەني-گۋمانيتارلىق سەرىكتەستىكتى دامىتۋعا باعىتتالعان بىرلەسكەن شارالاردى قامتيدى.
پولياك تاراپى سونىمەن بىرگە, ۆارشاۆادا وتەتىن NATO ءسامميتى قارساڭىندا «ەكسپو-2017» سىندى ءىرى حالىقارالىق شارانى جوعارى دەڭگەيدە وتكىزۋ بويىنشا استانا تاجىريبەسىن زەردەلەۋگە زور قىزىعۋشىلىق تانىتتى.
بيىلعى جىلدىڭ مامىر ايىندا قازاقستان ەلشىلىگى پولشانىڭ دامۋ ۆيتسە-ءمينيسترى ر.دوماگالسكي-لابەندزكي مەن استانا قالاسىنىڭ اكىمدىگى اراسىندا كەزدەسۋ ۇيىمداستىرعان بولاتىن. پولشانىڭ دامۋ مينيسترلىگىندە وتكەن سەمينار سول كەلىسسوزدەردىڭ جالعاسى بولدى. م.بەكتۇروۆا سەمينار كەزىندە پولياك بيزنەس وكىلدەرىنە استانانىڭ ينۆەستيتسيالىق شارتتارى مەن باسىمدى جوبالارى تۋرالى بايانداپ بەردى. سەمينارعا بۇگىندە قازاقستاندا جۇمىس ىستەپ جۇرگەن, بولاشاقتاعى تىعىز ىنتىماقتاستىققا قىزىعۋشىلىق تانىتىپ وتىرعان پولشانىڭ 18 كومپانياسى قاتىستى.
ىسكەرلىك اڭگىمەنى قورىتىندىلاي كەلە تاراپتار پولشانىڭ قۇرىلىس كلاستەرىمەن بەلسەندى ىقپالداستىق ورناتۋعا ۋاعدالاسىپ, تۇرعىن-ءۇي كوممۋنالدىق شارۋاشىلىق, بالامالى ەنەرگەتيكا, اۋىل شارۋاشىلىعىنداعى قايتا وڭدەۋ جانە كولىك-لوگيستيكالىق جوبالارى بويىنشا ىنتىماقتاستىق ءمۇمكىندىكتەرىن زەردەلەۋ تۋرالى كەلىسىمگە قول جەتكىزدى.
