استانانىڭ ءۇش كوشەسىنە بىرجاقتى كولىك قوزعالىسى ەنگىزىلدى. بۇل وزگەرىس قالالىق جول جەلىسىندەگى جۇكتەمەنى ازايتۋ ماقساتىندا ىسكە اسىرىلىپ وتىر. ءۇش كۇننەن بەرى استانالىق اۆتوجۇرگىزۋشىلەر اباي داڭعىلى (سارىارقا داڭعىلىنان پۋشكين كوشەسىنە دەيىن), كەنەسارى كوشەسى (پۋشكين كوشەسىنەن سارىارقا داڭعىلىنا دەيىن) جانە يانۋشكەۆيچ كوشەسىندە (اباي داڭعىلىنان يمانوۆ كوشەسىنە دەيىن) بىرجاقتى قوزعالىس ەرەجەسىمەن جۇرە باستادى. بۇل كوشەلەردىڭ جالپى ۇزىندىعى 9,6 كيلومەتر بولىپ وتىر.
جەرگىلىكتى پوليتسيا قىزمەتىنىڭ باستىعى باقىتجان مالىباەۆ «اتالعان ءۇش كوشەدەگى ەرەجەنى بىلمەستىكپەن بۇزعان ازاماتتارعا ازىرگە اۋىزشا ەسكەرتۋ ايتىلۋدا. اعىمداعى اپتا بويى ءبىز پوليتسيا باسقارماسىنىڭ جەكە قۇرامىمەن بىرلەسىپ, جۇرگىزۋشىلەر اراسىندا جاڭادان ەنگىزىلگەن ءبىرجاقتى قوزعالىسقا قاتىستى ءتۇسىندىرۋ جۇمىستارىن اتقارامىز. ال, ماۋسىمنىڭ 20-سىنان باستاپ بىرجاقتى قوزعالىس ەرەجەسىن بۇزعاندارعا ءتيىسىنشە ايىپپۇل سالىناتىن بولادى» دەپ اتاپ ءوتتى.
جول قوزعالىسىنداعى وزگەرىستەرگە كولىك جۇرگىزۋشىلەرى دە ءارتۇرلى باعا بەرىپ جاتىر. ماسەلەن, استانالىق ەرلان بولەكباەۆ بىرجاقتى قوزعالىس تۋرالى ەستىگەندە, «5-6 كوشەنى جىلدام ءجۇرىپ وتەمىز» دەپ قۋانعانىن ايتادى. الايدا, كەشە جۇمىسقا جەتەمىن دەگەنشە ءبىراز اۋرە-سارساڭعا ءتۇسىپتى. «كۇندە تاڭەرتەڭ 7-ءشى ەمحانا جاقتان اباي كوشەسىنە شىعىپ, استانالىق بازارىنا ارى كەتسە 20 مينۋتتا باراتىنمىن. بۇگىن اباي كوشەسى جابىق ەكەن, كەنەسارىداعى بىرجاقتى جولمەن جۇرەمىن دەپ 45 مينۋتتا ارەڭ جەتتىم جۇمىسقا. كەپتەلىس بولمايدى دەسەم, كەرىسىنشە ەكەن» دەپ بىرجاقتى كولىك قوزعالىسىنا كوڭىلى تولمايتىنىن ءبىلدىردى.
ال, تاكسي قىزمەتىندە جۇمىس ىستەيتىن باۋىرجان ەسىمدى ازامات: «ءبارى ورىندى, تەك ءوزى كىشكەنتاي عانا يانۋشكەۆيچ كوشەسىن بەكەرگە بىرجاقتى ەتكەن. ال, اباي, كەنەسارى كوشەلەرىمەن توقتاۋسىز ءجۇردىم. ءبىر قوسارىم, «چاس-پيك» ۋاقىتىنداعى كەپتەلىستى بولدىرماۋ ءۇشىن وسى جولدارداعى باعدارشامدى ۇزاعىراق جاندىرۋ كەرەك سياقتى. ماسەلەن, 80-90 سەكۋند بەرسە, جول ەداۋىر اشىلار ەدى» دەگەن ۇسىنىسىن ايتتى.
قالاي دەگەنمەن, اتالمىش جوبا كوشە-جول قوزعالىسى جەلىسىنە تۇسەتىن جۇكتەمەنى, سونداي-اق, جول اپاتى وقيعالارىن ازايتۋدى, كولىك قۇرالدارىنىڭ ورتاشا جىلدامدىعىن ارتتىرۋدى كوزدەيدى.
سونىمەن, استاناداعى ەكى نەگىزگى كوشەلەردىڭ كولىك قوزعالىسىنا وزگەرىس ەنگىزىلدى. جۇرگىزۋشىلەر ءۇشىن بۇل جاڭالىق قانشالىقتى ءتيىمدى بولاتىنىن, قالا تىرشىلىگىنە قانشالىقتى اسەر ەتەتىنى الداعى ۋاقىتتا ايقىندالا تۇسپەك. سوندىقتان, جاڭا جول قوزعالىسىنا مۇقيات بول, جۇرگىزۋشى دەمەكپىز.
ءمادينا جاقىپ
