ۇلتتىق مەرەكە قارساڭىندا استانا قالاسى اكىمدىگىنىڭ قولداۋىمەن بەيبىتشىلىك جانە كەلىسىم سارايىندا Máńgilik el daýysy بىرەگەي ۇلتتىق مۋزىكالىق شوۋى ءوتتى. كورەرمەندەردىڭ قازاقستاندىق ەسترادا جۇلدىزدارىمەن قوسىلىپ, بىرگە ءان سالا الۋى شوۋدىڭ باستى ەرەكشەلىگى بولدى.
جوبانى قويۋشى رەجيسسەردىڭ كومەكشىسى ايدا اقتانوۆانىڭ ايتۋىنشا, كورەرمەندەرگە ۇمىتىلماس اسەر سىيلايتىن جوبا العاش رەت وسىنداي اۋقىمدا ءوتتى. كونتسەرتتىك باعدارلامانى الداعى ۋاقىتتا حالىق اراسىندا كەڭىنەن ۇيىمداستىرىپ, بارلىق وڭىردە قويۋ جوسپاردا بار.
– كورەرمەندەر ونەر جۇلدىزدارىمەن قوسىلىپ, ءان سالۋى ءۇشىن تانىمال تۋىندىلاردىڭ ماتىندەرى ارنايى LED-ەكرانداردا كورسەتىلەدى. بۇل – 100 پايىز ءتىرى شوۋ, قويىلىم. مۇنداي جوبالاردى كوبى قولعا الا بەرمەيدى. بىراق ءبىز وسىنداي كەڭ اۋقىمدا كونتسەرت ۇيىمداستىرۋعا بەل بۋدىق. اۋەندەر جاندى داۋىستا ورىندالادى. الدىن الا جازىلعان مۋزىكا جوق, – دەپ اتاپ ءوتتى ول.
مەرەكەلىك دۋماندا قازاقستاندىق ەسترادا جۇلدىزدارى ءوزىنىڭ ۇزدىك اندەرىن جاندى داۋىستا ورىندادى. ساحنادا امرە, 2RAR, نۇرجان كەرمەنباەۆ, Yenlik, Ayree, قايرات نۇرتاس سياقتى تانىمال انشىلەر ونەر كورسەتتى.
وسى كۇنى «قازاقكونتسەرت» ورتالىق كونتسەرت زالىندا قازاقستاننىڭ حالىق ءارتىسى روزا رىمباەۆانىڭ رەسپۋبليكا كۇنىنە ارنالعان «سەنەمىن مەن» اتتى كونتسەرتى ءوتتى. كونتسەرتتە بەلگىلى انشىلەر ايگۇل ەلشىباەۆا, جۇبانىش جەكسەنۇلى, ديلناز احماديەۆالار دا ونەر كورسەتتى. «13 جىلدا ەلىمىز العاش رەت رەسپۋبليكا كۇنىن تويلاپ جاتىر. قازاقستاندىقتاردى ۇلتتىق مەرەكەمەن قۇتتىقتايمىن! بۇگىن تىڭدارماندارىمدى جاڭا اندەرىممەن قۋانتامىن» دەدى ءانشى. روزا رىمباەۆا «ءبىر بالا», «اتامەكەن», «قانەكەي, ءتىلىم, سويلەشى», «ءاليا», «جاڭبىرلى ءتۇن», «سول ءبىر كەزدەر» سەكىلدى تانىمال اندەرىمەن قاتار «تىڭدارمانىما», «عاجايىپ شەكسىزدىك», «سەنەمىن مەن» دەگەن جاڭا تۋىندىلارىن دا ورىندادى.
