«ەكسپو-2017» حالىقارالىق مامانداندىرىلعان كورمەدە جۇمىس ىستەيتىن ەرىكتىلەردى قابىلداۋ ءراسىمى ءوتتى. وعان «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ, قر ءبىلىم جانە عىلىم ءمينيسترى ەرلان ساعاديەۆ جانە قالا اكىمى اسەت يسەكەشەۆ قاتىستى.
ۇلتتىق كومپانيا باسشىسى احمەتجان ەسىموۆتىڭ ايتۋىنشا, كورمەگە 4500-دەي ەرىكتى اتسالىسۋعا دايىن. وسىدان ءبىر-ەكى كۇن بۇرىن ەلورداعا الماتىدان – 300, قاراعاندى وبلىسىنان – 250, پاۆلودار جانە قوستاناي وبلىستارىنان 100-گە تارتا ەرىكتى تابان تىرەدى. تاعى ءبىر ايتا كەتەرلىگى, 150 شەتەلدىك ەرىكتى ارنايى 46 مەملەكەتتەن كەلىپ, كورمەگە قاتىسۋدا. بۇعان قوسا, استانا قالاسى اتىنان 1500 ەرىكتى بار.
ءبىز كورمە كەزىندە قازاقى قوناقجايلىعىمىزدى تانىتىپ, جۇكتەلگەن ءىستى ادال اتقارساق, ەلىمىزدىڭ مارتەبەسى اسقاقتاي تۇسەدى. ەرىكتى اتانۋ – سىزدەر ءۇشىن زور مارتە, جاۋاپكەرشىلىكتىڭ جۇگى دە اۋىر. ەرىكتىلەر «ەكسپو» كورمەسىن ابىرويمەن الىپ شىعادى دەگەن ۇمىتتەمىن, – دەپ جاستارعا سەنىم ءبىلدىردى احمەتجان سماعۇلۇلى.
ال ءبىلىم جانە عىلىم ءمينيسترى ەرلان ساعاديەۆ تىلەگىن قازاقشا باستاپ, اعىلشىنشا اياقتادى.
كەزەكتى ءسوز كورمەنى قابىلداپ وتكىزگەلى وتىرعان قالانىڭ اكىمى اسەت يسەكەشەۆكە بەرىلدى.
– قازاقستاندا ەقىۇ ءسامميتى, الەمدىك جانە ءداستۇرلى دىندەر كوشباسشىلارىنىڭ سەزى سياقتى ماڭىزدى شارالار وتكىزىلدى. بىراق ولار نەبارى ءۇش-ءتورت كۇنگە عانا جالعاستى. ودان كەيىن ەكى اپتاعا جالعاسقان ۋنيۆەرسيادانى وتكىزدىك. ال «ەكسپو-2017» كورمەسىنىڭ جالاۋى 93 كۇن بويى جەلبىرەيدى. كەم دەگەندە 2 ميلليون شەتەلدىك تۋريست كەلەدى. سوندىقتان دا ايتۋلى شاراعا بارىنشا دايىندىق ءجۇردى. ەلباسىمىزدىڭ تاپسىرماسى بويىنشا, جاڭا اۋەجاي, جاڭا تەمىرجول ۆوكزالىن سالىپ, كوپتەگەن قوناقۇيلەردىڭ ەسىگىن اشتىق. اتاپ ايتساق, 200 قوناقۇي مەن حوستەل, 900 مەيرامحانا مەن كافە مەيمانداردى قارسى الۋعا دايىن.
الدىڭعى جىلى استاناعا 800 مىڭعا جۋىق ادام كەلسە, ءۇش ايدىڭ ىشىندە ميلليونداعان ءتۋريستى كۇتىپ وتىرمىز. بۇل – ۇلكەن جاۋاپكەرشىلىك. سول سەبەپتى سىزدەرگە كۇش-قايرات پەن دەنساۋلىق تىلەي وتىرىپ, جۇمىستارىڭىزعا تابىس تىلەيمىن. ساتتىلىك سەرىك بولسىن! – دەپ اسەت ورەنتايۇلى جاستارعا يگى تىلەكتەرىن ءبىلدىردى.
كەش بارىسىندا جاستار سالتاناتتى تۇردە انت قابىلداپ, كورمەنىڭ ەرىكتىسى اتاندى.
گۇلدانا تالعاتقىزى
