بيىل ەلورداداعى ەڭ كونە وقۋ ورداسى – جامبىل جاباەۆ اتىنداعى №4 مەكتەپ-گيمنازياسىنا 110 جىل تولدى.
وسى تاريحي داتا اياسىندا مەكتەپ باسشىلىعى ءبىر ايعا جۋىق اۋقىمدى شارالار ۇيىمداستىردى. ءبارى دە وتە قىزىقتى, تاعىلىمدى بولدى. ءار جىلدارى ءبىلىم ۇياسىنان تۇلەپ ۇشقان تۇلەكتەردىڭ ادەمى اسەرگە تولى كەزدەسۋلەرى ءوتتى. مەكتەپ مۇراجايىنىڭ مەڭگەرۋشىسى داريعا مۇستافينانىڭ «عۇمىرلى ءبىلىم ورداسى» اتتى جاڭا كىتابىنىڭ تۇساۋى كەسىلدى. ەندى ايتا بەرسە, جاقسى ءسوز كوپ.
ۋاقىت دەگەن – اتقان وقتاي, شاپقان اتتاي جۇيرىك. مەن دە وسى مەكتەپتى ءتامامداپ, ءومىر ساپارىنا العاشقى جولداما الدىم. 1990 جىلدارى سول كەزدەگى وقۋ ورداسىنىڭ باسشىسى جاننا بايسەيىتقىزىنىڭ شاقىرۋىمەن ءوزىم تۇلەپ ۇشقان التىن ۇياما ورالىپ, ديرەكتوردىڭ ەستەتيكا جونىندەگى ورىنباسارى بولدىم. ءدال سول جىلدارى گيمنازيانىڭ جانىنان سول ۋاقىتتاعى ءبىلىم ءمينيسترىنىڭ ورىنباسارى ءشامشا بەركىمباەۆانىڭ قولداۋىمەن قالاداعى العاشقى قازاق بالالار مۋزىكا مەكتەبى وتاۋ قۇردى. سونى ۇيىمداستىرۋ ماعان جۇكتەلدى. ءبىراز قيىندىقتاردى كوردىك. بىراق وعان مويىعان جوقپىز. سول مۋزىكا مەكتەبىنەن قانشاما تالانتتى جەتكىنشەكتەر قاناتتاندى.
انە-مىنە دەگەنشە اسىعا كۇتكەن سىڭعىرلى سوڭعى قوڭىراۋ ءساتى كەلىپ جەتتى. وعان مەكتەپتى 40, 51, 56 جىل بۇرىن بىتىرگەن تۇلەكتەر جينالدى. ولاردىڭ ءبارى بۇگىندە سامايلارىن اق قىراۋ باسقان ەگدە كىسىگە اينالعان. وتكەن قىزىقتى شاقتارىن ەسكە الىپ, ءبىر-بىرىمەن مارە-سارە جۇزدەسىپ, ءتاپ-ءتاتتى كۇي كەشتى. ودان كەيىن جاس تولقىن دا كەلىپ, وزدەرىنىڭ ىزگى لەبىزدەرىن ءبىلدىردى. ەڭ عاجابى, وسىدان ءدال 80 جىل بۇرىن ءبىلىم العان, بۇگىندە مەكتەپتىڭ جاسى ۇلكەن تۇلەگى, 94 جاستاعى ۇكىجان سادۋاقاسقىزى دا قاتىستى. تەكتىنىڭ تۇياعى, اقىلمان اجەمىز قىر استىنان ساعىم بولىپ بۇلدىراپ قالعان بالالىق داۋرەنىنەن ەستەلىك ايتىپ, جينالعاندارعا باتاسىن بەردى.
وسپان سۇلەيمەنۇلى,
قر ءبىلىم بەرۋ ءىسىنىڭ ۇزدىگى
