«استانا اقشامى» گازەتىنىڭ پوشتاسىنا ارايلىم بولدىرىقوۆا ەسىمدى ءبىر وقىرمانىمىزدان حات كەلىپ ءتۇستى. حاتتا ەلوردامىزدىڭ سول جاعالاۋىنداعى «اراي» ساياباعىندا ورىن تەپكەن ءبىر ەسكەرتكىشتىڭ ابدەن توزىعى جەتىپ, جۇلىم-جۇلىم بولىپ تۇرعانى ايتىلادى.
وقىرمانىمىزدىڭ حاتىنا بەي-جاي قاراي الماعاندىقتان ساياباقتا تۇرعان جۇمباق ەسكەرتكىشتى ءوز كوزىمىزبەن بارىپ كورگەن ەدىك. ساياباقتىڭ وڭ جاق قاناتىنا قاراي ورىن تەپكەن ەسكەرتكىشتى (ەسكەرتكىش دەۋگە كەلىڭكىرەمەيدى – رەد.) بىردەن بايقادىق. كىسى بويىنداي رومبيك تارىزدەس تاقتانىڭ بەتىندە ءار قازاقتىڭ تاريحي ومىرىنەن سىر شەرتەتىن سۋرەتتەر قيىستىرىلىپ جاپسىرىلىپتى. كونە فوتولاردىڭ اراسىنان راسىندا دا جامبىل جاباەۆ, ساكەن سەيفۋللين, ءىلياس جانسۇگىروۆ سەكىلدى الاش ارىستارىنىڭ, جىرشى-سازگەر, اقىن-جازۋشىلارىمىزدىڭ بەينەسى, جارقىن جۇزدەرى كوزىمىزگە وتتاي باسىلدى. بىراق! ۇلت قايماقتارى بىزگە تەمىر توردىڭ ار جاعىنان قاراپ تۇرعانداي اسەر ەتتى. تۇپ-تۋرا قورقىنىشتى فيلم كورىپ وتىرعانداي كۇيگە تۇستىك. بەلگىسىز بىرەۋلەر ەسكەرتكىشتىڭ بەتىن قورلاپ, قىزىل بوياۋمەن باتتاستىرا شيمايلاپ كەتىپتى. قاشاننان بەرى مۇنداي كۇيدە تۇرعانى بەلگىسىز.
ەسكەرتكىشتىڭ ءوزى دە كوپتەن بەرى قاراۋسىز قالىپ, كۇتىم كورمەگەنى بايقالىپ تۇر. بەتىنە جاپسىرىلعان سۋرەتتەر كۇنگە ابدەن مۇجىلگەن. تىپتەن سۋرەتتەردىڭ جارتىسى وپىرىلىپ قۇلاپ ءتۇسىپ, اياققا تاپتالىپ جاتىر.
ءارى بۇل تاس تۋىندىنىڭ نە ماقساتپەن تۇرعىزىلعانىن ءبىلۋ ەش مۇمكىن بولمادى. تىپتەن قاشان تۇرعىزىلعانى دا بەلگىسىز. ماڭايىندا ەشقانداي جازبا نەمەسە ەسكەرتكىش تاريحىنان سىر شەرتەتىن اقپارات تابا المادىق. ەسكەرتكىشكە, ارينە, تاربيەلىك ماڭىز جۇكتەپ زور, بولاشاق ۇرپاققا ءتالىم-تاربيە بەرۋ ماقساتىندا قويىلعانى داۋسىز. الايدا, بۇگىنگى تاڭدا سول ەسكەرتكىشىمىز قاشانعا دەيىن جەتىمنىڭ كۇيىن كەشىپ, كورىنگەننىڭ ەرمەگىنە اينالىپ قورلانىپ تۇرا بەرمەك؟!
بۇركىت نۇراسىل
