ەۋرازيالىق وداق تاقىرىبى تالقىلاندى
ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ پروفەسسورلىق-وقىتۋشىلىق قۇراممەن جانە ستۋدەنتتەرمەن كەزدەسۋى ءوتتى.
كەزدەسۋ بارىسىندا ەۋرازيالىق ەكونوميكالىق وداق قۇرۋ ماسەلەسى مەن جاڭا ىقپالداستىق بىرلەستىگى شەڭبەرىندە قازاقستاندى ودان ءارى وركەندەتۋدىڭ كەلەشەگى تالقىلاندى.
ءوز دارىسىندە باۋىرجان بايبەك ەۋرازيالىق ەكونوميكالىق وداققا قاتىسۋدان قاراپايىم قازاقستاندىقتارعا تيەتىن پايدا تۋرالى ايتا كەلىپ, ازاماتتار تۇتىناتىن ءونىم مەن قىزمەت كورسەتۋ ساپاسى, باسەكەلەستىك ەسەبىنەن ولاردىڭ باعالارىنىڭ ارزانداۋى, جاڭا جۇمىس ورىندارىن قۇرۋ, ادام كاپيتالى قوزعالىسىنىڭ ەركىندىگى سياقتى ەكونوميكالىق ىقپالداستىقتىڭ ارتىقشىلىقتارىنا جەكە-جەكە توقتالدى.
شاراعا قاتىسقان ۇلتتىق كاسىپكەرلەر پالاتاسى باسقارما توراعاسىنىڭ ءبىرىنشى ورىنباسارى راحىم وشاقباەۆ ءوز سوزىندە: «ەۋرازيالىق ەكونوميكالىق وداق شەڭبەرىندە ءۇش ەل بيزنەس جۇرگىزۋ ءۇشىن, ەڭ قولايلى جاعدايلار جاساۋ ءۇشىن, ەڭ جاقسى ورتا كليماتى ءۇشىن ادال باسەكەگە تۇسەدى. مۇندا قازاقستان ءسوزسىز كوشباسشى بولىپ تابىلادى. كاسىپكەرلىك قىزمەت سۋبەكتىلەرىن تارتۋ ءۇشىن ءبىزدىڭ وسى باسەكەدە جەڭىپ شىعۋىمىزعا بارلىق مۇمكىندىكتەر بار» دەدى.
«نۇر وتان» پارتياسىنىڭ كوشباسشىسى نۇرسۇلتان نازارباەۆتىڭ تاپسىرماسى بويىنشا ەۋرازيالىق ىقپالداستىقتىڭ ماڭىزدى قىرلارىن ءتۇسىندىرۋ ماقساتىندا ستۋدەنتتىك اكتيۆتەرمەن جانە وقىتۋشىلارمەن وسىنداي كەزدەسۋلەر ەلىمىزدىڭ بارلىق وڭىرلەرىندە وتكەنىن اتاپ كەتكەن ءجون.