جومارت سابىرجانوۆ, اسىق اتۋ فەدەراتسياسىنىڭ ۆيتسە-پرەزيدەنتى: اسىق اتقان العىرلىققا جەتەلەيدى
– جومارت سابىرجانۇلى, الدىمەن بىرنەشە جىلدان بەرى استانا قالاسىندا ۇيىمداستىرىلا باستاعان اسىق اتۋ ويىنىنىڭ بيىلعى جايىن اڭگىمەلەسەڭىز...
– ۇلتتىق ويىنىمىزدى جانداندىرۋعا ءاۋ باستان كۇش سالۋىمىز كەرەك ەدى. الايدا, «ەشتەن كەش جاقسى» دەگەن. جىل ساناپ, احۋال جاقسارىپ كەلەدى. اسىرەسە, استانا اكىمدىگى مەن ۇلتتىق سپورت تۇرلەرى قاۋىمداستىعى قامقورلىعىنىڭ ارقاسىندا ىلگەرىلەۋ بار. ايتالىق, العاشقى جىلدارى بۇل ويىنعا بيىلعىداي ەلىمىزدىڭ بارلىق ءوڭىرى قاتىسا العان جوق. سوڭعى ويىندا ون التى كوماندا باق سىناپ, وتىز ەكى ويىنشى ونەر كورسەتتى. سەگىز تورەشى ادىلدىگىن باقىلادى. ون التى جاسقا دەيىنگىلەر اراسىندا دا, ودان جوعارى جاستاعىلار اراسىندا دا ءبىرىنشى تۇعىردى ماڭعىستاۋلىقتار يەلەندى.
جارىس بارىسىندا جۇماتاي اليەۆ, ەرماحان ىبرايىموۆ, قىدىرالى بولمانوۆ, قايرات نۇرتاس, مۇحامەدجان تازابەكوۆ سىندى ەلىمىزگە تانىمال ازاماتتار ونەر كورسەتىپ, ءوزارا سايىسقانىن دا ايتۋ كەرەك.
– ءوزىڭىز ايتقان ۇلتتىق سپورت تۇرلەرى قاۋىمداستىعى ۇيىمداستىرعان ناۋرىز مەيرامىندا اسىق اتۋعا ارنالعان توسەنىشپەن تانىسقان ەدىك. بۇل يگى جاڭالىقتى وسى ويىندا پايدالاندىڭىزدار. تاعى قانداي جاقسى حاباردى سۇيىنشىلەيسىز؟
– بەرليندە ەۋروپا قازاقتارىنىڭ كىشى قۇرىلتايى وتەدى جاقىندا. ۇلتتىق بىرەگەي ويىندى سوندا الىپ بارا جاتقان جايىم بار. وزگە توپىراقتاعى قانداستارىمىزدىڭ اراسىندا اسىق اتۋدى ناسيحاتتاماقپىن. ويىن ءتۇرىن حالىقارالىق دەڭگەيگە شىعارۋ باستى ارماندارىمنىڭ ءبىرى ەكەنىن ايتقىم كەلەدى.
تىنىمسىز تىرلىگىمىزدىڭ جەمىسى بولار, بۇگىنگە دەيىن ەلىمىزدىڭ سەگىز ايماعىندا اسىق اتۋ فەدەراتسياسىنىڭ فيليالدارى اشىلىپ ۇلگەردى. بۇل ءىس ءالى دە قانات جايادى دەگەن ۇمىتتەمىن. ەۋرازيا ۇلتتىق ۋنيۆەرسيتەتىندە وتكەن دوداعا اسىق جيناۋ رەكوردىنىڭ يەسى بولات تاعاباي كەلگەن. ول ۇلتتىق سپورت تۇرلەرى قاۋىمداستىعىنا مىڭ اسىق پەن ون ساقا سىيلادى. بولات قۇدايبەردىۇلىنىڭ قورجىنىنداعى اسىقتىڭ سانى بۇگىندە 38 مىڭعا جەتىپتى. سپورت جاناشىرى كەلەر جىلى شىعىس قازاقستان وبلىسىندا اسىق اتۋدان جارىس وتكىزەتىنىن ايتتى.
– «اسىق اتقان – ازار…» دەگەن ءسوز بار ەدى. الايدا, بۇگىنگى بۋىندى وسى ويىن تۇرىنە ۇيىرسەكتەتە الماي كەلەمىز…
– ءيا, ونىڭ راس. ءبىز ۇلتتىق ويىنىمىزدى دامىتىپ, تەلەديدار مەن تەلەفونعا, ينتەرنەتكە تەلمىرگەن بالالارىمىزدى اشىق اسپان استىندا ويناۋعا الىپ شىقساق دەيمىز. اسىق ويىنى بالانىڭ جاستايىنان جۇيكە جۇيەسىن شىڭداپ, ولاردى ءدالدىككە, العىرلىققا, بايسالدىلىققا تاربيەلەيدى. مۇنداي قاسيەتى بولماسا, ادامدا توزىمدىلىك تە, شىدامدىلىق تا بولمايدى. سونداي-اق, اسىق اتۋ كوز كورىمىن ارتتىرادى ەكەن.
تاعى ايتا كەتەرلىگى, ءبىز ۇيىمداستىرعان جارىستار 4-5 ساعاتتان اسپايدى, ياعني, اسىعىس وتەدى. جاستاردى قۇمارلارى قانعانشا, ەكى-ءۇش كۇن بويى ويناتىپ سايىستىرساق دەيمىن. قۇماردان شىعا ويناماعاننان كەيىن, قادىرىن دە جەتە بىلمەيمىز عوي اسىقتىڭ.
اسحات رايقۇل