گەرمانيانىڭ گاللە قالاسىندا وتكەن «Chemistry Cup» تۋرنيرىنە قاتىسقان قازاقستاندىق بوكسشىلار ءتاۋىر ناتيجە كورسەتىپ قايتتى. ءىلياس سۇلەيمەنوۆ التىننان القا تاقسا, تەمىرتاس ءجۇسىپوۆ, بەرىك ءابدىراحمانوۆ جانە ادىلبەك نيازىمبەتوۆ سىندى سپورتشىلارىمىز ەلگە كۇمىسپەن ورالدى.
ءىلياستىڭ قارسىلاسى مولداۆيالىق الەكساندر رىشكان اقتىق سىنعا شىعۋدان باس تارتۋىنا بايلانىستى 52 كەلى سالماقتاعى جەڭىس ءبىزدىڭ جىگىتكە بۇيىرعان بولاتىن. ال 49 كەلىدە ونەر كورسەتكەن تەمىرتاس ءجۇسىپوۆ فينالدا وڭتۇستىك كورەيا وكىلى دجونگۋن شينگە 1:2 ەسەبىمەن ەسە جىبەردى. ەكەۋىنىڭ دە ازيا چەمپيونى بولعانىن ەسكەرە وتىرىپ, كەزدەسۋدىڭ تارتىستى بولعانىنا كۇمان تۋدىرمايمىز. شين 2011 جىلى قۇرلىقتىڭ جەڭىمپازى اتانسا, ول اتاق تەمىرتاسقا 2013 جىلى بۇيىرعان ەدى.
60 كەلىدەگى بوكسشىمىز بەرىك ءابدىراحمانوۆ تا التىن جۇلدەگە تالاسۋ بارىسىندا قارسىلاسىنا 1:2 ەسەبىمەن جول بەرىپ, بۇكىلالەمدىك WSB جوباسىنا قاتىسۋشى يرلانديالىق دەۆيد دجويس ءبىرىنشى ورىنعا تۇراقتادى.
ءبىزدىڭ قورجىنىمىزعا ءۇشىنشى كۇمىس جۇلدەنى ادەتتەگىدەي 81 كەلىدەگى «كۇمىسبەگىمىز», ياعني, ادىلبەك نيازىمبەتوۆ سالدى. الەم جانە وليمپيادا ويىندارىنىڭ جۇلدەگەرى بۇل جولى ەۋروپانىڭ 2011 جىلعى جەڭىمپازى ءارى 2013 جىلعى الەم بىرىنشىلىگىنىڭ قولا مەدال يەگەرى دجو ۋاردتان ايلاسىن اسىرا المادى. ەسەپ تاعى دا 1:2.
بۇل تۋرنيرگە 17 مەملەكەتتەن بارلىعى 106 بوكسشى قاتىسقانىن ەسكەرسەك, ءبىزدىڭ سپورتشىلار كورسەتكەن ناتيجەنى جامان دەۋگە كەلمەيدى. بۇگىنگە دەيىن «Chemistry Cup-تىڭ» التىن جۇلدەسىنە ۆاسيلي جيروۆ (1995), بولات ءجۇمادىلوۆ, ۆاسيلي جيروۆ (1996), بولات ءجۇمادىلوۆ, سەرىك ومىربەكوۆ (1997), ەرماحان ىبىريىموۆ (1998), باۋىرجان قايىرمەنوۆ (2001), سەرىك ساپيەۆ, باقىت سارسەكباەۆ (2005), گاليب دجاپاروۆ, قانات ءىلياسوۆ (2006), سەرىك ساپيەۆ, ەردوس جاڭابەرگەنوۆ (2007), سەرىك ساپيەۆ (2012), ءبىرجان جاقىپوۆ, مەرەي اقشالوۆ (2013) سەكىلدى قازاقستاندىقتار يەلىك ەتكەن ەكەن.
