باسقا جۇرت قۇرىپ قالعانداي, مينيسترلىكتەر ءۇيىنىڭ اۋلاسىندا ءبىر استانالىق شەنەۋنىكتى اناۋ-مىناۋ ەمەس, الاباي قاپتى. ال, ول نەگە جانىنداعى «نۇرساياعا» كەلىپ, مەنى ءبىر تىستەپ كورمەيدى؟ نە ءۇشىن سول جەردە قالتاسىنداعى 60 تەڭگەگە اۆتوبۋس كۇتىپ تۇرعان داۋلەتقالي دوسىما جەتىپ بارماعان؟ مەملەكەتتىك قىزمەتتە ىستەمەگەندىكتەن, يت ەكەش ءيتتىڭ دە ءمان بەرۋىنە جاراماعانىمىز با, سوندا؟..
نەگىزىندە, ەسىلدىڭ سول جاعالاۋىنداعى شەنەۋنىكتەر اۋلادا بوس جۇرگەن ءداۋ نەمەنى كورىپ, تىزەلەرى دىرىلدەپ قويا بەرگەن. سونى سەزگەندەي, اناۋ دا ارشامەن تازالانعان نەگردىڭ تىسىندەي اپپاق ازۋىن اقسيتىپ, ەشكىمدى عيماراتتىڭ قوس كىرەبەرىسىنە جولاتپاي قويىپتى. جايشىلىقتا ەشكىمدى, ەشتەڭەنى ەلەمەيتىن بيشىكەشتەردىڭ بەيشارا كەيىپكە تۇسكەنىن كوز قيىعىمەن اڭداپ, ەكى ورتادا ءجۇرىپ العان. اقىرى شىداماعان سوڭ, كوپ ىشىنەن ءبىر «باتىر» شىعىپ, ەركىنسىگەن «جاۋدى» قۋىپ جىبەرمەك بولادى. الايدا, ول «بالەلى جەرگە بارماعىڭدى تىقپا!» دەگەن اتا-بابا اقىلىنان حابارسىز بولعانعا ۇقسايدى. يتەكەڭ دە وزىنشە «پريكول ۇستاپ» جۇرە بەرۋدەن ىڭعايسىزدانعانداي, اقساۋساقتىڭ قولىنان دۇرىستاپ تۇرىپ كىرش ەتكىزگەن. قاي جەردە ءجۇرىپ, كىممەن ەگەسۋ كەرەكتىگىن بىلەتىن اككى پالە دەرسىڭ!
ءبىر امىريكاندىق جىگىت: «جامان ادامدى يتكە تەڭەمە, جامان ءيتتى ادامعا تەڭە!» دەپ سالىپتى. ونىسىن ءسال ارتىقتاۋ ايتتىعا قيساق, استانانىڭ ارلانىنا وبالدىق جاساعالى تۇرمىز. ويتكەنى, يت قاپقىسى كەلسە, ءوز ءۇيىنىڭ اۋلاسىندا دا ءتىرى پەندە تولىپ ءجۇر. «قىرىق پىشاقپەن قىرجىڭداپ» تۇرىپ العان جەرى – بىلدەي مينيسترلىكتەردىڭ الدى. كران ۇستىنە ورمەلەپ كەتەتىندەي ميى بولماسا دا, ءبىر ويلاعانى بار شىعار…
ەركەعالي بەيسەنوۆ
