«نۇر وتان» پارتياسى استانا قالىق فيليالىندا پارتيا مەن قالالىق كاسىپكەرلەر پالاتاسى اراسىنداعى ءوزارا جۇيەلىك قارىم قارىم-قاتىناستى ۇيىمداستىرۋعا, وتاندىق كاسىپكەرلەردىڭ باسەكەگە قابىلەتتىگىن ارتتىرۋ, كاسىپكەرلىك باستامالارعا قۇقىقتىق, ەكونوميكالىق, الەۋمەتتىك جاعداي جاساۋعا باعىتتالعان ءىس-شارا ءوتتى.
– ەلورداداعى شاعىن جانە ورتا بيزنەستى دامىتۋ قارقىندى دامىپ كەلەدى. مەملەكەتتىك باعدارلامالار اياسىندا جوبالار جۇزەگە اسىرىلىپ, ونىڭ وڭ ناتيجەسى جەمىسىن بەرۋدە. وسى باعىتتاعى مەملەكەتتىك ساياساتتى ىسكە اسىرۋدا وزىندىك ۇلەسىمىز بار. سول سەبەپتى بۇگىن «نۇر وتان» پارتياسى استانا قالالىق فيليالى مەن استانا قالاسىنىڭ كاسىپكەرلەر پالاتاسى اراسىندا مەموراندۋمعا قول قويىپ, بىرلەسە جۇمىس ىستەۋ ادىستەرىن ايقىنداماقپىز. ونداعى ماقساتىمىز – كاسىپ باسىندا جۇرگەندەرگە قولايلى ورتا جاساپ, ونى دامىتۋ ارقىلى ەل ەكونوميكاسىنداعى باسىمدىلىققا قول جەتكىزۋگە قولداۋ كورسەتۋ, – دەدى «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ەدىل مامىتبەكوۆ.
قالاداعى كاسىپكەرلىكتىڭ دامۋ ۇدەرىسىنە توقتالىپ وتسەك, اعىمداعى جارتى جىلدىقتا 129 643 شاعىن جانە ورتا بيزنەس سۋبەكتىلەرى تىركەلگەن. بۇل وتكەن جىلدىڭ وسى مەرزىمدەگى كەزەڭىمەن سالىستىرعاندا 6,7 پايىزعا كوبەيگەنىن كورسەتەدى. ونەركاسىپ ءوندىرىسىنىڭ كولەمى 145,5 ملرد تەڭگەگە قۇراپ, وتكەن جىلعى وسى كەزەڭمەن سالىستىرعاندا 43,2 ملرد تەڭگەگە ارتقان. ساۋدا سالاسىنا قۇيىلعان ينۆەستيتسيالار وتكەن جىلى 16,6 ملرد تەڭگەنى قۇرادى. 2011 جىلدىڭ كورسەتكىشىمەن سالىستىرعاندا, 3 ەسەگە كوبەيگەنىن كورسەتەدى. قالادا 25 ساۋدا بازارى, 8 ساۋدا-ويىن ساۋىق ورتالىعى, 13 ساۋ-دا جەلىسى, 4000 دۇكەن جۇمىس ىستەيدى. 197 مىڭنان استام ادام وسى سالادا ەڭبەك ەتىپ ءجۇر.
قالا بيزنەس قاۋىمداستىعىنىڭ دامۋىندا مەملەكەتتىك باعدارلامالاردىڭ دا ايتارلىقتاي ورنى بار. «بيزنەستىڭ جول كارتاسى – 2020» بويىنشا وسى كۇنگە دەيىن 61 جوبا, استانا قالاسىنداعى شاعىن جانە ورتا كاسىپكەرلىكتى ايماقتىق قارجىلاندىرۋ باعدارلاماسىمەن 1 547,8 ملن تەڭگەنى قۇرايتىن 14 جوبا ماقۇلدانعان. جاستار كاسىپكەرلىگى ەكپىن الىپ كەلەدى, وسى باعىتتا 43 جوبا قولداۋ كورسەتىلىپ, جۇزەگە اسىرىلۋدا.
ايگۇل ۋايسوۆا
